57
Nimizai ɠa kɔɔɠɔ gani kɔɔ nuɓusɛiti bɛ
1 Telebo nuiti undaa ɠa ʋilisu
kɛlɛ nu nɔpɛ ge la yiizoolɛzu ga tiye,
nu ʋagɔiti ti ɗa ɲɛɛlɛ,
nu nɔpɛ ge la ɠidaazu bu
ga telebo nuiti ta loozu bu,
nimizai é ʋaazu, naa ʋoola ti ʋa.
2 Kɛlɛ ziilɛigi ɠa ʋaazu,
zɔiti ti ziɛzu ga pele zɔlegi,
naati zoo niina ti ɲi ziilɛigi zu.
3 «Kɛlɛ wa ʋe de, à ʋaa lɛɛ ʋɛ, ungaiziɛ anzanui ná-dointi,
wɛɛnziɛ nui, koloɠolo anzanui ma zuwuzuiti!
4 Ɓɛ ɠa wo ɲɛɛɠulazu su?
Ɓɛ ɠa wo laalaosu ɓawuu daalɔɠɔma,
wo ɗa wo-nɛgiti kula?
É la ga gaama, ɓaa, ga wa ga kololala lointi,
yaava zuwuzuiti,
5 wɔiti wo ɠaazosu ga wo yiima vaiti daazeelilalai sɛne guluiti bu,
ta gulu wolai ɠilagilagiti pɛ,
wɔi wo doungoiti kulazu ga zalaɠai,
wo ɗa ti ɠɔdaaleʋe pɛtugiti su, kɔtu yeɠeiti su.
6 Kɔtu maaloungaiti ti pɛtugi zu, è ʋoluzeigiti kana,
toɠa ná è-ʋogi ɠa ná!
Naati ka è dɔɔ zalaɠai ʋuuzu ti ma,
è ɗa vebɛaniiti kɛ ná ga gala zalaɠai,
zìi ɠaalɛi naazu ɓaa?
7 È è-laazuʋɛ ɓɛtɛʋɛ gize ɠaaɠoozagiti maazu.
Mináti ka è lɛɛzu ná, è ɗa zalaɠaiti kula.
8 È ɗa-zalei lɔɔɠuʋɛ kpogi ʋoluʋɛ.
Ɗa è maaɲakai ɠulazu pòluʋelei dɔɔɠuzu,
è lɛ ɗa-ʋetei zu, è è-laazuʋɛ zuwɔɔlɔ,
è è-nɛɛɲɔɠɔiti geyani,
nɛɛʋɛ è ʋɛ ga è ɗa la ti ɠoba,
è ti ɠabei ɠaani.
9 È lobɛanii leʋeni galagi Mɔlɔke ʋɔ,
ga gulɔ ɲadegai ta gulɔ maku nɛɛnɛgi,
è ɗa-ɠeelaiti teʋeni ɠoozama,
naa maaʋele ma, è ɓɔɠɔ looni bu,
eyɛsu è yei gɔvɛalaazu.
10 È ɠaaɓaa ga è ziɛ ɠana,
è gaaɓela ga è ɓɔɠɔ ɓɔlɔ.
Kɛlɛ è la ɠɛɛni ma:
‹Gè mina yɛ wafuun fai tɛi polu.›
È zɛbɛ niinɛi zɔlɔɔni ʋolu,
è ɓudɛ ɗa-ɓɔlɔi maazu.
11 Ɓɛ ɠa é ɠɛni è yiizoolɛzu,
ɓɛ ɠa è ɠɛni luazu ba, ga è yaava,
ga è mina ɠisiɛzu sù,
è ʋa yiizoolɛ ga nà-faa?
Suɠooza gè la faa nɔpɛ bosu,
tanisu naa ʋe, é kɛa è la unfesu mà.
12 Nà ʋaazu kulazu kɛlɛma ga è la ga sɔbalala nu ʋelei è ɠisiɛzu la,
ta gè è-zɔgiti kula kɛlɛma.
È la kulanuma nɔpɛ sɔlɔɔga.
13 Ɗa kpee loona, è wooɠula ti ma,
ɗa-yɛɛ ɠalagiti ti è ɠulana faa zu!
Fiilɛi li ga ti pɛ, fiilɛ goi ti pɛ zɛʋɛ!
Kɛlɛ niiti pɛ ta lɔɔɠuzu ɠaiziɛ pɔ̀ bɛ,
ta zooi zɔlɔɔ ga tɔnɔ,
ta nà-gize ɲadegai zɔlɔɔ ga tɔnɔ.»
Ɠɔoɠɔ GALAGI ɠa kɛdɛyai ve
14 Toɠa ɠɛ ma:
«À pelei ɓɛtɛ, à pelei ɓɛtɛ,
à pelei laalao,
à kaka fai pɛ zeɠe pelei zu nà-nuɓusɛiti tuɠɔ!»
15 Mazɔlɔɔ GALA é geezuʋɛ Anii-Pɛ-Unga,
é ná ɠɔoɠɔ, daaseigi ga Ɲadegai, tɔ ɠa é nii wosu:
«Nà zeini ada ɠaaɠooza golai, ná ɲadegai,
kɛlɛ nà naama nuiti ba, ti ti zopele ɲɔuzu,
ta ɓɔɠɔmaayei zɛnvui ti-yiimaʋɛ,
nii a kɛ gè zɛnvui ve ɓɔɠɔmaayei nuiti bɛ,
nii a kɛ gè zɛnvui ve naama nuiti bɛ ti ti zopele ɲɔuzu.
16 Gè la yɛsu kpɔɛi laawu yeenɔpɛ,
ɓaa gè ʋa ziiɠaawanai makɛ eyɛsu ɠɔ.
Ni naa laade, nii kpein gè kpɛtɛai,
ti-yɛnvui zɛbɛi maa ɠa lɔi.
17 Izilayɛle nuɓusɛi ná-ani wɔin ɲɔi zìiɠaawanani.
Gè doɠani, gè lɔɔɠu ba ga ziiɠaawanai,
kɛlɛ kololala nui ʋilɛni nɔ ziima ʋelei ʋolu.
18 Gè ná-kɛɛwotii ɠwɛɛ, kɛlɛ nà kɛdɛsu,
gè lo tuɠɔ, nà ziilaazu gola,
ta niiti ti yiizoolɛai tɔun bɛ.
19 Nà maamusɛ wuyei lɔ ti-la.
Ziilɛigi, ziilɛigi ɠa naa ʋɛ é ɠoozama
ta zɔi maaɓuɠaai,»
Ɠɔoɠɔ GALAGI wooi ɠana.
«Ungo, nà nà-nuɓusɛiti kɛdɛsu.»
20 Nu ɲɔiti kɛɛʋɛ eɠɛ kpoloɗɛi é ɲiikpisu,
é la zooga é ʋa la kpɛ,
ma ɗɛiti ti ɗa nɔɠɔi ma zii pɛ buzeɠe.
21 Nà-GALAGI ɠɛ:
«Ziilɛi ge la faa ɲɔu ɠɛ nuiti bɛ pɛ!»