6
Ezayi loli fai
1 Konagi masagi Woziase zaani la, gè Maliɠii ɠaani zeini masa kpɔkpɔgi ɠa, gola ɠaaɠoozaai, ná-seɠei lakɔlɔgiti ti ɠɛni GALA sei ʋɛlɛi wuulaavesu.
2 Geezuɠeelaiti ti volozu gola, ti ɠɛni loni maazu, ti ɠilagilagi ɠoʋegi ɠɛni ga dɔzita, felegɔiti ka ti ɠɛni ɠaazuʋɛ maalɔɔɠuzu la, ti ti-ɓusɛiti maalɔɔɠu ga felegɔiti, ti ɗa ɠoʋe ga felegɔiti.
3 Ti ɠɛni wooɠulazu ɓɔɠɔ ma, ti ɗa ɠɛ ma:
«Ɲadegai, ɲadegai, ɲadegai,
Ɠɔoɠɔ GALAGI, Fai-Pɛ-Maliɠii!
Eteai pɛ sulaavega ga ná-lɛbiyai!»
4 Ti-wooi ɠɛni kpogiti kpalizu ma wuulaagiti ga, GALA sei ʋɛlɛi laaveni ga duului.
5 Názu ɠa gè ɠɛni la ma: «Nimizai ɠa tùɠɔ! Gè loa ya, mazɔlɔɔ nà ga zunui nii dakɔlɔgiti kɔzɔai, nà zeini nuɓusɛiti saama, niiti ti-lakɔlɔgiti kɔzɔai, gàazuɠɛzɛiti ti Masagi ɠaa, Ɠɔoɠɔ GALAGI, Fai-Pɛ-Maliɠii!»
6 Kɛlɛ geezuɠeelai naati ti volozu, gila ge ɠoʋeni, é ʋa pɔ̀ bɛ. É abulekai zeɠeni zalaɠa ɠulazuʋɛ ga bɛɛn koiti ti ɠɛni zea.
7 É fɔɔɠuni dàaʋɛ ʋa, é ɠɛ mà: «Nii vɔɔɠua è-lakɔlɔgiti ba, ɗa-vaaɠaaza golaiti ti ɓega, ɗa-ɠotoi gbaa.»
8 Gè Maliɠii wooi mɛnini, é ɠɛ ma: «Ɓɛ ɠa nà teʋe? Ɓɛ ɠa a ɠɛ ga gi-laavaawo nui?» Gè gooɠaaʋoteni, gè ɠɛ ma: «Nà ɠaa, tèʋe.»
9 Maliɠii ɠɛni ma:
«Li è ɠɛ niima nuɓusɛiti ma:
Wa la woilo nɔ,
kɛlɛ wo la faa ɠaaɠaa pɛ!
Wa la wɛlɛ nɔ,
kɛlɛ wo la wozaɠaa pɛ!
10 Niima nuɓusɛiti kɛ ga kigaaza nuiti,
ti woizuɓɔlɔ, ti ɠaazuɠole,
naa ɠa a kɛ ti ɠaazu mina wozaɠa,
ti-woiyeɠeiti ti mina faa mɛni,
ti-yii mina faa ɠaaɠa,
ti ʋa ɠale ma pɔ̀,
nii a kɛ ti ʋa ɠɛdɛ.»
11 Gè ɠɛni ma: «Màliɠii, eyɛsu siɛgi ɓɛgele zu?» É gòoɠaaʋoteni, é ɠɛ mà:
«Eyɛsu taaiti ti ɠoloɠolo,
nuɓusɛiti ti ɠula ná ʋa,
pɛlɛiti suwo, nuiti ti ɠula náti,
dɔɓɔi zuɠoloɠolo, é ɠɛ ga teʋebai.
12 Ɠɔoɠɔ GALAGI ɠa nuɓusɛiti maaɠooza,
kɛlɛbai ɠa wo ga zooi mɛtu.
13 Ni nuɓusɛiti ma ʋuusiɛi a yɛna vulua,
naati ɓalaa ta tɔnɔ sɔlɔɔ ga ti ɠala ga abui.
Kɛlɛ eɠɛʋelei telebɛnete gului ta sɛne gului ti la,
ta ɗa ti ma lɔkulugi makɛ da, ta ti ʋɔna,
niima nuɓusɛiti ma lɔkulugi ɠa ɠɛ ga ma zuwu ɲadega.»