3
Nui loo vai kotoi zu
1 Kaalii ɠeleɠelega ɠɛni de, é leʋe dɔɓɔ zuaiti kpein ba, niiti Ɠɔoɠɔ GALAGI ti ɓɛtɛni. É ɠɛni anzanui ma: «GALA ge bogɛ nɛi ga ɠite, ga wo mina guluiti kpein ma waai mi, niiti ti kpelei zu?»
2 Anzanui kaalii wooɠaaʋoteni, é ɠɛ ma: «Gá zoo gi kpelei zu wuluiti ma waai mi.
3 Kɛlɛ nii é ga gului é loni kpelei zaamaʋɛ, naa ma waai, GALA ge ɠɛni ma: ‹À mina ta mi, wo mina vɔɔɠu ba, naa ɠa a kɛ wo mina za.› »
4 Kaalii ɠɛni anzanui ma: «Wo la zaa ɲɛgɛlɛin!
5 Kɛlɛ GALA ge kwɛɛ ga foloi nɔpɛ wo ta miizu la, wo-ɠaazuʋɛti ta zeɠe ma, wa ɠɛ eɠɛ GALA, wa faa ʋagɔi ta faa ɲɔi yɔɠɔzuɠwɛɛ.»
6 Anzanui kaani ga gului naa ma waaiti pɛtɛ ga maanɛɛʋɛ, ta pagɛ ga nu mi, fizɔgɛ ga é keleɠelegi ve nu ya. É ma waai ta ɠulani, é mi. Naa ʋolu é ta veeni sinigi ya, nii é ɠɛni koba, naa ɓalaa ge miini.
7 Ti felegɔ ti-ɠaazuʋɛti ti zeɠeni ma. Ti kwɛɛni ga ti ɠabei ʋe. Ti kooleɠoole gului ma laaiti daɠani, ti gili ɓɔɠɔ ma.
8 Kpɔkɔ lɛilɛigi, ti Ɠɔoɠɔ GALAGI lugi mɛnini, é ɗa ziɛziɛ kpelei zu. Zunui ta anzai ti lɔɔɠuni poun Ɠɔoɠɔ GALAGI ʋa kpele zu wuluiti saama.
9 Ɠɔoɠɔ GALAGI zunui lolini, é ɠɛ ma: «Mini ɠa è ná?»
10 É gooɠaaʋoteni, é ɠɛ ma: «Gè è-lugi mɛnigɛ kpelei zu. Dùaʋɛ, mazɔlɔɔ kàbei ʋe, naa ɠa é kɛa gè lɔɔɠua.»
11 Ɠɔoɠɔ GALAGI ɠɛni ma: «Ɓɛ ɠa kɛai è ma, è ɠabei ʋe? È gulu waai naa ta mia ɓaa, nii gè ɠɛni è ma, mina ta mi?»
12 Zunui gooɠaaʋoteni, é ɠɛ ma: «Anzanui nii è fea zèa, ga gi eteai ziɛ ʋɔɔma, naa ɠa é gulu waai vea zèa, gè ta mi.»
13 Ɠɔoɠɔ GALAGI ɠɛni anzanui ma: «Leeni vaa zu è naa ɠɛai?» É gooɠaaʋoteni, é ɠɛ ma: «Kaalii ɠa é yàava, gè gulu waai ta mi.»
14 Ɠɔoɠɔ GALAGI ɠɛni kaalii ma:
«Tɛi è naa ɠɛa, gè è ɠotoa,
toganiiti kpein ta dɔɓɔ zuaiti saama.
Ɗa ɗa ɓokpo è-ɠogi ma,
è ɗa pɔlɔi mi, è-zii ma voloi pɛ su.
15 Nà kpaai lɔ wo yɔɠɔzu wa anzanui,
naa ɠa ɠɛ mavofodai ta ɗɔnɔi ti zɔɠɔzu.
Nɔnɔi ɠa ɗɔungi maawana,
ɗɔun ɗa kɔɠɔ libiligi maawana.»
16 É ɠɛni anzanui ma:
«Nà ta la ɗa-ɓɔlɔi ma, kogi a ɠɛna è ma,
ɗa ɓɔlɔ pɛ, ɗa ʋa dointi sɔlɔɔ.
È yiima vai ɠa è mɛɛn è-zinigi ʋɔ pelei,
toɠa zei è unda.»
17 É ɠɛni zunui ma:
«Tɛi è woiloga è-anzai wooi ma,
è gulu waai mi, nii gè ɠɛni è mina mi,
zooi ɠa ɠoto è maaʋele ma.
Kɛni è zuvikɛi ɠula, è ɓɔlɔ pɛ,
é ʋa leɠa è-laamianigi zɔlɔɔ, è-zii ma voloi pɛ su.
18 Toɠa ɠaingiti pɔnɔ è laalɔɠɔma.
Ɗa zooi ɠa lufaiti miizu.
19 Ɗa è-laamianigi zɔlɔɔ,
kɛlɛ kɛni fɔdɔi ɠula è-loʋalaʋɛ,
eyɛsu è ɠale ma zooi wu,
ʋɛ è zeɠeni ná.
Mazɔlɔɔ è ɓɛtɛʋɛ ga pɔlɔi,
ɗa ɠale ma pɔlɔi zu.»
20 Adama anzai laasei pɛɛni ga Ɛve, mazɔlɔɔ toɠa é ɠɛni ga nu vuluiti kpein ti-lee.
21 Ɠɔoɠɔ GALAGI sua ɠɔlɔi ɓɛtɛni ga seɠei Adama ta anzai ʋɛ, é too ti ɠɔba.
22 Ɠɔoɠɔ GALAGI ɠɛni ma: «Pɛtɛ, zunui ɠɛa eɠɛ ade taɠila, faa ʋagɔi ta faa ɲɔi yɔɠɔzuɠwɛɛ fai zu. Ade pele leʋe tuɠɔ niina, é mina yeemaale, é ʋa zɛnvu wului ma waai ɠula, a ʋa mi, a ʋa yɛ vulua ɠɔoɠɔ.»
23 Ɠɔoɠɔ GALAGI zunui ɠulani Edɛn kpelei ʋa, ga é ɗa zooi woli, ʋɛ kulaai ná.
24 É Adama ɓɛai ma, geezuɠeelaiti ti-laaseigi ga seeluɓɛin, é naati toni Edɛn kpelei zu folo ɠulazu ʋelei, ta boɠa zɔkpɔi nii abui ba, é ɗa lati, ti ɗa zɛnvu wului ma ʋelei makɛ.