Pɔle Ná-Sɛʋɛi Velesiɛi
É Teʋeni
Tesalonike Nuiti Ma
Sɛʋɛi lɔɔzeizuʋɛ ma woo mɔungiti
Keelai Pɔle é Tesalonike nuiti ta-zɛʋɛi velesiɛi ɠɛai (1:1). É Tesalonike nuiti ta-zɛʋɛ mɔungi ɠɛɛni, su la ɠoozani é felesiɛi nii ɠɛ, kona ʋuulɔɔlugɔ maazu ɠila (51) kɛɠala leʋegai ma, Kilista zɔlɔɔga ʋoluma. Pɔle ɠɛni dɛ Kolɛnte siɛgi zu é niima zɛʋɛi ɠɛa la, é teʋe Tesalonike Egilisii ma, Egilisii nii é daaɠulani ná-keela ziɛi velesiɛi zu (KKw 17:1-10). Bogɛ Keelaiti Kɛɛwotiiti ma zɛʋɛi zu ga Egilisii naa zu nuiti ti ɠɛni ga Zuifui tanigaani ta Gɛlɛkii ma mɔinmɔin.
Kɛɛʋɛ eɠɛ Tesalonike Egilisii wola ɠilini yeeɠɛɠala ɠaaɓelagiti ta-vai ʋa ta Kilista ʋaa laa velesiɛi, tɔɔzei Pɔle faa mɔinmɔin sɛʋɛʋɛ é lo naama vai ʋa ná-sɛʋɛiti su ti leʋegai Tesalonike nuiti ma. Tesalonike nuiti ta-zɛʋɛi velesiɛi ɠilazuʋɛ kpein ka ɓɔɛzu é lo yeeɠɛɠala ɠaaɓelagi ʋa. Pɔle ti wola lɛnɛni é lo faaʋaalalai ʋa. Nui ɠilagilagi pɛ maanɛɛʋɛ é botii ɠɛ kɔnɔgi zɔlɔɔ fai zu (3:6-10).
Unsosuʋɛ
1. Pɔle tɔɔzeiʋɛ ga é ɓɔɠɔ lɛɛ, naa ʋoluma é siɛɲɔɠɔiti ɓalaa dɛɛ (1:1-2).
2. É zɛba é GALA mama ta é GALA fali Tesalonike Egilisii ʋɛ (1:3-12).
3. Gaaɠwɛsu felegɔi zu, Pɔle ɠa ɓɔɛzu miná é lo yeeɠɛɠala ɠaaɓelagiti ba (2:1-17).
4. Kpɔɛʋɛ naa ʋolu, é lo faaʋaalalai ʋa, ta ʋelei fizɔgai la nu botii ɠɛ (3:1-15).
5. Pɔle gaaɓelagɛ ga é ná-tuʋɔ gooi laazeeli Egilisii ma (3:16-18).
1
Tuʋɔ gooiti
1 Nɛ̀i gè ga Pɔle, gá Silase, naa ʋɛɛ Timɔte ʋa, gá wo luʋɔsu, wɔi wo Egilisii zu Tesalonike taazuʋɛ, wo ga Ɠɛɛɠɛ GALA ta Maliɠii Yesu Kilista nɔnɔiti.
2 Ɠɛɛɠɛ GALA ta Maliɠii Yesu Kilista ti zaalai la wo ma, ti ziilɛigi ve wo ʋɛ.
Tukpɔɠaaleʋe vai Kilista ʋa voloi ʋolu
3 Kɛ̀ɛleaiti, gi maanɛɛʋɛ gi mamagi ve GALA bɛ yeenɔpɛ wa-vaa zu, gaamazu naa zɔlegɛ, mazɔlɔɔ wa-ɠidaaleʋei ɠa liizu luɠɔma gola, nɛɛbɛi é wo yɔɠɔzu, naa ɠa liizu ga wɔɔlɔa.
4 Gá unbuzeɠei lɛɛzu wa-vaa zu GALA ná-Egilisiiti su, tɔɔzei ʋelei wo loni la kpaan, ta ʋelei wa-ɠidaaleʋei la wɔinzeɠemaiti ta kpɔlɔiti pɛ saama wo sɔlɔɔsu.
5 Kpɔlɔi nii ɠa é ga GALA ná-telebo tukpɔɠaaleʋei ma ʋoogi, naa ɠa é dɛɛzu ga wa zoloo GALA ná-masadai zɔlɔɔ fai ma, nii wo kpɔlɔi zɔlɔɔsu maaʋele ma.
6 Soloogɛ ga GALA ge kpɔlɔi zei naati zea, niiti ti wo ɓɔlɔ vai laazu wo ya.
7 Wɔiti wo kpɔlɔi zu, GALA ge dooɠogi ve wo ya, ta gá ɓɔɠɔi gi ya, siɛgi zu Maliɠii Yesu ɠulazu la kɛlɛma, é zeɠe geeɠɔlɔgi zu, ta ná-geezuɠeelaiti, zɛbɛ wolai ti ya.
8 Toɠa ʋa abuzogi zaama, ga é naati sala, niiti ti la GALA kwɛɛ, ti la ɠolozu Woo Niinɛ Ʋagɔi ʋɛ, é ʋilɛ de-Maliɠii Yesu ʋa.
9 Ta ti-zalai zɔlɔɔ ga ɠɔoɠɔ undaaʋiligi, ti maaɠooza, ti zeɠe Maliɠii ɠaazu, ti maaɠooza ná-zobogi ma lɛbiyai ʋa,
10 siɛgi zu é ʋaazu la naama voloi, ga é lɛbiyai zɔlɔɔ ná-nuiti zea, niiti ta ɠidaaleʋe ma. Wa ɠɛ naati saama niiti ta maawui, tɔɔzei wo ɠidaaleʋeni gá-zeele wooi ma, gi boni wo ma.
11 Naa ɠa é ba, gá GALA falizu wo ʋɛ yeenɔpɛ, nii a kɛ ada-ƓALAGI wo ɠɛʋele ɓɛtɛ, wo zoloo toligi ma, é bogai ga woye. Gá falizu ná-zɛbɛi zu, ga faa ʋagɔi nii pɛ wo wɔinɗai ga wo kɛ, é naa laazeeli wo ʋɛ ga pagɔ, é wa-ɠidaaleʋei ma ɠɛɛwotii ɠaavɔni,
12 naa ɠa a kɛ Maliɠii Yesu laaseigi lɛbiyai zɔlɔɔ wo maaʋele ma, wa ɓalaa wo lɛbiyai zɔlɔɔ tɔun maaʋele ma, eɠɛʋelei da-ƓALAGI ná-zaalai la, ta de-Maliɠii Yesu Kilista.