GALA Daawoo Zɛʋɛi Ezekiyɛle 18

GALA ka ɛsɛ tukpɔɠaaleʋe,
é zoloo tuʋa ʋelei ma

1 Ɠɔoɠɔ GALAGI ɓɔɛni pɔ̀, é ɠɛ mà: 2 «Leeni vaa zu wo niima vaalaalii wosu Izilayɛle yooi zu ga: ‹Doun kɛɛɠɛiti ti leezɛn ɓoei miini, ti-lointi ɲiigai ɠaalaɓa›? 3 Eɠɛʋelei gè vulua la ga ɠite, wo la mɔ naama vaalaalii ta woga pɛ Izilayɛle yooi zu!» Maliɠii Ɠɔoɠɔ GALAGI wooi ɠana. 4 «Tama, zɛnvui pɛ ka ga nɔ̀nɔ, doun zɔlɔɔ nuiti zɛnvui ta dointi zɛnvui. Nui a kotoi ɠɛ, naa ɠa a za.

5 «Zunui ta ʋɛtɛ, telebogai, é ziɛzu ga sɔledai ta telebodai. 6 É la gize ɠɔɔ zalaɠa miizu, é la Izilayɛle nuiti ta-ɠɔɔɠɔ gani nɔɠɔi ta ɠɔɔzu. É la ɠaazuɠulazu seiɲɔɠɔi anza ʋa, é la laa ga anzanu, naa a ɠɛna alugi ɠaa. 7 É la nu zuziɠaa. A kuye ʋɛɛna nu ma, kpɔunmai naa seizu ma, toɠa naa ɠaaɠale ma. É la unma wosu. Zɔi pului ma, é ná-daamianigi ve naa ya. Zɔi seɠe la zea, é ta ve naa ya. 8 É la ná-walii lɔɔzu ga lɔdɔ, ta ʋa la ma, ɓaa tɔnɔ sɔlɔɔ faa. Zee la telebotala vaa nɔpɛ su, é ɗa tukpɔi ɠaaleʋe ga gaamai nuiti zɔɠɔzu. 9 É ɠolo deveiti bɛ ta tɔgiti gè ti zeiɗai, é ziɛ ga gaamai. Niima nu zii ɠa ga telebo nu, gaamazu toɠa zɛnvui wo,» Maliɠii Ɠɔoɠɔ GALAGI wooi ɠana.

10 «Ni a doun zunu zɔlɔɔna, é ga toosu nui, nu ʋaa nui, ɓaa é tuʋa ʋele ɲɔi ma zii pɛ kɛɛzu, 11 tama kɛɛɠɛ la naa tanɔpɛ kɛɛni, é gize ɠɔɔ zalaɠaiti mia, é ʋilɛga seiɲɔɠɔi anzai ʋolu, 12 é maanɔɠɔ nuiti suziɠaa, ta bala nuiti, é nuiti unmaa, é la kpɔunma ɠaaɠalega ma kuye zeɠe nui ma, é ɓɔɠɔ ve kɔɔɠɔ gani nɔɠɔ ɠɔɔ vaiti zea, é kɔzɔba vaiti kɛa, 13 é kuye ʋɛa ga talamai tɔnɔ fai ma. Naama nu zii maanɛɛʋɛ é yɛ vulua ɓaa? É mina yɛ vulua pɛ! É kɔzɔba vai ma zii pɛ kɛa, gaamazu kɛni é za nɔ. Ma ɲamai ɠa yɛ tɔ ɓɔɠɔi unma.

14 «Kɛlɛ ni zunui naa a doun zunui ta zɔlɔɔna, kotoi kpein kɛɛɠɛ kɛai, é naati pɛ ka, kɛlɛ é la kɛɛni é ʋa ziɛ ga naa ziɛ ʋelei. 15 É la gize ɠɔɔ zalaɠa miizu, é la Izilayɛle nuiti ta-ɠɔɔɠɔ gani nɔɠɔi ta ɠɔɔzu. É la ʋilɛsu seiɲɔɠɔi anza ʋolu. 16 É la nu zuziɠaa. A kuye ʋɛɛna nu ma, é la yeezeizu kpɔunma wu. É la unma wosu. Zɔi pului ma, é ná-daamianigi ve naa ya. Zɔi seɠe la zea, é ta ve naa ya. 17 É la yeelɔa telebotala vaa zu, é la kuye ʋɛa talama vaa zu, ɓaa tɔnɔ faa. Toɠa ɠolo ɠana deveiti ta tɔgiti bɛ gè ti zeini. Ná-doun zunui la zaa kɛɛɠɛ ná-faaɠaazagiti faa zu, gaamazu toɠa zɛnvui wo. 18 Kɛɛɠɛ ɠa é nuiti nimizaa, é seiɲɔɠɔiti unmaa, é loa maaɠoolii zu nuiti ma, naa ɠa é ba, tɔ ɓɔɠɔi ɠa za ná-faaɠaazagiti faa zu.

