31
Maanɔɠɔi ɠa naati tuɠɔ,
zɔiti ti ʋoluzeizu Ezipete yooi ʋa
1 Maanɔɠɔi ɠa naati tuɠɔ,
tɛi ti yeizu Ezipete yooi zu kpɔba ɠaiziɛ vai ma,
ti ʋoluzeiɗai sooiti ba,
ti laai kɔɔɠɔ wotoloiti da, tɔɔzei ti mɔinʋɛ,
ta soo ɓizɛ zalaʋusuiti, tɔɔzei zɛbɛ wolai ɠa ti ʋa.
Kɛlɛ ti la wɛlɛzu Izilayɛle ná-GALA Ɲadegai ʋa,
ti la Ɠɔoɠɔ GALAGI ɠaiziɛzu.
2 Tɔ ɓalaagi, soogɛ faa ɠɛɛzu,
toɠa ʋaazu ga maanɔɠɔi, é la woo maavaliboga,
toɠa wuzeɠe faa ɲɔu ɠɛ nuiti ta-ʋɛlɛyeɠei laalɔɠɔma,
ta naati ta-ɓɔbai laalɔɠɔma niiti ti telebotalai ɠɛɛzu.
3 Ezipete nuiti ta ga nuiti,
galadai ma zobo nɔpɛ ge la ti ʋɛ,
ta-zooiti ta nɔ ga zooi ɠaa aniiti,
geeɠɔlɔgi zu ani la ga tiye.
Siɛgi zu Ɠɔoɠɔ GALAGI yeemaalesu da,
zɔi é kpɔbai wosu, naa ɠa ɓunɛ,
ta zɔi ti ɓɔsu ba, naa ɠa loo,
ti fele pɛ ti undaa ɠa ʋili ʋɔɔma.
Ɠɔoɠɔ GALAGI ɠa a ɗa unmɔɔgi wo
4 Mazɔlɔɔ Ɠɔoɠɔ GALAGI wooi ɠaa mà:
«Siɛgi zu zalai ɓaa zala yiʋoi zikɔzu la,
ga é ná-daamianigi maazuɓa,
baala makɛ nu ɓulugiti ti ʋaa ʋa da ma,
ti ɗa kpeeiti too, ti la maalua.
Ti zɔngɔ wooi la iɲɔteʋea pɛ.
Ʋele ɠana Ɠɔoɠɔ GALAGI, Fai-Pɛ-Maliɠii yeizu la,
é kɔɔi ɠɔ ná-gizei ma Siyɔn, ná-gize goi ma.
5 Eɠɛ wɔnii é ɠoʋegiti suviesu ma ɠain maazu,
ʋele ɠana Ɠɔoɠɔ GALAGI, Fai-Pɛ-Maliɠii ná-makɛi zuviesu da Zeluzalɛme maazu.
Toɠa maalobo, é unmɔɔ.
Toɠa ɓudɛ maazu, é makɛ ma.»
6 Izilayɛle nuiti, à ʋa ʋolu Ɠɔoɠɔ GALAGI ʋɔ,
nii wo wola maaɠoozaai ba.
7 Naama volo ná, ɛsɛ pɛ ka ná-salea ʋili ya,
niiti ti ɓɛtɛai ga walii ta zanugiti,
niiti wo ti ɓɛtɛni ga wo-yee ɲɔiti.
8 «Asiili yooi ɠa loo bu
ga boɠa zɔkpɔi é la ga nuɓusɛiti kpɛtɛ gelei.
Boɠa zɔkpɔi nu la kpɛtɛni ga yee,
naa ɠa a ti ɠoloɠolo.
Boɠa zɔkpɔi naa ɠa Asiili nuiti ta ɓizɛ ba.
Ná-nu niinɛiti pɛ ta ɠɛ duɔla wotii ɠɛɛzu boani zeezu.
9 Zɔiti ti zuɓaani eɠɛ fasai, ta lua, ti ɓizɛ,
kundiɠiiti ti iɲɔ ge leʋe,
ti ɠɛlɛ ta-ɗalapoi ʋa,»
Ɠɔoɠɔ GALAGI wooi ɠana,
nii ná-abuzogi Siyɔn,
ná-abuzulugi Zeluzalɛme taa zaamaʋɛ.