14
Aɓalame Lɔte unmɔɔ fai
1 Naama ziɛgi zu, Sineyaal masagi Amelafɛle, ta Elazaal masagi Aliyɔke, ta Elame masagi Kedɔɔl-Lawɔmɛɛl, ta Gɔyime masagi Tideyale,
2 yeeta naati ti kɔɔi ʋɛɛni Sɔdɔme masagi Ɓeela ʋa ta Gɔmɔɔl masagi Ɓiilesa, ta Adema masagi Sineyaɓe, ta Seɓɔyime masagi Seemeyebɛɛl, ta Ɓeela masagi (taai naa laa ɠa ga ɓalaa Sɔwaal).
3 Naati kpein ti ɠaalɛɛni ba Sidime nɛmɛ wolai zu, nii maaɓɔɔlegai za ga Kpoloɗɛ Wanai.
4 Kona puugɔ maazu felegɔ (12) laawu, ti ɠoloa ɠɛni de Kedɔɔl-Lawɔmɛɛl ʋɛ, kɛlɛ kona puugɔ maazu zaʋasiɛi (13) ma, ti ɓakani.
5 Kona puugɔ maazu naanisiɛi (14) ma, Kedɔɔl-Lawɔmɛɛl ta masagiti ti ɠɛni polu, ti ʋaani, ti zobo sɔlɔɔ Leefa mavofodaiti ma Asetelɔte-Kaalenayime, ta Zuze mavofodaiti ti Ɠame, ta Eme mavofodaiti ti Savee-Kiliyatayime,
6 ta Ɠɔɔl nuiti ti ta-ɠizeiti su Seyiil, eyɛsu é zeeli Palan sɛne guluiti pɔ bɛ, nii é teʋebai ɠobaʋɛ.
7 Naa ʋolu, ti ɠaleni ma, ti li En-Misepate, nii é ga Kadɛse, ti zobo sɔlɔɔni Amalɛke nuiti ma, ta-yooi ná pɛ su, é ʋɛɛ Amɔɔl nuiti ba, ti ɠɛni zeini Ɠasason-Tamaal.
8 Názuʋɛ ɠa Sɔdɔme masagi, ta Gɔmɔɔl masagi, ta Adema masagi, ta Seɓɔyime masagi, ta Ɓeela masagi nii é ga Sɔwaal, naati ti kɔɔi ɠɛʋele ɓɛtɛni la ti laalɔɠɔma Sidime nɛmɛ wolai zu.
9 Elame masagi Kedɔɔl-Lawɔmɛɛl, ta Gɔyime masagi Tideyale, ta Sineyaal masagi Amelafɛle, ta Elazaal masagi Aliyɔke, ti ɠɛni ga masa naanigɔ, dɔɔlugɔi laalɔɠɔma.
10 Mana zeɠei wola mɔinni Sidime nɛmɛi zu, Sɔdɔme masagi ta Gɔmɔɔl ʋele geleiti ti ɠɛni ʋelazu, ti ɗa li, ti ɗa loo zeɠei naati su. Mɔtaiti ti ʋelani, ti li gizei ma.
11 Niiti ti zobogi zɔlɔɔni, naati ka ti Sɔdɔme ta Gɔmɔɔl naavoloiti kpein seɠeni, ta daamiani makɛgaiti, naa ʋolu ti li.
12 Ti Aɓalame deɠe loin Lɔte ta kɔligiti soni, ti li ga tiye, mazɔlɔɔ Lɔte ɠɛni zeini Sɔdɔme.
13 Pela nu ɠila ge ʋaani, é daazeeli Eɓulu nui Aɓalame ma, nii é ɠɛni zeini Amɔɔl nui Mamelee ná-sɛne guluiti saama. Mamelee ɠɛni ga Esekɔleni ta Anɛɛl ti-ɠɛɛloin, niiti ti minazeɠeni Aɓalame ʋɛ.
14 Aɓalame mɛnigai ma ga deɠe loin zogɛ, é ná-botiɠɛ nu unsaʋagɔ nu puugɔ maazu lɔsaʋa (318) maaɠilini, niiti ti zuzeeliai kɔɔɠɔ vai ma, ti zɔlɔɔgai ná-pɛlɛi wu, naati ti ʋilɛni masagiti polu, eyɛsu ti zeeli Dan.
15 É ná-botiɠɛ nuiti balini su, é sili nuiti so kpidii. É zobo sɔlɔɔni ti ma, é yɛ ti ʋolu, ti zeeli Ɠɔɓa, nii é Damase ɠɔʋɛzu ʋelei.
16 É ɠaleni ma ga kɔɔzoganiiti kpein. É ɠaleni ma ɓalaa ga deɠe loin Lɔte, ta zeaɠɔligiti, ta anzanuiti ɓalaa, ta kɔɔ luɔiti.
17 Naa ʋoluma, Aɓalame ɠaleni ma, é zobogi zɔlɔɔgai ma Kedɔɔl-Lawɔmɛɛl ma, ta masagiti ti ɠɛni polu. Sɔdɔme masagi ɠulani, é daaɠomi Savee nɛmɛi zu, nii é ga Masa Nɛmɛi.
18 Mɛlekizeedɛke, Salɛme masagi ʋaani ga ɓului ta dɔɔi. É ɠɛni ga GALA nii é Anii-Pɛ-Unda, naa ná-zalaɠa ɠula nui.
19 É tuya looni Aɓalame ʋɛ, é ɠɛ ma: «GALA ge tuya loo Aɓalame ʋɛ, GALAGI nii é Anii-Pɛ-Unda, é geeɠɔlɔgi ta zooi ɓɛtɛai!
20 Mamagi ɠa GALA bɛ, nii é Anii-Pɛ-Unda, nii é vaa bu, è zobogi zɔlɔɔ è zili nuiti ma!» Aɓalame kɔɔzoganiiti pɛ ma ʋuusiɛi veeni zea.
21 Sɔdɔme masagi ɠɛni Aɓalame ma: «Nuiti fe zèa, è naavoloiti ta sɔɔlaiti seɠe ʋɛ.»
22 Aɓalame ɠɛni Sɔdɔme masagi ma: «Gè ɠonaa Ɠɔoɠɔ GALAGI ma, nii é Anii-Pɛ-Unda, é geeɠɔlɔgi ta zooi ɓɛtɛai,
23 nii dɔin é ga ɗɔnɔi, gè la ani nɔpɛ seɠea naa ʋa, anɛɛ geze ɠaali ɠilagi ɓaa saʋala galu ɠilagi, naa ɠa a kɛ è mina ɠɛ ma: ‹Gè Aɓalame ɠɛɛʋɛ ga kpɛtɛ nu.›
24 Gè la ani nɔpɛ makɛsu nà ɓɔɠɔi bɛ̀, kɛni niigi zunu loungoiti ti miai, ta zunui naati tɔnɔi, niiti gi ɠɛa siɛi zu, Anɛɛl ta Esekɔle ta Mamelee, naati ta tɔnɔ zeɠe.»