GALA Daawoo Zɛʋɛi Ezayi 50

Vulu vai la ɠoloɠoloni
GALA ta Izilayɛle yɔɠɔzu

1 Ɠɔoɠɔ GALAGI wooi ɠaa:

«Mini ɠa vulu zaa zɛʋɛi ná,

é dɛɛzu ga gè wo-lee ʋilɛni?

Ɓaa mu màaɠuye nui ɓɛ ɠa gè wo ʋɔdini ma ga duɔi?

Wɛlɛ wa-vaaɠaaza golaiti ka wo ʋɔdini su,

wa-lɔ koloɠologiti ka ti ɠɛni ga wo-lee ná-kɛlɛba zaɓui.

2 Siɛgi zu gè ʋaani la,

lee vaa zu gè la ɠɛni nu ɠaani?

Siɛgi zu gè toligi woni da,

lee vaa zu nu la ɠɛni gòoɠaaʋoteni?

Zèei ɠa kpuɠaai mu ɓaa nu unmɔɔ fai zu?

Zobo ka é la bɛ̀, gè ʋa nu unmɔɔ ɓaa?

Nà zelilo daa ɠilagi, nà ɗa kpoloɗɛi vɔ su.

Nà ɗa ziɛ wolaiti fɔ, naa ɠɛ ga teʋebai,

ti wu ɠaleiti ti luula ga ziɛ ʋalagi,

ti za ga kpɔɔle wɔin.

3 Nà ɗa seɠe lɛigi loo geeɠɔlɔgi ɠɔba,

gè saa wɔlɔ wo seɠei ɠɛ ga ná-pɛɛmazeɠei.»

Ɠɔoɠɔ GALAGI ná-botiɠɛ nui

4 Maliɠii Ɠɔoɠɔ GALAGI kàlagɛ ga nii maanɛai gè bo,

ga gè kwɛɛ wooiti nà ti wo,

gè zoo ɓɔsu zɛbɛsulala nui ʋa ga tiye.

Toɠa ɗa màaloɠa sobu-o-sobu,

é kàla ʋolu ga goilogi,

eɠɛʋelei kaladopoiti ta ɗa woilo da.

5 Maliɠii Ɠɔoɠɔ GALAGI ɠa kàlasu ga goilogi,

nɔ̀un nà, gè la tɔun sakpesu,

gè la ɠalesu ma ga ʋoluʋelei.

6 Gè pòluʋɛ veeʋɛ doɠa nuiti zea,

gè kòmagiti fe kpɛlɛi lɔɔɠula nuiti zea.

Gè la ɠɛni gàazuʋɛ lɔɔɠuni daaɗɛ ʋuumai ʋa ta poomugiti.

7 Maliɠii Ɠɔoɠɔ GALAGI ɠa é ɓɔsu bà,

naa ɠa é ba, poomu gooiti ti la faa ɠɛa ga ze,

naa ɠa é kɛɛzu gè gàazuʋɛ ɓaazu eɠɛ kɔtui,

mazɔlɔɔ gè kwɛɛ, gè la lɔa unfegi zu.

8 Maliɠii ɠa kòba, toɠa nà-gaamai ve zèa.

Ɓɛ ɠa é pɔ é kpɔɛlaalɛ bù?

De ɠula lɛɛ kɛlɛma!

Ɓɛ ɠa é pɔ é ɠɛ ga sàkpe nui?

É ʋaa lɛɛ, é lo gàazu!

9 Wɛlɛ Maliɠii Ɠɔoɠɔ GALAGI ɠa é ɓɔsu bà,

ɓɛ ɠa deɠɛmu a pèelala?

Sìli nuiti pɛ ta wɔlɔzaɠa eɠɛ seɠe zaɠai toai ya,

ɓaɠaɓaɠaiti ti ti mi.

10 Ta ɠa wo zaama nɛi ɓaa,

é luazu Ɠɔoɠɔ GALAGI ʋa,

é ɗa woilo ná-botiɠɛ nui wooi ma?

Nu-o-nu é kpidii zu,

wozakala ko pa ge la zea,

é ɠaliva Ɠɔoɠɔ GALAGI ma,

é ʋoluzei ná-GALAGI ʋa!

11 Wɔigiti wo abui ɠaazosu,

wo ɠɔɔzu ga mɛɛinti abui ba,

nii é wo maaɓɔunsu, toɠa ga nii:

wo ɓɔɠɔ abui ma zogi,

mɛɛinti wo abui ɠaazogai ti ʋa.

Wo-zalai ɠana Ɠɔoɠɔ GALAGI makɛgai wo ʋɛ,

wo zaazu nimizai zu!