11
Ɠɔoɠɔ GALAGI ná-nɛɛbɛi
1 «Gè Izilayɛle nɛɛni ʋɛ, kɛai ma dɛ ga doungoi,
gè dòun zunui lolini ga é ɠula Ezipete yooi ʋa.
2 Taɠiligaa ti tolini,
é maaɠooza bà naati maaʋele ma.
Ɓaalegiti ka Izilayɛle ɠɛni zalaɠai ɠulazu ti ʋɛ,
é ɗa ansansegiti gala kɔɔɠɔ ganigiti bɛ.
3 Tama, nà ɠa gè Efelayime maalɛlɛni ga siɛi, gè so zèei ʋa,
kɛlɛ é la buuɠwɛɛni ga gè ɠɛni ɓaazu maazu.
4 Nuɓusɛlai ma ɠalui ɠa gè mɛɛnga la,
ta nɛɛbɛ ɠɔlu yɔlɔɠɔiti.
Gè ɠɛni bɛ eɠɛ nui nii é doun ɓɔigi zeɠezu, é pɛɛ ɠoma,
gè ɠɛni kɔnɔgi lɔɔzu da.
5 Ti la mɔ ɠalega ma Ezipete yooi zu,
kɛlɛ tɛi ti la kɛɛni ti ʋa ɠale ma pɔ̀,
Asiili masagi ɠa niina é zeizu ti unda.
6 Naa ɠa é kɛɛzu boɠa zɔkpɔi latilatisu da ta-laa wolaiti su,
é ti-ʋoluzeizuʋɛti koloɠolo.
Toɠa ti mi ɲɛgɛlɛin, tɔɔzei ta-ɠisiɛiti ba.
7 Nà-nuɓusɛiti ti devea ga ti ʋoluave bà.
Ta ti lolisu ga ti ɠaaʋote naa ma,
nii é zeini anii pɛ unga,
kɛlɛ ti ɠila kpalaa ge la kɛɛzu é ʋa unbuzeɠe.
8 Ee, Efelayime! Nà zoo ɠale gè ɠɛlɛ è ʋa?
Ee, Izilayɛle! Nà zoo ɠale è ɠwɛɛzu?
Sòogɛ ɠale gè è zo eɠɛʋelei gè taa wola felegɔi niiti soni da,
Adema ta Seɓoyime?
Naa ɠa zìiɓɔlɔzu, è maawɔin sòga gola.
9 Ɓa, gè la ʋaazu ziɛzu ga ʋelei gòla yiiɠaawanaai la,
gè la Efelayime ɠoloɠolosu ʋolu.
Nɔ̀un nà ga GALA, gè la ga nuɓusɛi,
tama, nà ga GALAGI nii ɲadegai,
nà wo zaama, gè la ʋaazu wo ʋɔ ga ziiɠaawanai.
10 Ta ʋilɛ Ɠɔoɠɔ GALAGI ʋolu,
naa ɠa zikɔ eɠɛ zalai.
Sikɔ wooi ma, ma yiʋoiti ta zeɠe folo liizu ʋelei,
ti ʋa ga kpalii.
11 Ta zeɠe ɓalaa Ezipete yooi zu, ti ʋa, ti ɗa ɓalii.
Eɠɛʋelei ɓalaa wɔniiti ti la, ta poopo kolegiti,
ʋele ɠana ti yɛsu da, ti zeɠe Asiili, ti ʋa.
Nà ma, nà ti zei ʋolu ga niinɛ ta-yooi zu,»
Ɠɔoɠɔ GALAGI wooi ɠana.