4
Maledosé kpɔbai vali vai Ɛsetɛɛl ma
1 Maledosé naama vai zu ɠwɛɛgai ma nii kɛai, é ná-seɠeiti baliʋalini ga, é saa wɔlɔ wo seɠei loo ɠɔba, é zuʋui ʋu nɔungi ma. Naa ʋoluma é ʋilɛni taazuʋɛ, é kpeei loo ga gola kidaaʋiligi maaʋele ma.
2 Seeliai ma masagi ná-koii laaʋɛ, é loni, mazɔlɔɔ tɔgi zeini ga saa wɔlɔ wo seɠei mina yɛ nu ɠɔba, é ʋa lɛ masagi ná-koizuʋɛ.
3 Zou zɛʋɛ wolaiti kpein su, ʋɛ nɔpɛ masagi ná-deve zɛʋɛi naa a la zeelina ná, ziiɓɔlɔ wolai ta kpeei ta gaazuɠilii ɠa é ɠɛni Zuifuiti saama, ti ɗa zugi zo, tanigaa ti ɗa la saa wɔlɔ wo seɠei ta zuʋui zu.
4 Ɛsetɛɛl ná-botiɠɛ anzanu loungoiti ta zunu zɛɛɠagaiti ti liini, ti bo ma, ziiɠulani ba ga gola. É seɠeiti teʋeni nii a kɛ Maledosé ti loo ɠɔba ga saa wɔlɔ wo seɠei maavalibogi, kɛlɛ Maledosé la ɠɛni kɛɛni.
5 Zunu zɛɛɠagai niiti masagi ti veeni Ɛsetɛɛl ya, ti ɗa boti ɠɛ bɛ, é naa gila tolini, nii daa ga Ɠatake, é vali ma ga naa li, é Maledosé ɠaazaɠa, nii kɛai la, é bo, ta nii é losu ma, é ɗa nuuma vai ɠɛ.
6 Ɠatake ɠulani, é li Maledosé ʋɔ bɛ koi zaamaʋɛ masagi ná-koizuʋɛ ma ʋɛlɛlaʋɛ.
7 Maledosé naa kpein suɠulani ma nii kɛai, walii nii ɓalaa Aman minazeɠeai ga é pu masagi ná-naavolo makɛsuʋɛ, ni ta Zuifuiti paana, é naa liegɔi pɛ bo ma.
8 Naa ʋoluma é sɛʋɛi gila fe zea, nii bogai su ga ti Zuifuiti paa, kalagai Suze taazuʋɛ, é vali ma ga é li, é dɛɛ ga Ɛsetɛɛl, é niima vaiti pɛ bo ma. Naa pɛ poluma, é bo Ɛsetɛɛl ma, naa li, é masagi maanɛɛnɛ, ta é Zuifuiti maavaawo masagi ɠakala.
9 Ɠatake liini, é Maledosé laawooiti bo Ɛsetɛɛl ma.
10 Ɛsetɛɛl ɠɛni ma, é li é niima wooɠaaʋotegi ve Maledosé ya:
11 «Masagi ná-botiɠɛ nuiti ta ná-zooi zu nuɓusɛiti pɛ ti kwɛni ga tɔ gila ka ná ɛsɛ pɛ bɛ. Tɔgi naa é bosu ga nu nɔpɛ é lɛɛzu masagi ná-koi zaamaʋɛ, masagi la tolini, é ɠɛni ga zunu ɓaa anzanu, ma nui ɠa za, kɛni zɔi nii masagi a ná-zanu tukpɔi letena ma, naama nui ɠa zɛnvui a yɛ zea. Nɔ̀un gè kɛa ga folo ʋuusaʋagɔ (30), masagi la tòlisu ɠoba.»
12 Maledosé Ɛsetɛɛl ná-gooɠaaʋotegi naa mɛnigai ma,
13 é wooleʋeni ga ti ɠɛ Ɛsetɛɛl ma: «Mina ɠisiɛ ga tɛi è masa pɛlɛi wu, ɗa ɠila kpe ka è-yɛnvui ɠulazu niima vai zu kpɛtɛai Zuifuiti pɛ daalɔɠɔma.
14 Ni è la kɛɛni è ʋa kpɔba ɠɛ niima vai zu, Zuifuiti ta-ɓɔbai ɠa zɔlɔɔ ada ɠili, ti ɠizo. Kɛlɛ ɗa ma, wo undaa ɠa ʋili, wa è-ɠɛɛ ná-pɛlɛyeɠei. Tɔun vɔlɔ ɓɛ ɠa é kwɛɛ, ni nii ɠɛɠala vai maaʋele lɛi, è ʋa masa anza vai maazɔlɔɔ su?»
15 Ɛsetɛɛl niima wooɠaaʋotegi leʋeni Maledosé ma, é ɠɛ ma:
16 «Li, è Zuifuiti kpein gaalɛ ba, ti Suze taazuʋɛ, wo zugi zo bɛ̀ folo saʋagɔ laawu, folo ʋɛɛ kpidi ʋa, wo mina laami, wo mina ɓɔɔle. Nà ɓalaa gá zugi zosu, gá nà-botiɠɛ anzanu loungoiti ɠana nɔ. Naa ʋoluma nà li niina masagi ʋɔ bɛ, anɛɛ ɓalaa tɔgi la naa woni. Ni nà zaazu, gè za.»
17 Maledosé liini, é naa kpein kɛ, nii Ɛsetɛɛl boni ma.