Siɛ gaaɓelagiti ma ɠulakɛlɛmai
24
Eteai ɠoloɠolo fai tɛtɛ
1 Ungo, Ɠɔoɠɔ GALAGI ɠa ʋaazu eteai pɛ koloɠolosu,
toɠa ʋaazu su ɠoloɠolosu,
é zooi ɠaaʋɛ ɠɛ wuulee,
gaa aniiti pɛ ti vaza.
2 Faa ɠilagi naa nɔ ɠa a ɠa ga
zalaɠa ɠula nui ta nuɓusɛiti,
pɛlɛ kɛɛɠɛi ta ná-botiɠɛ zunui,
pɛlɛ deei ta ná-botiɠɛ anzanui,
ani ʋɔdi nui ta ani ɠeya nui,
nui é anii lɔɔzu ga ziingaogi ta nui é siingaosu,
kuye ʋɛɛ nui ta kuye zeɠe nui.
3 Eteai ɠa ɠoloɠolo mɛtu, suwo kpɛlɛtɛtɛ,
mazɔlɔɔ Ɠɔoɠɔ GALAGI ɓɔɠɔi ɠa é niima wooi woni.
4 Gɔlɔɗɛi ɠa eteai ɠaazuʋɛ,
eteai zuɓɔlɔa, é vɔ,
eteai nuiti tosu wolai ti ya, ti vɔa.
5 Eteai ɠɔzɔni su nuɓusɛiti kɔɠɔwu,
mazɔlɔɔ ti tɔgiti koloɠoloni,
ti deveiti seɠe ma,
ti ɠɔoɠɔ minazeɠegiti seɠe ma.
6 Naa maaʋele ma, eteai ɠana ɠala ga GALA ná-foovooi.
Eteai zu nuɓusɛiti ti ɗa ta-vaaɠaazagi ma ɓɔlɔi zɔlɔɔ,
ti undaa ɗa ʋili,
niiti ti yɛsu ná, ti la mɔ mɔinni.
7 Dɔɔ niinɛi ɠaazuɠilia,
leezɛn ɓelei zuɓɔlɔa,
niiti kpein ti ɠoozunɛɛni ti-yiimaʋɛ, ta ɓalasu.
8 Tamadegiti ta-ɠoozunɛɛi maaleʋea,
nuiti ta-zɔngɔi ti ɠɛni bosu fɛtii zu, naa ɓega,
kɔnigiti gooi ma ɠoozunɛɛi maaleʋea.
9 Dɔɔ ɓɔle wuye la mɔ loozu,
gaazulati ganiiti ti wanaa kpɔɔle nuiti da.
10 Taa wolai ʋua ya, naa zuwoga.
Ɲii wosuʋɛti pɛ daaɠuluga,
nu la zooga é ʋa lɛ ná ta.
11 Ɛsɛ pɛ ka kpeei loozu koi yɔɠɔzu ʋeleiti su,
ga dɔɔ la mɔ ɠaazu.
Koozunɛ la mɔ ná,
ɲaɠa ɠula vai ɓega zooi zu.
12 Taazuʋɛ zuɠoloɠologa mɛtu,
ma ɓogiti ti ɓezeɠelega, ti ɠoloɠolo.
13 Ʋele ɠana a ɠɛɛ la nuɓusɛiti saama zooi ɠa,
eɠɛ nu ɠa wolive wului ɠaaloɠa,
eɠɛ leezɛn waai ɠula vai a ɓena tɛtɛ,
nu è ɗa ma waa ɠaaɓelagiti gaiziɛ.
Koozunɛɛi ɠula vai ma yeeluɠɔ
14 Niiti ta yɛ vulua ta guyei loo,
ta ɠoozunɛ, ti wooɠula,
ti Ɠɔoɠɔ GALAGI maamusɛ ná-maayikii zu,
ta ɠɛna ʋaa, ti ɗa zeɠe folo liizu ʋele yooiti su.
15 Folo ɠulazu ʋelei yooi zu,
à Ɠɔoɠɔ GALAGI maamusɛ mu.
Kpoloɗɛi laaʋɛ yooiti su,
à Ɠɔoɠɔ GALAGI, Izilayɛle ná-GALAGI lɔɠɔi wo.
16 Nuiti gooi ɠa ɠulazu zou ɓela ga,
gi ɗa ti woomɛni, ti ɗa guyei loo ga:
«Lɛbiyai ɠa Telebo GALAGI ʋɛ!»
Kɛlɛ gè ɠɛni ɓɔɠɔ ma:
«Gè yɛga su! Ungo, gè yɛga su! Màanɔɠɔa!
Mazɔlɔɔ yaava nuiti ti yaavai ɠɛɛni.
Yaavai! Yaava nuiti ti yaavai ɠɛɛni.»
17 Dualuagi, zeɠei ɓomaʋɛ ta tumɔi,
naati ka ti wo maaɓɔunsu,
wɔiti wo zeini eteai zu.
18 Zɔi a ʋela dualuagi maalugi ʋa,
naa ɠa loo zeɠei ɓomaʋɛ.
Ni toɠa zoo é lɛ, é ɠula su,
toɠa zo tumɔi zu.
Mazɔlɔɔ geezuʋɛ ma ʋɛlɛlaʋɛti daalaoga,
eteai ma wuulaagiti ti ɲiikpiga.
19 Zooi ɠa ʋalizu ga,
zooi ɠa ɓalasu,
zooi ɠa ɲiikpisu.
20 É ɗa ziɛ tingotanga eɠɛ dɔɔzo nui,
é ɗa ɓali eɠɛ kotai.
Ná-tɔ koloɠologi wuiɗa ma,
é la mɔ zooga é ʋa wuzeɠe ʋolu.
Masadaiti kwɛgi,
GALA ná-masadai lɔɔzeigi
21 Naama volo ná, Ɠɔoɠɔ GALAGI ɠa wuzeɠe
geezuʋɛ, geezu ɠɔɔʋɛbɛi laalɔɠɔma,
ta eteai zu, etea masagi daalɔɠɔma.
22 Ta ti ɠaalɛ ba, ti pɛ zeɠei zu,
daa ɠa ɠulu ti ma kasoi wu,
naa ʋolu su a ɠoozana,
kɛni ti ta-lukpɔi ɠaaleʋe.
23 Alugi ɠaaɠaalɛi ga unfegi,
foloi ɠɛ tɔmɔzɔɔ ga unfegi.
Mazɔlɔɔ Ɠɔoɠɔ GALAGI, Fai-Pɛ-Maliɠii ɠa masadai ɠɛɛzu
Siyɔn gizei ma, ta Zeluzalɛme.
Toɠa ná-lɛbiyai ɠula kɛlɛma
ná-nuɓusɛiti ta-ɠundiɠiiti gaazu.