17
Damase ta Izilayɛle masadaiti toobu vai
1 Keela wooi é wosu é lo Damase ʋa:
«Wɛlɛ nágo ʋe na,
Damase la mɔ ɠaaluga ga taa wolai ta,
ma ɓulukpulugi nɔ ɠa a ɠɛ ʋuuni.
2 Kɛlɛi ɠa wosu Alowɛɛl laa wolaiti ba,
ti ve toganiiti zea, ti ná ɠɛ ga ʋɛɛzu,
nu nɔpɛ ge ti ɓɔlɔa ná.
3 Efelayime ziɠigi ɠa ɲɛɛlɛ naazu,
masada la mɔ ɠɛa Damase,
Siili nui mɔtai ta ɠɛ ga Izilayɛle nuiti kɛʋele,»
Ɠɔoɠɔ GALAGI, Fai-Pɛ-Maliɠii wooi ɠana.
4 «Naama volo ná, Izilayɛle zuɲɛgi maa ɠa ʋɛlɛ,
kɔlɔgi ɠa ɠula ma, é ɠaɲa.
5 Toɠa ɠɛ eɠɛ siɛgi zu nu molo leʋezuʋɛ la,
molo leʋe nuiti yeelokoi zulaavesu la ga ma ɠɔpɔgi,
eɠɛ nu a ɠɛ ma ɠɔpɔgiti gaalɛɛzu ba Lefayime ʋɛtugi zu.
6 Izilayɛle mɔta goi nɔ ɠa
a yɛ ná é ʋa ɠula,
eɠɛ nu ɠa wolive wului ɠaaloɠa,
felegɔ ɓaa saʋagɔ nɔ yɛ ungaʋɛ geezu munu,
naanigɔ ɓaa dɔɔlugɔ yɛ ma ɓekegi ʋa, nii gwaai,»
Ɠɔoɠɔ GALAGI wooi ɠana, Izilayɛle ná-GALAGI.
7 Naama volo ná, nui ɠa ɠaaʋote, é ɠaazulo Kpɛtɛ Nui ʋa, toɠa ɠaazuwuzeɠe, é to GALA ba, Izilayɛle ná-GALA Ɲadegai.
8 É la mɔ ɠaazuloga zalaɠa ɠulazuʋɛti ba niiti é ti ɓɛtɛni ga yeeiti. É la mɔ wɛlɛa kɔɔɠɔ ganigiti gaazu, niiti zeeiti ti ti ɓɛtɛni, ɓaa sale wuluiti ta ansanse gala aniɲakaiti.
9 Naama volo ná, Izilayɛle ná-taa wolaiti siɠigi ma, kɛlɛi ɠa wo ti ʋa, eɠɛʋelei Ɠeve nuiti ta Amool nuiti ti ɠɛlɛni la ta-laa wolaiti ba, siɛgi zu Izilayɛle nuiti ti ta-yooiti soni da. Ti zuɲakai ɠa yɛ.
10 Mazɔlɔɔ Izilayɛle, è yeemani è Ɠizo GALAGI ma,
è la ɠizɛni ɗa-zobogi ma Vasai zu.
Naa ɠa é kɛɛni è kpele ʋagɔiti daani gala kiligiti bɛ,
è ani ɠae ɠiligiti faza ná.
11 Foloi è ti ziinni da, siinziin ganigiti ti ʋɔnɔni,
poluma sobui, ɗa-ani zuwui ʋuani.
Kɛlɛ molo leʋe ziɛgi zu, ani nɔpɛ ge la ɠɛni ná,
faa ɲɔi ma zale la mɔ ná.
12 Ee, nuɓusɛ ʋɛbɛi zɔngɔ wooi,
ti zɔɔlɛzu eɠɛ kpoloɗɛi zɔngɔ wooi!
Zii ɠiligiti sɔngɔ wooi,
eɠɛ ziɛ wolaiti sulu gooiti!
13 Zii ɠiligiti sɔngɔ wooi ɠɛɛʋɛ eɠɛ ziɛ wolaiti sɔngɔ wooiti.
Ɠɔoɠɔ GALAGI ɓaazaɠani ti ma,
ti ʋela, ti li ɠoozama.
Ti vazani eɠɛ kpaku vɔɔ goiti,
fiilɛi ti yɛʋɛzu gizeiti maazuʋɛ,
eɠɛ fufiligi tɔngɔlɔ fiilɛi seɠezu fiilɛ wolai luɠɔ.
14 Kpɔkɔi a ɠɛna zeelia, dualuagi ʋe ná,
aisa sobui, ani nɔpɛ ge la mɔ ná!
Ʋele ɠana é ɠɛɛzu la ga naati
niiti ti loozu ade ma,
ungo, toɠa ɠɛ ɠana nɔ ga naati
niiti ti ʋaazu ti de-ɠɔligiti kula de ya.