62
Zeluzalɛme niinɛ vai ʋolu
1 Nɛɛbɛi ma vaa ma é lo Siyɔn ʋa,
gè la maaɠɛga kpɔ,
nɛɛbɛi ma vaa ma é lo Zeluzalɛme ʋa,
gè la looɠoga pɛ,
eyɛsu ná-telebodai ɠula kɛlɛma
eɠɛ folo lie kulazu voloi,
ta ná-kizo fai eɠɛ sɔmɔgi é zosu.
2 Zii ɠiligiti ta pɛtɛ ga Ɠɔoɠɔ GALAGI è unmɔɔni,
masagiti pɛ ta ɗa-lɛbiyai ʋɛtɛ.
Daasei niinɛ ɠa ʋɛɛ è ʋa,
nii Ɠɔoɠɔ GALAGI laa ɠa leʋe ma.
3 Ɗa ɠɛ Ɠɔoɠɔ GALAGI ya ga masa bɔɔlɔgi é volozu,
è ɠɛ ga masa bɔɔlɔgi ɗa-ƓALAGI ya.
4 Ti la mɔ è loliga ga: «Taa wolai kɛlɛi woni ba»,
ti la mɔ ɠɛa ɗa-yooi ma: «Zooi koloɠologai».
Kɛlɛ ta è loli ga: «Ɠɔoɠɔ GALAGI yiimai»,
ɗa-yooi ɠa loliga: «Zooi nii fuluai».
Mazɔlɔɔ gaamazu, ɗa ɠɛ ga Ɠɔoɠɔ GALAGI yiimai,
ɗa-yooi ɠa zini sɔlɔɔ.
5 Ungo, ʋelei zunu loungoi a ɗa anzanu loungoi vulu la,
zekana Zɔi é è losu ʋolu, toɠa ɠɛ ga è-zinigi.
Zenɔ ɠana ɓalaa ʋelei anzanu loungoi
a ɗa ɠɛ la ga zunu loungoi ná-koozunɛɛi,
ɗa ɠɛ ga ɗa-ƓALAGI ná-koozunɛɛi.
6 Zeluzalɛme, gè makɛ nuiti seiʋɛ ɗa-ziɠigiti ga.
Maa la nɛɛni ti ʋa maaɠɛ kpɔ pɛ, folo ʋɛɛ kpidi ʋa.
Wɔiti wo Ɠɔoɠɔ GALAGI ɠitoozu Zeluzalɛme ná-faiti su,
dooɠo ge la wo ya ɲɛgɛlɛin!
7 À ɠili ma, dooɠo ge mina ɠɛ zea,
eyɛsu é Zeluzalɛme lo ʋolu,
é kɛ ga maamusɛ ani eteai zu.
8 Ɠɔoɠɔ GALAGI ɠonani ga zɛbɛi pɛ
ta ná-zeezuɓaai pɛ ga:
«Gè la mɔ ɗa-moloi vea ga daamiani è zili nuiti zea,
wɛɛinti ti la mɔ ɗa-lɔɔi ta ɓɔlea,
é ga è-mɔɔlɛzuʋɛ ma lɔnɔgi.
9 Niiti ta moloi mi, ti ɗa Ɠɔoɠɔ GALAGI maamusɛ,
naa ga zɔiti ti teʋeni.
Niiti ta dɔɔi ɓɔle sèi ʋɛlɛ ɲadegai ma ɠoizuʋɛ,
naa ɠa ga zɔiti ti ma waai ɠulani.»
10 À leʋe, ungo, à leʋe ga pɛlɛla ʋelei!
À nà-nuɓusɛiti ta-ʋelei la.
À pelei ɓɛtɛ ti ʋɛ, wo kɔtuiti kula su.
À poogi lɛ geezu, gaaʋote zii ɠiligiti pɔ pelei.
11 Ɠɔoɠɔ GALAGI wooi ɠa zeeli eteai zu ná pɛ:
«À ɠɛ Siyɔn nuɓusɛiti ma:
‹Wɛlɛ, wo ɠizo nui ʋa,
é ʋaazu ga naa, nii é sɔlɔɔgai ga salai,
ta ná-kpɔlɔi zulɔnɔgi ɠa tuɠɔ, ti ɗa ʋa.› »
12 Ta ti loliga: «Nuɓusɛ ɲadegaiti,
Ɠɔoɠɔ GALAGI ná-nu unmɔɔgaiti».
Ɗɛi ma è ga Zeluzalɛme,
è la mɔ loliga ga taai nii kɛlɛbai wogai la,
kɛlɛ ɗa loli ga: «Tiba laai».