19 «Wa gaazaɠagi wosu ga, leeni vaa zu doun kɛɛɠɛi ná-faaɠaazagi ma ɠuyei la sala ná-doun zunui ma? Toɠa ga, doun zunui ziɛ ʋelei zolooni sɔledai ma ta telebodai, é ɠoloni nà-tɔgiti bɛ. Gaamazu toɠa zɛnvui wo. 20 Zɔi a kotoi ɠɛ, naa ɠa a za. Dointi ti la ti zɔlɔɔ nuiti ta-vaaɠaazagi ma ɠasɔi zeɠea ti ʋɛ, dointi sɔlɔɔ nuiti ti la ti-lointi ta-vaaɠaazagiti ma ɠasɔi zeɠea ti ʋɛ. Zɔi telebogai, ná-sɔledai ɠa leve unma, faa ɲɔu ɠɛ nui ɠa ná-faa ɲɔi ma ɠasɔi ɠa la unma.

21 «Ni faa ɲɔu ɠɛ nui a zeɠena tuʋa ʋele ɲɔiti polu, é nà-tɔgiti so, é ziɛ ga sɔledai é zoloo telebodai ma, gaamazu toɠa zɛnvui wo, é la zaa. 22 Tɔ koloɠologiti kpein é kɛɛni, naa la mɔ levea, toɠa zɛnvui wo tɔɔzei telebodai ʋa, nii é kɛɛzu. 23 Wa kaazu ga faa ɲɔu ɠɛ nui zaa vai ɠa nɛai bɛ̀ ɓaa? Nii wɔ̀inɗai la, naa ɠa ga é siɛ ʋelei maavalibo, é zɛnvui wo,» Maliɠii Ɠɔoɠɔ GALAGI wooi ɠana. 24 «Kɛlɛ ni telebo nui a ɠɛlɛna ná-sɔledai ʋa, é ɗa faa ɲɔi ɠɛ, é ʋokɔɠɔ faa ɲɔu ɠɛ nui ma kɔzɔba ɠɛɛwotiiti su, wa kaazu ga toɠa zɛnvui wo? Nu la mɔ kɛɛwoti ʋagɔi tanɔpɛ devea, é ti ɠɛɛni mɔungi, toɠa za ná-kololalai vaa zu ta ná-faaɠaazagiti.

25 «Wa ɠɛɛzu ma: ‹Maliɠii ziɛ ʋelei la zolooni.› À woilo dɛɛ deɠɛmu, Izilayɛle nuiti, sìɛ ʋelei ɠa é la zolooni ɓaa? Tɔun wo-ziɛ ʋeleiti tɛi ti la zolooni ɓaa? 26 Ni telebo nui a ɠɛlɛna sɔledai ʋa, é ʋilɛ ga faa ɲɔi ɠɛa, a zaana naazu. Faa ɲɔi é kɛai, naa maaʋele ma ɠa é ʋalasu da zɛnvui ma. 27 Ni tama faa ɲɔu ɠɛ nui a ɠɛlɛna tuʋa ʋele ɲɔi ʋa, é ziɛ ga sɔledai, é zoloo telebodai ma, toɠa zɛnvui ɠizo. 28 Tɛi é ná-tɔ koloɠologiti kwɛɛga niiti é ti ɠɛɛni, é ɠɛlɛ ti ʋa, toɠa zɛnvui wo, é la zaa pɛ. 29 Kɛlɛ Izilayɛle nuiti ta ɠɛɛzu ma: ‹Maliɠii ziɛ ʋelei la zolooni.› Nɔ̀un siɛ ʋelei ɠa é la zolooni, Izilayɛle nuiti? Wo-ziɛ ʋeleiti tɛi ti la zolooni tɔun ɓaa?

30 «Naa ɠa é ba, deɠɛmu, nà wo ɠilagilagi lukpɔɠaaleʋe ga wo-ziɛ ʋeleiti, Izilayɛle nuiti,» Maliɠii Ɠɔoɠɔ GALAGI wooi ɠana. «À wo-ziɛ ʋelei maavalibo deɠɛmu, wo ɠɛlɛ tɔ koloɠologi pɛ ba, wa-vaaɠaazagi mina ɠɛ ga wo undaaʋili saɓui. 31 À tɔ koloɠologiti pɛ pili ya, niiti wo ti ɠɛɛni dàalɔɠɔma, wo ti maaɠooza ɓɔɠɔ ʋa. À wo-ɠigiti niinɛ, wo-yɛnvuiti ti niinɛ, mazɔlɔɔ lee vaa zu wo pɔ wo za, Izilayɛle nuiti? 32 Tɔɔzei nɔ̀un ziima vaa la ga gè nu nɔpɛ ka é ɗa za. Naa ɠa é ba, à wo-ziɛ ʋeleiti falibo, nii a kɛ wo yɛ vulua,» Maliɠii Ɠɔoɠɔ GALAGI wooi ɠana.