15
Kuyeiti suvaayɛ konagiti
(Leevi Nuiti 25:1-7)
1 Konagi lɔfelasiɛiti kpein ma, wa kuyeiti suvaayɛ.
2 Wɛlɛ kuyeiti suvaayɛ pelei ʋa: Siɛgi zu kuyei zuvaayɛ konagi ma zezei wosu da, Ɠɔoɠɔ GALAGI lɛbi vai ma, nu kpein é kuye ʋɛai seiɲɔɠɔi ma, é ga zou loin ga tɔun kɛʋele, é mina ani nɔpɛ maaloli ma.
3 Wa zoo wo ɓɔi wɛɛinti da ga ti ta-ɠuyeiti sala, kɛlɛ wa wo-zeiɲɔɠɔiti, zou lointi tɔnɔi yɛ ná, wo mina ani nɔpɛ maaloli ti ma.
4 Tama maa la nɛɛni ga bala nu ʋa ɠɛ wo zaama, mazɔlɔɔ Ɠɔoɠɔ GALAGI wa-ƓALAGI ɠa pɔ ga é tuyai loo wo ʋɛ, é ʋooʋa, zooi naa zu, nii é feezu wo ʋɛ ga wɔnɔ,
5 ni nɔ wa woilo Ɠɔoɠɔ GALAGI wa-ƓALAGI wooi ma, deveiti gè ti veezu wo ya za, wo ti zo, wo ɗa ziɛ ga tiye.
6 Mazɔlɔɔ Ɠɔoɠɔ GALAGI wa-ƓALAGI ɠa tuya loo wo ʋɛ, eɠɛʋelei é minazeɠeni la. Naazu wa ɗa wali ɠuyei ʋɛɛ zou ɠiligaa ma, wo la lɔdɔ boga eyɛsu pɛ. Wa zei zii mɔinmɔin unda, kɛlɛ tanɔpɛ ge la zeiɗa wo unda.
7 Ni wo-zeiɲɔɠɔi, zou loin ta a lɔɔna baladai zu, naama yooi zu nii Ɠɔoɠɔ GALAGI wa-ƓALAGI feezu wo ʋɛ, à mina ɠaazumaavɔ bɛ, wo ʋa ɓe kuyei ʋɛɛzu ma.
8 Kɛlɛ wa naa ʋɛɛ ma ga kuyei, nii a kula kpɛdɛ ma vai zu ɲɛgɛlɛin.
9 À dama, kisiɛ ɲɔi mina lɔ wo-yiimaʋɛ, wo ʋa ɠɛ ma: «Konagi lɔfelasiɛi maaɓuɠa, kuyeiti suvaayɛ konagi,» naa maaʋele ma, wo ɠaazu ɲɔi lo wo-zeiɲɔɠɔi zou loin ʋa, é ga bala nui, wo la ani nɔpɛ fea zea. Mazɔlɔɔ toɠa ɓaazaɠa ga wo-lɔɠɔ Ɠɔoɠɔ GALAGI ma, wa ɠɛ ga sɔba nu.
10 À kuyei ʋɛɛ ma, wo fe zea ga koozunɛɛi. À mina kɛ ga ɓala vaa. Naa a ɠɛɛna, Ɠɔoɠɔ GALAGI ɠa tuya loo wa-woti ɠɛai kpein ma, ta wa-woti ɠɛɛzuʋɛti kpein.
11 Bala nuiti ta ɠɛ nɔ ɠɔ wo zaama zooi zu, naa ɠa é ba, gè wo levea ga wo ɠɛ ga faanɛɛ ɠɛɛ nu, wo yeavie gola wo-zeiɲɔɠɔi zou lointi bɛ, ta maanɔɠɔ nuiti, ta bala nuiti ti zooi zu.
