25
Aɓalaame zaa vai
ta mavofodai é sɔlɔɔni Ketula ʋa
(1 Dɔlɔ Sɛʋɛi 1:32-33)
1 Aɓalaame anzai ta zeɠeni mɔnɔ, nii daaseigi ɠɛni ga Ketula.
2 Dointi é ti zɔlɔɔni bɛ ti-laaseigiti ti ɠɛni ga: Zimelan, Yɔkesan, Medan, Madiyan, Yiseɓake, ta Sua.
3 Yɔkesan Saɓa ta Dedanni sɔlɔɔni. Dedan mavofodaiti ti ɠɛni ga: Asuul nuiti, Letuse nuiti, ta Leyume nuiti.
4 Madiyan mavofodaiti ti ɠɛni ga: Efa, Efɛɛl, Ɠeenɔke, Aɓida, ta Eledaa. Niima nuiti pɛ ti ɠɛni ga Ketula mavofodaiti.
5 Aɓalaame yeaɠɔligiti kpein feeni Izaake ya.
6 Anza ɠiligiti niiti ti la ɠɛni vuluni ga zɔiti kɛʋele, é vebɛaniiti feeni ti-loun zunuiti bɛ. Kɛai ma vulua dɛ, é ti leʋeni folo ɠulazu ʋelei, é ti maaɠooza ná-doun zunui Izaake ʋa.
7 Aɓalaame zii ma voloi kpein ge ɠɛni ga kona ungila kona ʋuulɔfela maazu lɔɔlu (175).
8 Aɓalaame yii looni, é zaani pɔlɔzaɠaga ʋoluma undaanɛɛi zu, é lɛbini gola sii zuɠooza, naa ʋolu é liini mɛmɛwolani pɔ, ti zaai.
9 Ná-doun zunuiti Izaake ta Isemayɛle ti maaɠuluni Makepeela ʋugi zu, Efelon ná-kpalagi zu, Ɠɛte nui Sɔɠaal ná-doun zunui, Mamelee letemaʋɛ.
10 Naama ɓalagi ɠa Aɓalaame geyani Ɠɛte nuiti ma. Miná ɠa Aɓalaameni ta anzai Sala ti maaɠuluni ná.
11 Aɓalaame zaa ʋoluma, GALA ge tuya looni ná-doun zunui Izaake ʋɛ, é ɠɛni zeini Laɠayi-Lɔyi ɠɔlɔyeɠei ɠobaʋɛ.
Isemayɛle mavofodai
(1 Dɔlɔ Sɛʋɛi 1:28-31)
12 Aɓalaame ná-doun zunui Isemayɛle mavofodai ɠaa, tɔ ɠa Agaal, Ezipete anzanui é ga Sala ná-duɔ anzanui sɔlɔɔni Aɓalaame ʋɛ.
13 Isemayɛle ná-doun zunuiti daaseigiti kaa, eɠɛʋelei ti-mavofodaiti ti la: Neɓayɔte, Isemayɛle ná-doun zunu mɔungi, ta Keedaal, Adeɓeyɛle, Miɓesame,
14 Misema, Duma, Masa,
15 Ɠadade, Teema, Yetuul, Nafise, ta Keedema.
16 Isemayɛle ná-doun zunuiti ta ti-laaseigiti kana, eɠɛʋelei ta-ɠwɛpelegiti ta ti ʋuu ʋeleiti ti la. Kundiɠi puugɔ maazu felegɔiti (12) kaa, ti ɠɛni ta-nuɓusɛiti unda.
17 Isemayɛle zii ma voloi kpein ge ɠɛni ga kona ungila puusaʋagɔ maazu lɔfela (137). Zii looni, é za, é li mɛmɛwolani pɔ ti zaai.
18 Isemayɛle mavofodaiti ti zeini, é zo Ɠavila, eyɛsu é zeeli Suul, Ezipete yooi letema ʋelei, nu ɗa ɠɛna lia ga Asiili ʋele. Ti zeɠeni ti-ɠɛɛlointi pɛ ba, ti zei yɛ.
