GALA Daawoo Zɛʋɛi Galate 2

Pɔle ta zɔɔma ɠeelaiti
ti ɠomi fai Zeluzalɛme

1 Kona puugɔ maazu naanigɔ (14) leʋegai ma, Ɓalanaɓase ʋilɛni pòlu, gi li mɔnɔ Zeluzalɛme. Gè Tite ɓalaa seɠeni, é ʋilɛ gi ʋolu. 2 Gè niima ziɛi woni, ga gè ɠolo kulakɛlɛmai naa ʋɛ gè kaani. Gè Woo Niinɛ Ʋagɔi yɔɠɔzulɛɛni ga niiti ti levezu ga kundiɠiiti yɛ gaalɛbai zu, nii gè daazeelizu zii ɠiligiti saama, naa ɠa a kɛ nà-kpizɛi gè bogai, ɓaa gè ʋaazu bosu, é mina ɠɛ ga wafuun. 3 Tite é ɠɛni ga nà-siɛpolui, Gɛlɛki nu ɠɛni de, kɛlɛ é la ɠɛni laani zea ga maaɓaa vaa, ga kɛni é lati pɛlɛʋolu. 4 Anɛɛ naa ʋe, zɛɛ ɠɛɛɠɛlointi maaʋele ma, ti lɔai dɔɔɠuzu gi yeemazu, ti ɠɛni pɔ ga ti tati pɛlɛʋolu. Ti lɔɔni gi zaama eɠɛ nɛnɛgiti, ti gá-ɓɔɠɔyeemai ʋɛtɛ gi su, gá-ɠilibalai zu gá Yesu Kilista, wɔin ɠɛni ti ma ga ti gi ɠɛ ga duɔiti. 5 Gi la ɠɛni woiloni ti-woo ma tago pa, naa ɠa a kɛ, Woo Niinɛ Ʋagɔi ma ɠaamai makɛ wo zaama.

6 Niiti ti levezu ga nu wolaiti, naati ti la ɠɛni zooni ti ʋa faa niinɛ nɔpɛ da nɔ̀un unma. Ti ɠɛʋelei la ɠɛni gàazu ga faa nɔpɛ, mazɔlɔɔ GALA ge la ɗa ga zeelɔzɔɠɔzu ɠɛ. 7 Kɛlɛ tɔun ti kaani ga GALA ge Woo Niinɛ Ʋagɔi laazeeli vai ɠalivaaʋɛ mà naati ma, niiti ti la ga Zuifua, eɠɛʋelei é daazeeli vai ɠalivaani la Piyɛlɛ ma Zuifuiti ma. 8 Mazɔlɔɔ GALA ka é kɛ̀ɛni ga keelai zii ɠiligiti bɛ, eɠɛʋelei é Piyɛlɛ ɠɛɛni la ga keelai Zuifuiti bɛ. 9 Zake, ta Piyɛlɛ, naa ʋɛɛ Zan ʋa, ti ɠɛni levezu ga kundiɠiiti, ti pɛtɛgai ma ga zaalai ɠa mà, ti yeelaani gi ya, gá Ɓalanaɓase, poogi ɠɛni ga naa ga ti yeezeiɗa gi wu. Naa ma, gi pɛ gi zolooni ma, ga gi li gi botii ɠɛ zii ɠiligiti saama, tiya ma, ti li Zuifuiti saama. 10 Ti ɠɛni gi ma nɔ: «À ɠizɛ bala nuiti su.» Gè ɠaaɓaaʋɛ, gè naa ɠɛ ga pagɔ.

Pɔle ta Piyɛlɛ ta-zakpegi Antiyɔse

11 Siɛgi zu Piyɛlɛ ʋaani la Antiyɔse, gè sakpeni ɠaazuni ta ɠaazu, tɔɔzei peelala vaa ɠɛni de. 12 Tɔɔzei ta nuiti ti la ga Zuifua ti ɠɛni laamiizu ada ɠila, aisa Zuifui tanigaani ti ʋa ʋa, ti zeɠe Zake ʋɔ bɛ. Kɛlɛ naati paai ma, é zeɠeni zii ɠiligiti ba, é maaɠooza, tɔɔzei é ɠɛni luazu Zuifuiti ba niiti ti pɔ ga zii ɠiligiti ti lati pɛlɛʋolu. 13 Zuifui zɔiti ti wooveledai ɠɛɛni ga tɔun kɛʋele, eyɛsu Ɓalanaɓase ɓalaagi ʋilɛ ti ʋolu ta-wooveledai zu. 14 Kɛlɛ siɛgi zu gè kaani la ga ti la ziɛzu ga pagɔ, eɠɛʋelei Woo Niinɛ Ʋagɔi ma ɠaamai la, gè ɠɛni Piyɛlɛ ma ti pɛ gaazu: «Ɗa ʋe, è ga Zuifui, è ɠɛa ziɛzu eɠɛʋelei zii ɠiligiti ti ziɛzu la, tɛi ti la ga Zuifu. Leeni vaa zu è zii ɠiligiti kpalazu ga kɛni ti ziɛ ga Zuifuiti kɛʋele?»

Telebodai zɔlɔɔ fai
ga kidaaleʋei maaʋele

15 Gɛi gi zɔlɔɔgai ga Zuifuiti, gi la zii ɠiligiti saama, niiti ti la ɠolozu GALA ná-tɔgi ʋɛ. 16 Gi kwɛni ga nui la ɗa ga ɠɛ ga telebo nu GALA gaazu, ga tɔgi zo fai maaʋele, kɛni kidaaleʋei maaʋele Yesu Kilista ma. Gá ɓalaagi gi ɠidaaleʋeni Yesu Kilista ma, naa ɠa a kɛ gi ɠɛ ga telebo nuiti GALA gaazu ga kidaaleʋei maaʋele Kilista ma. Tɔgi zo fai laade, mazɔlɔɔ nuɓusɛ nɔpɛ ge la ɠɛa ga telebo nu GALA gaazu ga tɔgi zo fai maaʋele. 17 Kɛlɛ ni gá ɠaaɓaana ga gi ɠɛ ga telebo nuiti Kilista zaalai zu, a ʋɛtɛna ga gi ɠɛa ga kotoba nuiti ga zii ɠiligiti kɛʋele, naa ʋoluʋɛ ɠa mu ga Kilista ɠa é gi liizu kotoi ɠɛɛ vai ma ɓaa? Naa li poun! 18 Mazɔlɔɔ tɔgi zo fai niiti gè ɠɛlɛni ti ʋa, gè ti ɠoloɠolo, nà ɠɛna naati kpɛtɛa ʋolu, gè ɓɔɠɔ ɠɛa ga tɔ koloɠolo nui. 19 Mazɔlɔɔ tɔgi zaɓui zu, gè la mɔ zɛnvui wosu tɔgi ʋɛ, naa ɠa a kɛ gè zɛnvui wo GALA bɛ. 20 Gá Kilista gi ɓadɔni saa wului ma. Nà la mɔ de gè ʋa ɠɛ zɛnvui wosu, Kilista ɠa é yɛnvuzu sù. Zɛnvui gè bosu niina, nà bosu ga kidaaleʋei maaʋele GALA Doun Zunui ma, nii é nɛ̀a ʋɛ, é yee zeɠe ɓɔɠɔ maazu nà-faa zu. 21 Gè la ɠɛlɛzu GALA ná-zaalai ʋa, mazɔlɔɔ ni telebodai ɠa zɔlɔɔ ga tɔgi maaʋele, Kilista zaani nɔ wafuun.