Duɔiti kula vai duɔlai zu
(Ɛgezɔde 21:1-11;
Leevi Nuiti 25:39-46)
12 Ni wo-ɠɛɛloin Eɓulu nui ta, zunu ɓaa anzanu, a ɓɔɠɔ ʋɔdina wo ma, toɠa botii ɠɛ wo ʋɛ kona dɔzita laawu. Kɛlɛ konagi lɔfelasiɛi ma, wa fie, é zeɠe wo ʋɔ bɛ, é li.
13 Siɛgi zu wo fiesu la, ga é ɠɛ ɓɔɠɔ yeema, é zeɠe wo ʋɔ bɛ, é li, à mina ɓe ba, é ʋa li ga yeaɲaka.
14 Wa faanɛɛ ɠɛ bɛ, é zoloo tuyai ma, nii Ɠɔoɠɔ GALAGI wa-ƓALAGI toa wo ʋɛ, wo seɠe wa-logani goiti ba, ta wa-moloi é ga ɓeleegi, ta wa-lɔɔi.
15 À ɠizɛ su ga wa ɓɔɠɔi wo ɠɛni ga duɔiti Ezipete yooi zu, Ɠɔoɠɔ GALAGI wa-ƓALAGI ɠa é wo unmɔɔni. Naa ɠa é kɛɛzu, gè niima levei veezu la wo ya za.
16 Ni wa-luɔi a ɠɛna, é la pɔ é zeɠe wo ʋɔ bɛ, tɔɔzei é ɠilia wo ʋa, wa wa-ʋɛlɛyeɠei, toɠa gaanɛ zu wo ʋɔ bɛ,
17 naazu wa kɔlu ɠaazoɓagi zeɠe, wo goii ʋɛɛ wa-ɓogi ʋa, wo bɔ. Naazu toɠa ɠɛ ga wa-wotiɠɛ nui eyɛsu ɠɔ. Wa kɛ ɠana nɔ ga wa-wotiɠɛ anzanui.
18 Naa mina ɠɛ wo ʋɛ ga faaɓa, duɔ vie fai zu wo ʋɛ, é ʋa li ɓɔɠɔ yeema, é zeɠe wo ʋɔ bɛ, mazɔlɔɔ é botii ɠɛa wo ʋɛ kona dɔzita laawu, é botii ɠɛa wo ʋɛ, nii a ɠɛ ga sala zeɠe nui nɔnɔi zeizu felegɔ ɠɛʋele. Ɠɔoɠɔ GALAGI wa-ƓALAGI tuya loo wo ʋɛ, naa kpein su, nii wo kɛɛzu.
19 Wa-loganii ma wolaiti ta ma goiti ma yiʋo mɔungiti, ti ga ma zinɛiti, à naati fe Ɠɔoɠɔ GALAGI wa-ƓALAGI ʋɛ. À mina boti ɠɛ ga wa-nikɛiti ma yiʋo mɔungi. À mina wa-ʋaalagiti ma yiʋo mɔungiti maaleɠai leʋe.
20 Wa-o, wa-ʋɛlɛyeɠeiti-yo, wa ɗa mi konagi leʋe daa ɠilagila, Ɠɔoɠɔ GALAGI wa-ƓALAGI ɠaazu, naama adaʋɛ, ʋɛ é yeelosu ná ʋa.
21 Ni nɛɛʋuzu ɠa ba, ni toɠa lɛkpuzu, ɓaa gaazuɠolea ʋe, ɓaa nɛɛʋuzu wola ɠili ge ɠɛ ba, à mina naa ɠula ga zalaɠa Ɠɔoɠɔ GALAGI wa-ƓALAGI ʋɛ.
22 Wa mi, ʋɛ wo zeini ná, nui nii kɔzɔai, ɓaa nii ɲadegai, naati seizu felegɔiti pɛ ta zoo ti ta mi, eɠɛʋelei nɔ nu a ɗa dopai ɓaa goegi mi la.
23 Kɛlɛ à mina ma ɲamai mi eyɛsu pɛ. Wa pu ya zooi ma, eɠɛ ziɛi.