9
Wɛɛn anzanuiti fulu vai
Izilayɛle nui ma mɔinmɔin bɛ
1 Niima vaiti poluma, kundiɠii tanigaa ti maaɓuɠani bà, ti ɠɛ mà: «Izilayɛle nuɓusɛiti, ta zalaɠa ɠula nuiti, naa ʋɛɛ Levi nuiti ba, ti la maaɠoozani zooi nii zu nuɓusɛiti ba, ti la kɛɛni ti ʋa zeɠe zii niiti ta-ɠɔzɔba vaiti polu: Kanaan nuiti, Ɠɛte nuiti, Felɛze nuiti, Yeɓuse nuiti, Amɔn nuiti, Moaɓe nuiti, Ezipete nuiti, ta Amool nuiti.
2 Mazɔlɔɔ ti naati ti-loun anzanuiti fuluʋɛ ɓɔɠɔ ʋɛ, ta ti-loun zunuiti bɛ, ti zii ɲadegai zupua ga zooi nii zu nuɓusɛiti. Zou zɛʋɛ ɠundiɠiiti ta kundiɠiiti ka ti ɠɛa ga nu mɔungiti ti siɛ ʋele ɲɔi ɠɛ.»
3 Gè naa mɛnigai ma, gè nà-seɠeiti ta nà-seɠe maazu zeɠei ʋalini ga, gè ɗa nɔ̀undeɠaiti ta kpɛ̀lɛi volofolo ma kidaaʋiligi maaʋele ma, gè zei gaazuɠilii zu.
4 Gè yɛni zeini ná eyɛsu kpɔkɔ zalaɠa ɠula ziɛgi zeeli. Niiti kpein ti ɠɛni luazu Izilayɛle ná-GALAGI ná-tukpɔi ʋa, naama nuiti ta-ɠɛɛwoti ɲɔiti daalɔɠɔma, ti ɠulaai duɔlai zu, naati ti ʋaani, ti zei kòba.
5 Kpɔkɔ zalaɠa ɠula ziɛgi zu, gè wuzeɠeni, gè ɠula nà-gaazuɠilii zu, nà-seɠeiti ta nà-seɠe maazu zeɠei ʋaliai ga, gè ʋilɛni ɲìibiɠa, gè yeemaale nà-GALAGI, Ɠɔoɠɔ GALAGI ma,
6 gè maanɛɛnɛ ɠani: «Nà-GALAGI, niima unfe kaa le! Ee, nà-GALAGI, nà unfesu vɔlɔ ga gè ʋa ɠaazuwuzeɠe, gè wɛlɛ è ʋa. Mazɔlɔɔ gá-vaaɠaaza golaiti ti wola mɔinɗa, ti gi maaɓɔlea, gi-zɔgiti ti ɠaaɠooza, ti zei geeɠɔlɔgi ʋa.
7 É zo gi-ɠɛɛni ta-voloiti ma, é zeeli za ma, gá ga sɔba nuiti nɔ, gá-vaaɠaaza golaiti maaʋele ɠa é kɛa, gá-o, gá-masagiti-yo, gá-zalaɠa ɠula nuiti, è gi lɔa la zii ɠiligiti ta-masagiti zea, è gi ve boɠa zɔkpɔi ta duɔlai ya, gi ɠɛ toomai ta unfegi laawu, eɠɛʋelei é la za.
8 Kɛlɛ niima ziɛgi zu, Ɠɔoɠɔ GALAGI, gá-ƓALAGI, è undaanɛ ɠɛa gi ʋɛ yeeɠɛɠala go laawu, ga nui tanigaa ti yɛ vulua gi zaama, ti ɠale ma, ti ʋa, ti zei ɗa-you ɲadegai zu, è gi-ɠaazuʋɛti seɠea ma, ti volo, è zɛnvu go ve gi ʋɛ ga luɔlai zaama.
9 Gi ɠɛa duɔlai zu, kɛlɛ è la ɠɛlɛni gi ʋa. È Pɛɛlese masagiti gaazu ʋagɔ logɛ gi ʋa, ti vaaʋɛ bu ga ti gi-yɛnvui yɛ gi ya, nii a kɛ gi gá-ƓALAGI zei ʋɛlɛi lo ʋolu, ta gi koloɠolosuʋɛti buzeɠe ʋolu, ta gi lɔɔɠuzu ʋagɔ zɔlɔɔ Zuda ta Zeluzalɛme.
10 «Kɛlɛ lee ɠa gá bo niina naa pɛ poluma, ee, gá-ƓALAGI! Mazɔlɔɔ gi ɠɛlɛa ɗa-lɔgiti ba,
11 niiti è ti veai gi ya ga ɗa-wotiɠɛ nuiti maaʋele, GALA goo wo nuiti, è ɠɛni gi ma: ‹Zooi nii wo ʋaazu sɔlɔɔsu, kɔzɔʋɛ, tɔɔzei zii niiti ti zeini su ti ɠɔzɔʋɛ, tama ti sulaavegɛ ga ta-ɠɔzɔba vaiti eyɛsu é zeeli kwɛgi pɛ ma.
12 Naa ɠa é ba, à mina wo-loun anzanuiti fe ti-loun zunuiti bɛ ga anza, à mina ti-loun anzanuiti fulu wo-loun zunuiti bɛ ga anza, à mina yiizoolɛ ga ta-yiilɛigi ta ta-undaanɛɛi ma vaa, naazu wa zɛbɛi zɔlɔɔ, wo ɗa zooi ʋaalɔnɔ pagɔiti mi, wo ma zooi yɛ wo-lointi zea ga poganii eyɛsu ɠɔ.›
13 Nii kpein seeliai gi ma, naa ɠulaʋɛ gá-ɠotoiti ta gi-zɔ ɲɔu wolaiti su, kɛlɛ anɛɛ naa ʋe, è la gi zoni ga ʋelei soloogai la gá-vaaɠaaza golaiti ma, è vaaʋɛ bu ga è gi-mɔta goi yɛ ná.
14 Leeni vaa zu gá li ɗa-lɔgiti koloɠolosu ʋolu, ga gi ɗa vului ɠɛ yɔɠɔzu gá zii niiti ti kɔzɔba vaiti kɛɛzu? È la yiiɠaawana gi ma naazu ɓaa, é ʋa gi pɛ suwuɠaaleʋe, kulaba la ba?
15 Izilayɛle ná-GALAGI, Ɠɔoɠɔ GALAGI, è lelebogɛ, naa ɠa é kɛa, è gi mɔta goi gi yɛ ga vulua za, wɛlɛ gi ʋa è ɠakala ga gá-ɠotoiti, tama niima ɠɛʋelei nii zu, gi la zooga losu kpaan è ɠakala.»