26
Pilɛ sɔlɔɔ guyei
1 Naama volo ná, niima wuyei ɠa loo Zuda yooi zu ga:
«Taa wola ɠiteɠite ka é gi ya.
Makɛ vai zu, Ɠɔoɠɔ GALAGI siɠigi latigɛ ma,
é siɠigi taɠili tati naa ma.
2 À siɠidaʋɛti daalao,
wo wooɠɛɠila nuɓusɛiti zɛ ná, ti lɛ,
ti ziɛzu ga ta-minazeɠegiti.
3 Zɔi é losu kpaan ná-faiti su,
ɗa makɛ ziilɛi pagɔi zu,
mazɔlɔɔ é ɓɔɠɔ ɠaliva è ma.
4 À ɓɔɠɔ ɠaliva Ɠɔoɠɔ GALAGI ma yeenɔpɛ,
mazɔlɔɔ Ɠɔoɠɔ GALAGI ɠa é ga ɠɔoɠɔ fasai.
5 É naati zeini bu,
niiti ti ɠɛni masadai ɠɛɛzu, ti wuzeɠeai.
É taa wolai lokani, nii nu lɔɔzu la ɠɛni ba.
É maayeini zooi ma,
é tooni fufiligi zu.
6 Kɔɠɔlomai woni da,
maanɔɠɔ nuiti bɛ,
bala nuiti ti dɛɛvɛ ɠɔɠɔwu.»
GALA falii
7 Telebo nui ná-pelei ɠa ga pelei sɔlegai gola.
Ɗɛi è zɔlegai, ɗa pelei laazu, telebo nui a ziɛ la.
8 Ee, Ɠɔoɠɔ GALAGI, gi ɠitogɛ è ʋa,
ɗa-lukpɔɠaaleʋe ʋelei zu.
Gá è-laaseigi wo, gi wooɠula è ma,
naa ɠa é ga gi yiima vai.
9 È wɔin ɠa ɗa ɠɛ mà kpidii laawu,
nà ɗa è ɠaiziɛ ga zìimaʋɛ.
Siɛgi zu ɗa-lukpɔɠaaleʋeiti ti zeelizu la eteai ma,
eteai zu nuiti ta telebodai maaɠɔli.
10 Kɛlɛ nu a ɠɛna faa ɲɔu ɠɛ nui maawɔinɠa,
é la ɠaaɓaa pɛ é ʋa teleboda ɠɛ,
toɠa ɗa faa ɲɔi ɠɛ nɔ telebo zooi zu,
é la unfega Ɠɔoɠɔ GALAGI wɔɔlɔ ʋelei ma.
11 Ee, Ɠɔoɠɔ GALAGI,
siɛgi zu é yeewuzeɠezu la tukpɔɠaaleʋe vai ma,
ti la miná ɠaazu.
Kɛlɛ ta naa ʋɛtɛ, ʋelei è ɗa-nuɓusɛi maalobosu la,
ta unfe, abui ti ɠala,
nii kɛʋele ɓɛtɛni è zili nuiti faa ma.
12 Ee, Ɠɔoɠɔ GALAGI, ɗa ziilɛigi veezu gi ʋɛ,
mazɔlɔɔ nii kpein gi kɛɛzu, ɗa ɠa è ti laazeelizu.
13 Ee, Ɠɔoɠɔ GALAGI, gá-ƓALAGI,
é ɠula è ʋolu, maliɠii ɠiligaa ti zeini gi unda,
kɛlɛ ɗa ɠila kpe è zaɓui zu ɠa gi è-laaseigi wosu da.
14 Naati ti zaa, ti la mɔ yɛnvua ʋolu,
ti ɠɛa nɔ ga niinigiti nɔ, ti la mɔ wuzeɠea ʋolu,
mazɔlɔɔ è wuzeɠeni,
è ti-ma zuwu ɠaaleʋeni,
è ti-ma ɠisiɛi pɛ ɲɛɛlɛa.
15 Ee, Ɠɔoɠɔ GALAGI, è gá-nuɓusɛiti gaawɔɔlɔa,
è ɗa-lɛbiyai lɛa,
è gá-nuɓusɛiti gaawɔɔlɔa,
è ta ɓɔga zooi ʋa kwɛpelemaʋɛti pɛ.
16 Ee, Ɠɔoɠɔ GALAGI, gi ɠɛai ma kidaaʋiligi zu,
gi è ɠaiziɛni, gi ɠaaʋote è ma.
Gi gá-maanɛɛnɛ wooiti daazeelini è ma,
siɛgi zu è ɠɛni gi maaɠolozu la.
17 Gi ɠɛni Ɠɔoɠɔ GALAGI ɠaazuʋɛ
eɠɛ anzanui kogi ma,
é ʋaazu niina doin zɔlɔɔsu,
é ɗa laaʋoe, é kpeei loo ga taɓai.
18 Mazɔlɔɔ gi kogi zeɠeni, gi ɓɔlɔ,
kɛlɛ nii gi sɔlɔɔni, naa ɠɛni nɔ ga fiilɛi.
Gi la kizo faa veeni eteai ya,
gi la zɛnvu veeni nu niinɛa ya eteai ʋɛ.
19 Ɗa-wɔvɛiti ta zɛnvui wo ʋolu,
poomaiti ti ga nɔ̀nɔiti, ta zɛnvui wo ʋolu.
Wɔiti wo laani zooi wu,
à wuun, wo wooɠula ga koozunɛɛi,
Mazɔlɔɔ ɗa-nɔɗagi ɠa ga wozakala nɔɗagi,
ta zooi ɠa zɛnvui ve gɔvɛiti zea ʋolu.
Zaalai ta wuunsu niinɛlai
20 Nà-nuɓusɛiti, à lɛ wo-laazuʋɛ wa-ʋɛlɛi wu,
à daaɠulu ɓɔɠɔ ma.
À lago lɔɔɠu ná,
eyɛsu Maliɠii ná-ziiɠaawanai ɓudɛ.
21 Mazɔlɔɔ Ɠɔoɠɔ GALAGI ɠa ɠula zeizuʋɛ,
é eteai zu nuiti sala ga ta-vaaɠaaza golaiti,
naama volo ná, zooi ɠa ɲamai pɛ kula kɛlɛma,
niiti nuiti ti ti ʋaani, é la mɔ tanɔpɛ dɔɔɠua.