4
Nu ziɛ ʋelei nii nɛai GALA bɛ
1 Kɛ̀ɛleaiti, gaaɓelagi ɠa ga: Ʋelei wa ziɛ la wo GALA ɛnɛkɛ, wo naa ɠalani gi ya. Tama, ʋele ɠana wo ziɛzu la niina. Kɛlɛ niizu gá bosu wo ma, gi wo maanɛɛnɛ Maliɠii Yesu laaseigi zu: À kɛ ga pagɔ, wo ɗa li luɠɔma.
2 Tama wo suɠwɛɛ ʋelei gi wo ɠalani da, é ɠula Maliɠii Yesu ya.
3 Nii GALA ge pɔ wa-vaa zu, tɔ ɠa ga wa-ɲade fai: Wo mina ɓɔɠɔ lɔ koloɠologi zu,
4 ɛsɛ ge zoo è-ɓusɛi zo ga pagɔ, é eteai ziɛ ɲadedai zu, ta unfemai,
5 wo mina ɓɔɠɔ lɔ gaazuɠulapɔ ɲɔi zu, eɠɛʋelei GALA kwɛɛtala nuiti ti kɛɛzu la zii ɠiligiti saama.
6 Nu nɔpɛ ge mina kakama vaa ɠɛ ga kɛɛɠɛloin, ɓaa yaava vai. Maliɠii ɠa naama vaiti pɛ ma lukpɔi ɠaaleʋe. Gi naa woni wo ma, gi maaɓakpa.
7 Mazɔlɔɔ GALA ge la ade lolini kɔzɔba vaa ma, kɛlɛ kɛni ɲadedai.
8 Naa ɠa é ba, zɔi nɔpɛ a ɠɛlɛ kalagi nii ʋa, nu laade é ʋa ɠɛ ɠɛlɛzu gooi ʋa, GALA ka é ɠɛlɛzu ba, nii é ná-Zɛnvu Ɲadegai veezu wo ya.
9 Wo ɓɛdɛ la ba ga nu sɛʋɛ ɠɛ wo ma, é lo kidaaleʋe nuiti wo yɔɠɔzu nɛɛbɛi ʋa, mazɔlɔɔ wo naama ɠalagi zɔlɔɔgɛ GALA zea, ʋelei wa ɓɔɠɔ nɛɛ la ʋɛ wo ɠilagilagiti.
10 Tama, ʋele ɠana wo ziɛzu la ɠɛɛɠɛlointi pɛ bɛ Masedoane yooi kpein su. Kɛlɛ kɛ̀ɛleaiti, gá wo lɛnɛsu, wo li luɠɔma mɔnɔ naazu.
11 À ɠaaɓa, wo eteai ziɛ ziilɛigi zu, wo ɠaaɓa wo ɓɔɠɔ vaiti ma, wo boti ɠɛ ga wo-yeeiti, eɠɛʋelei gi wo ɠalani da,
12 naa ɠa a kɛ wo ziɛ ga pagɔ ladalai zu kamaʋolu nuiti tetegi, wo mina ɠɛ nu nɔpɛ unma ga kasɔ.
Gɔvɛiti buzeɠe vai
13 Kɛ̀ɛleaiti, gi la pɔ gi ʋa wo yɛ kpidii zu, naati ta-vaa zu niiti ti zaazu, naa ɠa a kɛ wo-yii mina ɓɔlɔ ga nui mɔtaiti kɛʋele, niiti kito ge la ti ʋɛ.
14 Ade laaʋɛ da ga Yesu zaani, é wuzeɠe, é ɠula saai ya. Ade laaʋɛ da ɓalaa ga niiti ti ɠidaaleʋeai Yesu ma eyɛsu ti za, GALA ka naati buzeɠe, é ti ɠula saai ya, é ʋa ga tiye Yesu ʋɔ.
15 Wɛlɛ, nii ɠa gi dɛɛzu ga woye, eɠɛʋelei Maliɠii laawooi bosu la: Adɛiti da yɛ vulua Maliɠii ʋa voloi, de la lia naati tuɠɔ pɛ, zɔiti ti zaai.
16 Mazɔlɔɔ deve wooi ɠa mɛni, geezuɠeela ɠundiɠii woo ɠa mɛni, ta GALA ná-puʋugi wooi, ta Maliɠii ɓɔɠɔi ɠa yei, é zeɠe geezuʋɛ. Niiti ti ɠiliai yɛgai Kilista ʋa eyɛsu ti za, naati ta wuzeɠe mɔunpa, ti ɠula saai ya.
17 Naa ʋoluma, adɛiti da yɛ vulua naama voloi, da ɓɔ ti ʋa, ade lɛ tonaɓiingiti su, ga de Maliɠii laaɠomi fiilɛi zu, ta da yɛ niina Maliɠii ʋa ɠɔoɠɔ.
18 À ɓɔɠɔ iɲɔdɔ ga niima wooiti, wo ɠilagilagiti pɛ.