Wozé
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Sɛʋɛi nii ɠa Wozé ná-eteai ta ná-kulakɛlɛmaiti suɠulazu. Wozé ɠɛni GALA gooi wosu Zuda masa naanigɔ ta Izilayɛle masa gila ta-ziɛgiti su (1:1). É GALA goo wo fai lɔɔzeini kona undɔfela puulɔɔlugɔi (750) ma ziɛgiti su, aisa Yesu Kilista ʋa zɔlɔɔ. Nu la kwɛɛ ni Wozé ɓɔɠɔ ɠa é ná-GALA gooiti puai sɛʋɛi nii zu, ɓaa nu ɠili ka é kɛai.
Masadai nii é ga lɛkpɛmaʋɛ nu ɠɔʋɛzu ʋelei, nii é ga Izilayɛle masadai, miná nu ɠɛni ga Wozé, GALA gooi bɔɔlɔzu é ɠɛni bosu, ti leʋega ɠɛni de Izilayɛle ma. GALA ge devei veeni Wozé ya ga é koloɠolo anzanui ta vulu, nii daaseigi ɠɛni ga Gomɛɛl (1:2). Ti doun saʋagɔ zɔlɔɔni, kɛlɛ Gomɛɛl ɠulani Wozé ya, é zei zunu ɠili bɛ. Naa ʋoluma Maliɠii devei veeni Wozé ya ga é Gomɛɛl nɛɛʋɛ nɔ, anɛɛ ni naa wɛɛnziɛgi ɠɛɛʋɛ (3:1). Ta-ʋɛlɛyeɠei ɠɛni ga poogi, nii é ɠɛni Izilayɛleni zɔɠɔzu vai lɛɛzu ta GALA. Anɛɛ ɓalaa Izilayɛle yaavai ɠɛa ga GALA, tɔɔzei dii vai ʋa, é ɗa kɔɔɠɔ ganigiti dɛbi, GALA ge yɛni ná-wooɠɛɠiladai ʋolu, ná-nɛɛbɛi é lo Izilayɛle ʋa, ta é minazeɠe ga toɠa ti ɠizosu. Wozé ná-GALA gooi ɠa GALA ná-nɛɛbɛ ma wooɠɛɠiladai ta ná-nuɓɔɠɔlai lɛɛzu.
Unsosuʋɛ
1. Wozé ná-eteai ta vului é ɠɛni ti yɔɠɔzu ta Gomɛɛl (1:1—3:5).
2. Izilayɛle ná-wooʋaladai ta GALA ná-wooɠɛɠiladai nɛɛbɛi zu (4:1—14:10).
1
1 Ɠɔoɠɔ GALAGI wooiti kaa, niiti é ti woni Ɓeyeli ná-doun zunui Wozé ma, siɛgi zu Zoase ná-doun zunui Zeloɓoame ɠɛni la ga Izilayɛle wolodama puugɔiti ta-masagi, ta Zuda masagi niiti ta-ɠona ɲɛkpɛiti daawu: Woziase, Yotame, Aɠaze, ta Ezekiase.
GALA ná-keela woo mɔungi
é boni Wozé ma
2 Ʋele ɠa Ɠɔoɠɔ GALAGI tɔɔzeini la ga ɓɔɛa Wozé ʋɔ, é ɗa bo ná-nuɓusɛiti ma. Ɠɔoɠɔ GALAGI ɠɛni Wozé ma: «Li, è koloɠolo anzanui gila seɠe, è sei, dointi è ʋaazu ti zɔlɔɔsu ba, naati ta ɠɛ ga koloɠologi zu lointi. Mazɔlɔɔ zooi zu nuɓusɛiti pɛ ti ɓɔɠɔ vea koloɠologi ya, ga ti ʋoluave fai Ɠɔoɠɔ GALAGI ʋa.»
3 Wozé liini naazu, é Diɓilayime ná-doun anzanui Gomɛɛl vulu. Naa kogi zeɠeni, é doun zunu zɔlɔɔ bɛ.
4 Ɠɔoɠɔ GALAGI ɠɛni Wozé ma: «Doungoi laasei pɛɛ ga Zizeleyɛle, mazɔlɔɔ su la mɔ ɠooza, gè wuzeɠe Zewu mavofodaiti daalɔɠɔma, tɔɔzei ɲamai naa ʋa puai Zizeleyɛle, gè Izilayɛle masa fai zeɠe ga.
5 Naama voloi, nà Izilayɛle ná-kɔɔɠɔ zobogi zuɠoloɠolo Zizeleyɛle nɛmɛi zu.»
6 Gomɛɛl kogi zeɠeni ʋolu, é anzanu loun zɔlɔɔ. Ɠɔoɠɔ GALAGI ɠɛ Wozé ma: «Daasei pɛɛ ga Lo-Luama, mazɔlɔɔ Izilayɛle ʋɛlɛyeɠei wɔin wola la mɔ mà, gè ʋa ɗa maavaayɛ nɔ ɠɔ.
7 Kɛlɛ nà-nɛɛbɛi la zeɠea Zuda ʋɛlɛyeɠei ʋa pɛ. Kɛlɛ nɛ̀i gè ga Ɠɔoɠɔ GALAGI ta-ƓALAGI, nà ti ɠizosu, gè la naa ɠɛa ga mɛɛin ɓaa boɠa zɔkpɔi, kɔɔi ɓaa kɔɔɠɔ zooiti taade, ɓaa kɔɔɠɔ zoo ɓizɛ nuiti.»
8 Gomɛɛl ná-doin Lo-Luama laaɠulaai ma ɲiimii ʋa, é kogi zeɠeni, é doun zunu zɔlɔɔ.
9 Ɠɔoɠɔ GALAGI ɠɛni Wozé ma: «Doin laasei pɛɛ ga Lo-Ami, mazɔlɔɔ Izilayɛle nuiti, wo la mɔ ga nà-nua, nà ɓalaa gè la mɔ ga ani nɔpɛ wo ʋɛ.»