ZAKƆƁE NÁ-FAI
(25:19--36:43)
Izaake mavofodai
19 Aɓalaame ná-doun zunui Izaake mavofodai ɠaa: Izaake kɛɛɠɛ ɠɛni ga Aɓalaame.
20 Izaake ná-konagi ɠɛni ga puunaanigɔ (40), siɛgi zu é Laɓan baazeelai Eleɓɛka zeɠeni la ga anzai, Alame nui Ɓetuwɛle ná-doun anzanui, nii é Padan-Alame.
21 Izaake Ɠɔoɠɔ GALAGI maanɛɛnɛni anzai ná-faa zu, mazɔlɔɔ é ɠɛni ga doun zɔlɔɔtala nu. Ɠɔoɠɔ GALAGI gooɠaaʋoteni, anzai Eleɓɛka kogi zeɠeni.
22 Dointi ti ɠɛni ziɠazu ɓɔɠɔ ʋa koozu, é ɠɛni ma: «Leeni ɠa é ɠɛɛzu ga ze?» É liini, é Ɠɔoɠɔ GALAGI ɠaazaɠa.
23 Ɠɔoɠɔ GALAGI ɠɛni ma:
«Zii felegɔ ɠa é è ɠoozu,
nuɓusɛiti ma zii felegɔ ɠa ɠaaɠwɛɛzu,
ta ɠɛna zɔlɔɔga, ti ɠula è ɠoozu.
Gilagi zɛbɛi ɠa wɔɔlɔ é leʋe zɔi ʋa,
nu ɠitei ɠa lɔ loungoi yeezu.»
24 Doun zɔlɔɔ foloi zeeliai ma, ti kaani ga yoogiti ka ti ɠɛni koozu.
25 Ma mɔungi é ʋaani, maaɓɔikpɔini, deɠai ɠɛ ma eɠɛ sua ɠɔlɔ. Ti daaseigi ʋɛɛni ga Ezawu.
26 Naa ʋoluma, deɠei zɔlɔɔni, zeei Ezawu ɠɔɠɔ libiligi zogai. Ti daaseigi ʋɛɛni ga Zakɔɓe. Kona ʋuulɔzita (60) ɠa Izaake kɛɛni kpein, ti zɔlɔɔ siɛgi zu.
Ezawu doun mɔun tosuʋɛ ʋɔdi vai
Zakɔɓe ma
27 Doun zunu felegɔi niiti ti kulasui woni. Ezawu ɠɛni ga dosoi zeeletegai, ta dɔɓɔ ziɛ nui, kɛlɛ Zakɔɓe ɠɛni ga zunui ná-fai ɠaalɛiɗai, é nɛɛni bɛ ga é yɛ nɔ seɠe ɠotaiti bu.
28 Izaake Ezawu nɛɛni ʋɛ, tɔɔzei dɔɓɔ zuai nɛɛni bɛ. Kɛlɛ Eleɓɛka Zakɔɓe nɛɛni ʋɛ.
29 Foloi ta, Zakɔɓe ɠɛai ma tɔɠɔi ɓɔlɔzu, Ezawu zeɠeni dɔɓɔi zu, gola ɓɔlɔai.
30 Ezawu ɠɛni Zakɔɓe ma: «Tɔɠɔ ɓɔi kpɔlɔi nii ta ve zèa, gè mi, mazɔlɔɔ kpɔ̀lɔʋɛ gola.» Naa ɠa é kɛɛni ti Edɔme laaseigi ʋɛɛni la Ezawu ʋa.
31 Zakɔɓe gooɠaaʋoteni, é ɠɛ ma: «Ɗa-loun mɔun tosuʋɛ ʋɔdi mà dɛ.»
32 Ezawu ɠɛni ma: «Wɛlɛ, nà ga ʋa zaazu ga pului, naama loun mɔun tosuʋɛ ɠa leeni ɠɛ bɛ̀?»
33 Zakɔɓe ɠɛni ma: «Ɠonana dɛ bɛ̀.» Ezawu ɠonani bɛ, é ná-doun mɔun tosuʋɛ ʋɔdi Zakɔɓe ma.
34 Názu ɠa Zakɔɓe ɓului ta tɔɠɔ ɓɔlɔiti feeni la Ezawu ya. É daamii woni, é ɓɔɔle. Naa ʋolu é wuzeɠeni, é li. Zekana Ezawu doun mɔun tosuʋɛ ʋɛlɛʋɛlɛni da.