GALA gooi é lo wɛɛn yooi zu nuɓusɛi zɔiti ba
13
Ɓaɓilɔne yooi laalɔɠɔma
1 Keela wooi é wosu é lo Ɓaɓilɔne ʋa, é ɠulani kɛlɛma Amɔse ná-doun zunui Ezayi ʋɛ.
2 À poogi lo gizei ma maa kala,
wo wooɠula ti ma ga kpeei,
wo yee ɠɛ ti ma ta ʋa, ti lɛ ga zou nuiti ta-ʋɛlɛla ʋeleiti!
3 «Nà ya, gè nà-deveiti feeni naati zea ti ɓɔɠɔ veai bɛ̀,
gè nà-salaʋusu ɠɛzɛiti tolini,
ti wanaɠula nà-ziiɠaawanai zu,
niiti ti ɠoozunɛɛzu nà-pilɛ sɔlɔɔ fai zu.»
4 Bɛbɛi lugi ɠa gizeiti ma,
eɠɛ nuɓusɛiti ti wola mɔinɗai.
Nu ɠa masadaiti sɔngɔ wooi mɛnisu,
zii ɠiligiti ti ɠaalɛai ba.
Ɠɔoɠɔ GALAGI, Fai-Pɛ-Maliɠii ɠa ná-salaʋusuiti dɛɛzu
ti ʋaazu kɔɔi ɠɔɔzu.
5 Ta ʋaazu, ti zeɠe zooi ta zu ɠoozama, zooi ɓomaʋɛ,
Ɠɔoɠɔ GALAGI ta ná-kɔɔɠɔ zɔɔlaiti,
é ʋaazu ti zeɠezu ná-ziiɠaawanai zu,
ga ti eteai pɛ koloɠolo.
6 À kidaaʋili kpeei loona deɠɛmu,
mazɔlɔɔ Ɠɔoɠɔ GALAGI ná-foloi wola maaɓuɠaa,
toɠa ʋaazu eɠɛ faa zuɠoloɠologi,
tokoleʋeai GALA Zɛbɛi-Pɛ-Maliɠii ʋɛ.
7 Naa ɠa é ba, ɛsɛ pɛ zeezu ɠa ɓɔlɔ,
zunuiti pɛ iɲɔ ge leʋe.
8 Dualuagi ɠa ti zo, kidaaʋiligi ɠɛ ti ma,
taɓai ti zo, eɠɛ anzanui é doun zɔlɔɔ koozuwanai zu.
Ti ɗa wɛlɛ ɓɔɠɔ ʋa ga dualuagi ti ɠilagilagi,
ti-ɠaazuʋɛ maaʋooloai.
9 Wɛlɛ ba é ʋaazu, Ɠɔoɠɔ GALAGI ná-foloi,
maawɔinɠaalala voloi, ziiɠula foloi, ziiɠaawana wolai ma voloi,
é eteai ɠɛɛzu ga teʋebai zu,
é kotoba nuiti ma zuwu ɠaaleʋe.
10 Mazɔlɔɔ somideɠaiti ti geeɠɔlɔgi zu
ta ti-ma ɓulugiti ti la mɔ voloa,
foloi ɠa ɓidi, a wuzeɠena nɔ feya,
alugi la mɔ ná-wozakalagi vea.
11 «Nà eteai zala ná-faa ɲɔi vaa zu,
gè faa ɲɔu ɠɛ nuiti sala faaɠaaza golai vaa zu.
Gè waso nuiti ta-wasogi ɓe,
gè nu ʋaa nuiti ta-ɠaazulɛɛi maayei.
12 Nà nuɓusɛi ɠaa vai ɓaa eɠɛ zanu kitei,
ti ʋɛtɛsu ɠa ɓaa é leʋe zanugi ʋa, é Wofiil yooi zu.
13 Naa ɠa é ba, nà geeɠɔlɔgi ɲiikpi,
zooi tɛi ka ɓali ma wuulaagiti ga
Ɠɔoɠɔ GALAGI ná-ziiɠulagi zu, Fai-Pɛ-Maliɠii,
yeei ná-ziiɠaawana wolai lokoleʋezu la.»
14 Nuiti ta ɠɛ eɠɛ dopa zaaiti ti ti ɠaaluaai,
ɓaa baalagiti nu la wɛlɛzu ma, é ʋa ti ɠaalɛ ba,
ɛsɛ ka ɠaaʋote ná-nuɓusɛiti ma,
ɛsɛ ge ʋela, é li ná-zou zu.
15 Niiti nɔpɛ ta ɠomi ga tiye, ta ti wɔ ga mɛɛinti,
niiti nɔpɛ ta ti zo, naati ta loo bu ga boɠa zɔkpɔi.
16 Ta ti-loungoiti ka, ti ɗa ti lɛɛvɛ ti ɠaazu,
ti ta-ʋɛlɛiti buuvoo,
ti ʋilɛ ti-anzaiti polu.
17 «Mazɔlɔɔ nà Mɛde nuiti buzeɠezu ti laalɔɠɔma,
niiti ti ɓɛdɛ la walii ʋa,
ti la wɔinni ga zanugi.
18 Ta buzeɠe niinɛgiti too bu ga ta-mɛɛinti,
ti la doun ɲɛ maawɔinɠaa,
doungo maawɔin la ti zoga.»
19 Ɓaɓilɔne, masadaiti ta-maaɠili zɔɔla ʋagɔi,
yɔlɔɠɔi é Ɓaɓilɔne nuiti kɔbu, ti ɲaɠai ɠulazu la,
toɠa ɠɛ eɠɛ Sɔdɔme ta Gomɔɔl, niiti GALA ge ti lokani.
20 Mazɔlɔɔ nu la mɔ zeiɗa Ɓaɓilɔne eyɛsu pɛ,
sulaa la mɔ vega ga nuɓusɛ eyɛsu pɛ, yeeɠɛɠalaiti pɛ su.
Anɛɛ teʋeteʋe nuiti ti la mɔ ta-zeɠe ɠota loga ná,
togani makɛ nu nɔpɛ ge la ná ɠɛa ga looɠosu.
21 Dɔɓɔ ɲaleiti ta ná ɠɛ ga ʋɛɛzuʋɛ,
buungiti ti ma ʋɛlɛiti buulaave.
Saa wɔnigiti ta ná laave,
dɔɓɔ woliiti ti ɗa ɠaɠo ná.
22 Dɔɓɔ zuaiti ta ɠɛ zikɔzu taai ma ʋɛlɛ wolaiti bu,
koʋeiti ti ɠɛ ma masa pɛlɛiti bu.
Ná-yeeɠɛɠalai ʋaa vai maaɓuɠaa,
Ɓaɓilɔne ná-foloi naati maa la mɔ ɠoozani.