31
Faalaalii é ʋilɛ
sɛdele gulu wolai ʋa
1 Yeeɠɛɠalai gi ɠɛni la Ɓaɓilɔne, naama ɠona puugɔ maazu ɠilasiɛi (11) ma, alugi zaʋasiɛi ma volo mɔungi ma, Ɠɔoɠɔ GALAGI ɓɔɛni pɔ̀, é ɠɛ mà:
2 «Ɗa ʋe, zunui, bo Ezipete masagi Falaɠɔn ma ta ná-nuɓusɛiti:
‹Nu ɠa è ʋokɔɠɔ leeni ma, ɗɛi ɗa-zobogi wɔɔlɔai ɠani?
3 Asiili ɠulaʋɛ ga Liɓan sɛdele gului,
nii ma ɓekegiti maanɛai ga pagɔ,
é ga dɔɓɔ wolai niinigi zea,
gaaɠoozaai gola,
nɔungi zeiɗai tonaɓiingiti ba.
4 Tona ɗɛi ɠa é bɔɔlɔni,
zou wu ɗɛ wolai kpɛtɛni, é ɠooza,
ziɛiti ti ɠaalɛɛni ba ma zapeiti maaɠoolii zu,
naa ʋolu ti ɗa yei guluiti pɛ ma ti dɔɓɔi zu.
5 Naa ɠa é kɛɛni gaaɠoozani
é leʋe guluiti pɛ ba dɔɓɔi zu.
Ma ɓekegiti ti mɔinni, ti ɠoozakooza,
ziɛi zaɓu zu é ɠɛni kɔɔzu,
siɛgi zu é ɠɛni wuzeɠezu la.
6 Wɔni ma zii pɛ ge ɠɛni laɠagi losu su,
dɔɓɔ zuaiti ti ɠɛni yiʋoi ʋuuzu bu,
nuɓusɛ mɔinmɔin ge ɠɛni ná-eteai ziɛzu ná-niinigi wu.
7 É ʋani ná-maayikii zu,
gaaɠoozani, ma ɓekegiti suvie,
ma zapeiti ti yeini zooi wu, ziɛi zɛɓɛzu.
8 GALA ná-kpelei zu,
sɛdele gulu nɔpɛ ge la ɠɛni ná a ʋokɔɠɔ ma,
sipɛlɛ gulu nɔpɛ ma ɓeke ge la ɠɛni ga nɔnɔiti kɛʋele,
ɗalagi tanɔpɛ ma ɓeke ge la ɠɛni ɠulani ga ma ɓekegiti,
GALA ná-kpelei zu, gulu wola ɠila kpalaa la ɠɛni ʋani ga kɛʋele.
9 Gè kpɛtɛni ga ma ɓeke pagɔiti.
Edɛn wulu wolaiti kpein GALA ná-kpelei zu,
ti pɛ ti ɠɛni toloi ɠulazu la.› »
10 « ‹Naa ɠa é ba, Maliɠii Ɠɔoɠɔ GALAGI wooi ɠaa: Tɔɔzei é ɓɔɠɔ ɠaaɠooza, é nɔungi wuzeɠea é zeeli tonaɓiingiti saama, é waso ziimaʋɛ ga ná-koozai.
11 Naa ɠa é ba, gè dɔa ziiti ta-masagi naa ná-zobogi wu, nii sɛbɛi wola wɔɔlɔai, ga naa so é zoloo ná-topele ɲɔi ma. Gè kpɛɛni.
12 Wɛɛinti ti wola zuɲɔuɗai ziiti saama, naati ti pɔni, ti zɛ ná. Ma ɓekegiti ti looni gizeiti ma ta nɛmɛiti pɛ su. Ma ɓekegiti suɠaleɠaleni eteai zu ʋɛtugiti pɛ su. Etea nuɓusɛiti pɛ ti ɠulani ná-niinigi wu, ti ɠɛlɛni ba.
13 Wɔniiti ta ʋa, ti zei ma unkpulugi ɠa pɔgai, dɔɓɔ zuaiti pɛ ti ʋa, ti ɗa lɔɔɠu ma ɓekegiti bu.
14 Naa pɛ ka ɠɛ, naa ɠa a kɛ gului nɔpɛ é ɓɛtɛzu ziɛlaʋɛ, é mina waso ná-gaaɠoozai maaʋele ma, é mina nɔungi wuzeɠe é ʋa zei tonaɓiingi ʋa, nii a kɛ gulu wola nɔpɛ ziɛi zɛɓɛzu gaa mina ɠooza ná-wasogi zu. Tɔɔzei gulu wolaiti ta nuɓusɛiti, saai leʋeʋɛ ti pɛ ma, ga ti yei gɔvɛalaazu zooi wu, naati pɔ bɛ ti yeizu kabai zu.
15 « ‹Maliɠii Ɠɔoɠɔ GALAGI wooi ɠaa: Voloi sɛdele gului yeini la gɔvɛalaazu, gè gɔlɔɗɛi lɔɔni ɛsɛ pɛ gaazu. Ná-faa zu, gè zou ɗɛiti soni, ti la yeiɗa, ti loni ti yei ʋeleiti su. Ná-faa zu, gè kpidii ʋɛɛni Liɓan ɠizeiti ma, gè guluiti pɛ fɔɔni dɔɓɔiti su.
16 Gè nuɓusɛiti sasuɓalini ga gului tɛi too lugi, siɛgi zu gè zeini la gɔvɛalaazu, naati pɔ bɛ ti kabaiti su. Zooi wu, Edɛn wulu wolaiti kpein, gulu maanɛɛgiti, ti ʋagai ti pɛ ba Liɓan ɠizei ma, ti wola vizɔgai, ti ziɛi zɔlɔɔsu ga pagɔ, ti ɠoozunɛɛni.
17 Tiya ɓalaagi, ti ɓɔ tɔun ba, ti yeini gɔvɛalaazu, naati pɔ bɛ niiti ti zaani ga boɠa zɔkpɔi, tiya ɠa ti ɠɛni ga poluzeigiti, ti zeini ná-niinigiti bu ziiti saama.
18 Edɛn wulu gila kpalaa la ɠɛni ʋokɔɠɔga è ma pagi zu, bɔɔlɔi zu. Anɛɛ naa ʋe, ɗa ɓɔsu ti ʋa, wo ʋili ya zooi wu, è la tatipɛlɛʋolulala nuiti saama ti undaaʋilini ga boɠa zɔkpɔi. Naa ɠa é ga Falaɠɔn ná-kulanumai ta ná-nuɓusɛiti, Ezipete nuiti,› » Maliɠii Ɠɔoɠɔ GALAGI wooi ɠana.