☰ Azee 1
Azee
Ná-Sɛʋɛi
Wooi lɔɔzeigi
Niima zɛʋɛi ɠa GALA goo wo nui Azee losuʋɛ lɛɛzu GALA sei ʋɛlɛi lo fai zu Zeeluzalɛme, Zuifuiti galegai ma ma ti ɠula duɔlai zu Ɓaɓilɔne, ʋɛ ti ɠɛni ná kona undɔzitai (600) lɔɔzeizuʋɛ. É woo mɔinmɔin feeʋɛ ade ya, niiti GALA ge ti woni kona undɔɔlugɔ puufelegɔ (520) ma, aisa Yesu Kilista ʋa zɔlɔɔ.
Zuifui mɔungiti ti ʋaani ti ɠula duɔlai zu, kona undɔɔlugɔ puusaʋagɔ maazu lɔsaʋai (538) ma, aisa Yesu Kilista ʋa zɔlɔɔ, naati ka ti maanɛɛni ti GALA sei ʋɛlɛi lo ʋolu nii Ɓaɓilɔne nuiti ti goloni kona undɔɔlugɔ puulɔsaʋa maazu lɔfelai (587) ma, ti iɲɔ ge leʋeni fala. Naa ɠa é kɛɛni GALA ná-keelai nuɓusɛiti ta-ɠundiɠiiti maanɛɛnɛzu ga ti botii lɔɔzei ʋolu. Naama wotii lɔɔzei ʋolu kona undɔɔlugɔ puufelegɔi (520) ma. Azee ɠa naati iɲɔdɔɔzu zɔiti pɛ ti woilosu gooi ma, ga nuɓusɛiti ta-ʋaladai, ta aniiti kpɛtɛlalai, naa lɔɔzeiʋɛ GALA sei ʋɛlɛi koloɠologai, é yɛ ná nɔ (1:1-14), é boni ti ma ga, GALA sei ʋɛlɛ niinɛi ná-pagi ta ná-lɛbiyai ɠa ɓudɛzu zɔi nɔnɔi maazu nii é woloni (2:1-9), naa lo fai ɠa ɠɛ ga zaɓu, kɔzɔba vai ɓe, ta baladai nii GALA ná-nuɓusɛiti ti saama (2:10-20). Zɔlɔɓaɓɛle zou zɛʋɛ ɠundiɠii, Davide mavofodai, GALA ge minazeɠe gola ɠɛɛni naa ʋɛ, ʋelela ʋelei ma vaa zu (2:20-23).
GALA sei ʋɛlɛi ma maaɓɔungi, ɠa ʋa, lɛbiyai ɠɛ bɛ, é leʋe ma mɔungi ʋa, é zɔlɔɔsu GALA zea, ga ná-botiɠɛ nui maaʋele, é yiimazeɠezu la, naa ɠa é ʋaazu Izelayɛle nuɓusɛiti kɛʋelei lɛɛzu ti ɠula ʋoluma duɔlai zu. Azee ná-tɛnɛ gooiti maaʋele ma, é iɲɔdɔɔ veeni ná-yeeɠɛɠalai zu nuɓusɛiti bɛ, ti ɠula iɲɔteʋei zu, ti ɓɔɠɔ ve botii ya, tɔɔzei faa niinɛiti ba GALA ge kpɛtɛzu.
1
GALA sei ʋɛlɛi lo fai ʋolu ma yeeɠɛɠalai
1 Masagi Daliyuse ná-masadai ma ɠona felesiɛi ma alu dɔzitasiɛi ma volo mɔungi ma, Ɠɔoɠɔ GALAGI ɓɔɛni GALA goo wo nui Azee ʋɔ, ga é daazeeli Zuda you zɛʋɛ ɠundiɠii Zɔlɔɓaɓɛle ma, Seyaletiyɛle ná-doun zunui, ta zalaɠa ɠula ɠundiɠi wolai Zozuwe ma, Yewɔsadake ná-doun zunui, é ɠɛ ti ma: 2 Ɠɔoɠɔ GALAGI Fai-Pɛ-Maliɠii wooi ɠaa: «Niima nuiti ta ɠɛɛzu ma: ‹Yeeɠɛɠalai la dɛ zeelini, ga Ɠɔoɠɔ GALAGI zei ʋɛlɛi ʋa lo ʋolu.› »
3 Ɠɔoɠɔ GALAGI laawooi laazeelini ti ma, GALA goo wo nui Azee ya, é ɠɛ ti ma: 4 «Yeeɠɛɠalai ɠa nɛi wo ʋɛ ɓaa, wo zei wa-ʋɛlɛ ʋagɔiti bu, ti maanɛai, tama GALA sei ʋɛlɛi ɠoloɠologai?»
