55
Kizogi veeʋɛ ɛsɛ pɛ bɛ geya vaa la ba
1 «Ee, wɔiti pɛgi kpɔɔle wɔin wo ma,
à ʋa ziɛi ʋɔ bɛ,
anɛɛ zɔi wali la zea ɲɛgɛlɛin!
À ʋa, wo geya, wo mi!
À ʋa, wo dɔɔi ɠeya, ta nɔnɔi!
Wali vaa la ba, sala vaa la ba!
2 Leeni vaa zu wo walii lɔɔzu daamianigi ʋolu,
é la nu ɠɔnɔkulaa?
Leeni vaa zu wo ɓɔɠɔ ɓɔlɔzu anii ʋolu,
é la faa ʋaa nu ma?
À woilo, ungo, à woilo gòoi ma,
naazu wa naa mi, nii pagai,
wa yiimaɠɛ daamiani nɛɛnɛgi zu.
3 À woilo ga pagɔ, wo ʋa pɔ̀,
à woilo gòoi ma, wa zɛnvui wo.
Mazɔlɔɔ nà minazeɠe bo wo ʋɛ,
a yɛ ma eyɛsu ɠɔ,
nii nà-nuɓɔɠɔlai zu ta nà-wooɠɛɠiladai zu,
gè minazeɠeni la Davide ʋɛ.
4 Wɛlɛ, gè tɔun kɛɛni nuɓusɛiti bɛ ga zeelei,
é ɠɛ ga totuɠɔi, é ɗa nuɓusɛiti deve.
5 Ungo, ɗa zii ɠiligi loli, nii è la kwɛɛ,
ta wɛɛin niiti ti la è ɠwɛɛ,
naati ta zuvilɛ ga ʋaa è ʋɔ bɛ
nɔ̀un maaʋele ma, nà, Ɠɔoɠɔ GALAGI, ɗa-ƓALAGI.
Nà, Izilayɛle ná-GALA Ɲadegai ɠa é niima lɛbiyai veezu è ʋɛ.»
Minazeɠegi é la zeɠea ma pɛ
6 À Ɠɔoɠɔ GALAGI ɠaiziɛ,
siɛgi zu é ɠaazu la,
à wooɠula ma,
siɛgi zu maaɓuɠaai la.
7 Faa ɲɔu ɠɛ nui ɓe siɛ ʋelei ʋa,
nu ɲɔi ɠɛlɛ ná-kisiɛ ɲɔiti ba.
É ʋa ʋolu Ɠɔoɠɔ GALAGI ʋɔ, naa ɠa maawɔinɠa.
É ʋa ʋolu ada-ƓALAGI ʋɔ, naa ɠa suvaayɛ mɛtu.
8 «Mazɔlɔɔ nà-kisiɛiti ti la ga wa-ɠisiɛiti,
wa-ʋeleiti ti la ga nà-peleiti,»
Ɠɔoɠɔ GALAGI wooi ɠana.
9 «Ʋelei nɔ geeɠɔlɔgi ɠaaɠoozaai la zooi ʋa,
ʋele nɔ ɠana nà-peleiti gaaɠoozaai la wa-ʋeleiti ba,
ta nà-kisiɛiti ta wɔnɔiti zeemaazu.
10 Ʋelei tonai ta kɔɔlɛ vukɔi ti ʋuuzu la, ti zeɠe geezuʋɛ,
ti la ɠalega ma naa ʋolu,
ni ti la zooi yɛɓɛni, é ʋa ɓɛtɛ,
é siinziin ganigiti pɔnɔ,
ni é la ani zuwui veeni tii ɠɛɛ nui ya,
ni é la daamianigi veeni,
11 tama, zekaa nɔ é la ga dàawooi, é ɠulazu dà,
é la ɠaaɠalega ma, é ʋa ʋa pɔ̀,
ni é la faa ʋaani,
ni é la zìimai ɠɛɛni,
daa ʋa zeeli mɛtu, nii gè teʋeni ma.»
12 Ungo, wa ɠula ná ga koozunɛɛi,
totuɠɔi ɠa wo ga woye ziilɛigi zu.
Gize wolaiti ta gize nɛmɛiti ta ɠoozunɛ wo ɠakala ʋelei,
dɔɓɔzu wuluiti pɛ ta yealoɠa.
13 Ʋɛ ɠaingi ma lɔɓɔɠɛlɛgiti ti ná, sipɛlɛ gului ɠa wuzeɠe miná,
ʋɛ kpele tufaiti ti ná, milɛte guluiti ti ʋɔnɔ miná.
Toɠa ɠɛ ga Ɠɔoɠɔ GALAGI lɔɠɔi lɛbi vaa,
é ɠɛ ga poogi, é la ɲɛɛlɛa eyɛsu pɛ.