Ɛsedalase
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Ɛsedalase ta Neɠemi ta-zɛʋɛiti ta dɛɛzu ʋelei zobogi veeni la Izilayɛle nuiti zea ga ti ɠale ma ta-yooi zu, ti ɓega ʋoluma ga li ga tiye duɔlai zu Pɛɛlese ta Ɓaɓilɔne. Ɛsedalase wola ɠaazulogɛ GALA sei ʋɛlɛi lo pelei ʋa Zeluzalɛme. Faaɠwɛ nu mɔinmɔin daaʋɛ da ga Ɛsedalase ɠa é Dɔlɔ Sɛʋɛ felegɔiti kɛa ta é ti ɠaalɛ ba, naa ʋɛɛ sɛʋɛi nii ʋa tɔ ɓɔɠɔ daaseigi ba, ta Neɠemi nɔnɔi. Ni Ɛsedalase ɓɔɠɔi la ɠɛni de, kɛlɛ tanisu nu ɠila kpegi nɔ ɠa é naama zɛʋɛiti pɛ gaalɛai ba. Kɛɛʋɛ eɠɛ Ɛsedalase Ná-Sɛʋɛi ɠaalɛɛʋɛ ba kona unnaanigɔ puunaanigɔi ma (440), aisa Yesu Kilista ʋa zɔlɔɔ, kɛlɛ ma zɛʋɛi ná tanigaa ɠɛɛʋɛ yeeɠɛɠalai taɠiligaa zu.
Ɛsedalase Ná-Sɛʋɛi ɠa dɛɛzu ʋelei GALA ge levega la, masagi Siluse ɗa va bu, é zobogi ve Izilayɛle nuiti zea, ti ɠale ma ta-yooi zu, ta ti GALA sei ʋɛlɛi lo ʋolu. Naa ɓalaa ɠɛni ga GALA gooi nii Zelemi boni, naa ʋilɛ fai su (Zel 29:10-14). Izilayɛle zili nui tanigaa ti ɠɛni ná, niiti ti GALA sei ʋɛlɛi lo fai laalɔɠɔma. Ma wotii loni vɔlɔ yeeɠɛɠalai tanigaa laawu, kɛlɛ gaaɓela, Izilayɛle nuiti ti zooni GALA ná-kpɔbai maaʋele ma, ti GALA sei ʋɛlɛi lo ʋolu. Ɛsedalase loni ɓalaa Izilayɛle nuiti tuɠɔ, ti ti-ziɛ ʋeleiti maavalibo. Naa ɠɛni ga ta-minazeɠegi niinɛ vai ga ti ziɛ ga GALA ná-tɔgiti.
Unsosuʋɛ
1. Ʋelei Siluse zobogi veeni la Izilayɛle nuiti zea ga ti ɠale ma ta-yooi zu, ta pɛlɛyeɠeiti daaseigiti niiti ti ɠaleni ma (1:1—2:70).
2. GALA sei ʋɛlɛi lo fai ʋolu Zeluzalɛme (3:1—6:22).
3. Ɛsedalase ɠaaɠaleni ma Zeluzalɛme, naa ʋɛɛ Izilayɛle ʋɛlɛyeɠei tanigaa ʋa (7:1—8:36).
4. Ɛsedalase loni Izilayɛle nuiti tuɠɔ ga ta-minazeɠegi niinɛ ti yɔɠɔzu ta GALA (9:1—10:44).
1
Siluse zobogi vee vai ga
GALA sei ʋɛlɛi lo ʋolu
(2 Dɔlɔ Sɛʋɛi 36:22-23)
1 Pɛɛlese masagi Siluse ná-masa fai ma ɠona mɔungi, nii a kɛ Ɠɔoɠɔ GALAGI laawooi ʋilɛ su, nii GALA goo wo nui Zelemi boni, é Pɛɛlese masagi Siluse yiiziɠani koozu. Naa zɛba é niima wooi ɠɛ ga sɛʋɛ, naa ʋoluma ti zeze la ná-masa zooi zu ná pɛ, ti ɠɛ ma:
2 «Pɛɛlese masagi Siluse wooi ɠa é ga nii: ‹Ɠɔoɠɔ GALAGI, nii é geeɠɔlɔgi zu, naa masa zooi kpein dɔɔʋɛ zèezu eteai zu, é botii veeʋɛ zèa ga gè GALA sei ʋɛlɛ lo bɛ Zeluzalɛme, Zuda yooi zu.
3 Wo zaama, ɓɛɛni ka ti ga ná-nuɓusɛiti? Ta-ƓALAGI, Ɠɔoɠɔ GALAGI ɠa yɛ ti ʋa, ti liina, ti lɛ Zeluzalɛme, Zuda yooi zu, ti Ɠɔoɠɔ GALAGI zei ʋɛlɛi lo, Izilayɛle ná-GALAGI, nii ti dɛbizu Zeluzalɛme.
4 Ʋɛ nɔpɛ ná-nui tanigaa ti ná, ti-zeiɲɔɠɔiti ti ɓɔ ti ʋa ga walii ta zanugiti, ta anii ma zii pɛ, naa ʋɛɛ toganiiti ba, ta vebɛaniiti ti daai ɠisu Zeluzalɛme ƓALAGI zei ʋɛlɛi lo fai zu.› »
Zeluzalɛme ziɛi
ma ɠɛʋele ɓɛtɛi
5 Zuda ta Ɓɛnzamɛn ʋɛlɛyeɠe ɠundiɠiiti kpein ta zalaɠa ɠula nuiti, naa ʋɛɛ Levi nuiti, ta niiti kpein GALA ge puuni ti yiima, ti ɠɛʋele ɓɛtɛni ga ti ɠale ma ta-yooi zu, ti Ɠɔoɠɔ GALAGI zei ʋɛlɛi lo Zeluzalɛme.
6 Ti-zeiɲɔɠɔiti ti ɓɔni ti ʋa ga sɔɔlaiti ti ga walii, ta zanugi, ta sɔɔla ɠiligaa, sɔɔla ɓiigi ma zii pɛ, naa ʋɛɛ toganiiti ba, vebɛani ɓulukpulugiti ti la naati ba.
7 Masagi Siluse ɓɔɠɔi ɗa ɠula ga sɔɔla ɓiigiti pɛ niiti Neɓukadenɛzaal ti zeɠeni Ɠɔoɠɔ GALAGI zei ʋɛlɛi wu Zeluzalɛme, é li ga tiye, é ti la ná-galagiti ta-ʋɛlɛi wu.
8 Pɛɛlese masagi devei veeni naavolo makɛ nui Miteledate ya, naa nii pɛ feeni Zuda ɠundiɠii Sɛsɛɓasaal ya.
9 Ti-liegɔi ɠaa: zanu taza ʋuusaʋagɔ (30), ta wali laza waagila (1.000), boɠa ʋuufele maazu taaʋuugɔ (29),
10 zanu ziawɔ ʋuusaʋagɔ (30), wali ɗaawɔi ma ʋɛɛda felegɔi ɠɛ ga unnaanigɔ puugɔ (410), sɔɔlai mɔtai ɠɛni ga waagila (1.000).
11 Zanu sɔɔlai ta wali zɔɔlai kpein kpɔga ɠɛni ga waadɔɔlugɔ unnaanigɔ (5.400). Sɛsɛɓasaal liini ga ti pɛ ta-yooi zu, kula zou ʋa nuiti galesuʋɛ ma, ti zeɠe Ɓaɓilɔne, ti li Zeluzalɛme.