GALA Sɛʋɛi Tɔ Sɛʋɛi Velesiɛi 24

Vulu zaa vai

1 Ni tanisu zunui ta a anzanui ta zeina, ti yɛ liizu la, wɔinzeɠe ma, tɔɔzei é fai ta ɠa naa ʋa, nii é la nɛɛni bɛ, toɠa vulu zaa zɛʋɛi ɓɛtɛ, é fe zea, é pilɛ, é ɠula ná-pɛlɛi wu, 2 naa a zeɠena pɔ bɛ, é li, é zei ʋolu zunu ɠili bɛ, 3 ni wɔin a zeɠena naama zunui ma, é vulu zaa zɛʋɛi ɓɛtɛ, é fe zea, é kula ná-pɛlɛi wu, ɓaa zunu ɠaaɓelagi ná, nii é ɠɛa seini, naa za, 4 zunu mɔungi é pilɛni, naa la mɔ zooga é ʋa sei ga anza, kɔzɔa ʋoluma, mazɔlɔɔ naa ɠa ga fai kɔzɔai Ɠɔoɠɔ GALAGI ɠaazu. À mina zooi zulaave ga kotoi, nii Ɠɔoɠɔ GALAGI wa-ƓALAGI feezu wo ʋɛ ga wɔnɔ.

Tɔgi zeikɔlɔgiti

5 Siɛgi zu zunui anzai zeizu la ga niinɛ, suvaa ɠa yɛ ga kɔɔɠɔ vai, daaloba woti vaa la laa unma, toɠa yɛ ná-pɛlɛyeɠei yeema, eyɛsu kona gila, anzai é fuluai, é naa ɠoozunɛɛ vai ɠɛ.

6 À mina wo-zeiɲɔɠɔi ná-molo ziɠa ɠodai ta etei ti felegɔ zeɠe ʋɔɔma ga kpɔunma. À mina vɔlɔ ɠite etei ɠula zea, mazɔlɔɔ wa naa ɠɛɛna, kɛɛʋɛ eɠɛ wa zɛnvui ɠula zea.

7 Ni wa zunui ta ɠaana, é nu vului ta unmaai wo-ɠɛɛlointi Izelayɛle nuiti saama, é dɔ duɔlai zu, ɓaa é pɔdi, kɛni unma nui naa za. Wa faa ɲɔi lɔɔɠula ɠana ɓɔɠɔ zaama.

8 À dama ga gee zeeɓɛi, wo naa kpein so, wo ziɛ la, nii zalaɠa ɠula nui Leevi nuiti ti wo ɠalasu da. Wa devei naati so, wo ziɛ ga tiye, nii gè feeni ti ya. 9 À ɠizɛ naa zu, nii Ɠɔoɠɔ GALAGI wa-ƓALAGI kɛɛni ga Miliyame, wo ɠɛai ma siɛi wosu, wo ɠulaai ma Ezipete yooi ʋa.

10 Wa kuyei ʋɛɛna wo-zeiɲɔɠɔi ma, à mina lɛ ná-pɛlɛi wu, wo ʋa ma ɓɔunma ani zeɠe, 11 wa kuye zo nui maaɓɔun eteaʋɛ, é ʋa ga ná-kpɔunma anii wo ʋɔ eteaʋɛ. 12 Ni bala nui ʋe, é ná-seɠe wolai veai wo ya ga kpɔunmai, aisa wo ʋa la, kɛni wo ná-kpɔunma anii ɠaaɠale ma, wo fe zea. 13 À mina ɓe teʋesu pɔ pa, foloi a ɠɛna daa, naa ɠa a kɛ a ɠɛna laa, é pɛɛ ɓɔɠɔ ma, é tuya loo wo ʋɛ. Ɠɔoɠɔ GALAGI wa-ƓALAGI ɠa naama vai leve wo ʋɛ ga telebodai.

14 À mina tooma vaa ɠɛ ga zeaɲaka nui, ɓaa maanɔɠɔ nui, wo ʋa ná-folo wotii ma zalai ɠoloɠolo, é ɠɛni ga Izelayɛle nu, ɓaa seikɔɠɔma nui nii é zeini wo zaama, wa-yooi zu. 15 Kɛni wo salai ve zea, folo-o-folo aisa foloi ʋa da, mazɔlɔɔ toɠa ga zeaɲaka nui, kpalaʋɛ ga zalai zɔlɔɔ fai. Ni naa laade, toɠa kpee loo Ɠɔoɠɔ GALAGI woizu wo laalɔɠɔma, ma ɠotoi ɠa la wo unma.

16 Nu la doun kɛɛɠɛiti paa ti-lointi ta-ɠoto ɠɛai vaa zu, nu la dointi paa ti zɔlɔɔ nuiti ta-ɠoto ɠɛai vaa zu. Ɛsɛ gilagilagi ɠa za tɔ ɓɔɠɔi ná-kotoi vaa zu, nii é kɛai.

17 À mina tukpɔɠaaleʋe ga zeelɔzɔɠɔzu, wo ʋa seikɔɠɔma nui lɔ, ɓaa podoin. À mina poanzai ná-seɠei zo ga kpɔunma. 18 À ɠizɛ su ga wo ɠɛni ga duɔiti Ezipete yooi zu, Ɠɔoɠɔ GALAGI wa-ƓALAGI wo unmɔɔni. Naa ɠa é kɛa, gè devei nii veezu ga wo ziɛ la.

19 Siɛgi zu wo moloi leʋezu la wa-ɓalagaʋɛ, wa yeemana molo ɠilii ta ma kpalagi zu, à mina ɠale ma, wo ʋa seɠe. À zɛ ná. Toɠa yɛ ná seikɔɠɔma nuiti bɛ, ta podointi, ta poanzaiti, naa ɠa a kɛ Ɠɔoɠɔ GALAGI tuya loo wo ʋɛ, fai kpein su wo kɛɛzu. 20 Wa wolive wului ma waai loɠana ga, à mina ziɛ ʋogi zu, niiti ti yɛgai ma ɓekegiti ga, naati ta ɠɛ ga seikɔɠɔma nuiti tɔnɔ, ta podointi, ta poanzaiti. 21 Zenɔ ɠana, siɛgi zu wo leezɛinti kulazu la, à mina ɠale ma ʋogi zu, wo ʋa ma ɠɔpɔgi mɔtaiti kula, niiti ti yɛgai ma ɓekegiti ba, naa ɠa ɠɛ ga seikɔɠɔma nuiti tɔnɔ, ta podointi, ta poanzaiti. 22 À ɠizɛ su ga wo ɠɛni ga duɔiti Ezipete yooi zu. Naa ɠa é ba, gè devei nii veezu wo ya, ga wo so, wo ziɛ la.