5 Naa ɠa é ba, Ɠɔoɠɔ GALAGI Fai-Pɛ-Maliɠii wooi ɠaa: «À ɠida bu ga pagɔ, fai é laazu wo ma. 6 Wo ani mɔinmɔin fazaga, kɛlɛ tago nɔ ɠa wo sɔlɔɔsu, wa daami wosu, é la kula ɠɛɛzu ga woye, wa ɓɔɔlezu, kɛlɛ é la wo yiilɛizu, wa ɓɔɠɔ maaɠilizu, die ge la zeiɗa wo ma, botiɠɛ nui zalai ɠa ɠɛɛzu, eɠɛ a ɠɛ ʋuuzu ɓɔlɔ zaɠai zu.»
7 Ɠɔoɠɔ GALAGI Fai-Pɛ-Maliɠii wooi ɠaa: «À ɠida bu ga pagɔ, fai é laazu wo ma. 8 À lɛ gizeiti ma, wo ʋa ga guluiti, wo sèi ʋɛlɛi lo. Naazu kòozu ɠa nɛɛ miná, ná lɛbiyai zɔlɔɔ.» Ɠɔoɠɔ GALAGI ɠa é boga. 9 «Wo ɠigi loni ani mɔinmɔin ba, kɛlɛ tago nɔ ɠa wo sɔlɔɔni wa-ɓalagaʋɛti. Nágoi ɠa wo ʋaani la wa-ʋɛlɛiti bu, kɛlɛ gè laa viilɛi ʋuuni ma, gaaʋala ba. Leeni vaa zu?» Ɠɔoɠɔ GALAGI Fai-Pɛ-Maliɠii wooi ɠaa: «Tɔɔzei sèi ʋɛlɛi vai ʋa, koloɠologai, tama wo pɛ wa ɠaaɓaazu wa-ʋɛlɛiti nɔ ma. 10 Naa ɠa é kɛɛzu, geeɠɔlɔgi la kɛɛzu, é ʋa duɓui ve, zooi la vaazu bu, ani a ʋa ʋɔnɔ. 11 Nà ɠa gè fɔɔvɔgi maaloliga zooi ma, ta gizeiti ma, ta kpalagiti ma, ta leezɛn ɓeleiti, ta wolive ɓeleiti, ta ziinziin ganigiti kpein zooi ma, ta nuɓusɛiti ta suaiti pɛ, é ɠɔkula nuɓusɛiti ta-wotiiti pɛ ma.»
12 Zɔlɔɓaɓɛle, Seyaletiyɛle ná-doun zunui, ta zalaɠa ɠula ɠundiɠi wolai Zozuwe, Yewɔsadake ná-doun zunui, ta nuɓusɛi mɔtaiti pɛ, niiti ti ʋaani ti ɠula duɔlai zu, naati pɛ ti Ɠɔoɠɔ GALAGI, ta-ƓALAGI wooi zeɠeni ga gaamai, niigi GALA goo wo nui Azee boni ti ma. Keela wooi Ɠɔoɠɔ GALAGI ta-ƓALAGI feeni zea, é naa ɠaaɓelani ga pagɔ, nuɓusɛiti ti luani Ɠɔoɠɔ GALAGI ʋa. 13 Naa ʋoluma, Azee, Ɠɔoɠɔ GALAGI ná-keelai é teʋeni, é Ɠɔoɠɔ GALAGI wooi woni ti ma, é ɠɛ ti ma: «Nà ya, nà wo ʋa!» Ɠɔoɠɔ GALAGI wooi ɠana. 14 Ɠɔoɠɔ GALAGI zɛbɛ niinɛ veeni Zuda you zɛʋɛ ɠundiɠii Zɔlɔɓaɓɛle ʋɛ, Seyaletiyɛle ná-doun zunui, ta zalaɠa ɠula ɠundiɠi wolai Zozuwe ʋɛ, Yewɔsadake ná-doun zunui, ta nuɓusɛi mɔtaiti pɛ bɛ, niiti ti ʋaani ti ɠula duɔlai zu. Ti pɛ ti liini Ɠɔoɠɔ GALAGI Fai-Pɛ-Maliɠii zei ʋɛlɛi wu, ti botii lɔɔzei, 15 naa ɠɛɛni, masagi Daliyuse ná-konagi velesiɛi ma alu dɔzitasiɛi ma folo ʋuufelegɔ maazu naanigɔi (24) ma.
☰