19
Zɔɓe Ɓilidade wooɠaaʋote fai
1 Zɔɓe gooɠaaʋoteni, é ɠɛ ma:
2 «Wa yɛsu kpɔ̀lɔzu eyɛsu yeelɛ?
Ungo, wa yɛsu kpɔ̀lɔzu ga wa-ɓɔɛiti eyɛsu yeelɛ?
3 Ná zeizu ɠɛa puu, wo ɗa kìgi zupu!
Wo la unfesu ga kpɔ̀lɔ vai?
4 Ni kàkagɛ, nà-kaka fai ma ɠasɔi ɠa la ùnma.
5 Ni wɔun wa kaana ga wo vizɔgɛ bà,
ni wa ɠɛna zeliloga mà nà-unfe fai zu,
6 à suɠwɛɛ ga GALA ka é tòsuʋɛ ɠoloɠologai,
é ná-tumɔi lo màaɠoolii zu.
7 Ni nà kpee loona suɲɔu vai laalɔɠɔma, nu nɔpɛ ge la gòoɠaaʋotesu.
Ni nà kpɔbai maalolina, telebo faa la ɠɛɛzu.
8 GALA ge pelei leʋeni tùɠɔ, gè la zooni gè ʋa leʋe.
É kpidii ʋɛɛni nà-peleiti su.
9 É ɓaazeɠeni mà,
é nà-lɛbiya wɔɔlɔgi ɠula ùnba.
10 É tòka mini-o-mini, ta nà ga li.
É nà-kitogi lɔɔɠula eɠɛ gului.
11 Ná-ziiɠaawanai lokoleʋeni dàalɔɠɔma.
É dèveni eɠɛ sili nui ta.
12 Ná-kɔɔɓɔgiti pilɛgɛ pelei ma ʋɔɔma,
ti ʋaa pɔ̀, ti ta-ʋelei laani,
ti ti-zeizuʋɛ ʋu sèizuʋɛ maaɠoolii zu.
13 «É nà-nu ɓɔɔɓɔgiti maaɠoozani bà.
Kwɛ̀ɛ nuiti ti vazani, ti maaɠooza bà.
14 Nà-nu ɓɔɔɓɔgiti ti ɠɛlɛni bà,
nɛ̀ɛɲɔɠɔiti ti ɠɛlɛni bà.
15 Nà-pɛlɛ wu nuiti ta nà-botiɠɛ anzanuiti ɓɔɠɔi,
ta kɛɛzu eɠɛ nà ɠɛ ga wɛɛn.
Kɛ̀ɛʋɛ ti ɠaazu, eɠɛ nii nu la kwɛɛ.
16 Nà nà-botiɠɛ zunui lolisu, é la gòoɠaaʋotega,
anɛɛ ni nà maanɛɛnɛzu.
17 Dàaʋɛ makugi ɠa ɠulazu ànzai ɓɔɠɔi zokpai zu.
Wɔ̀inzeɠea kòozu lointi ma.
18 Anɛɛ doungoiti ti ɠɛlɛa bà.
Siɛgi zu gè pɔ gè wuzeɠe la, ta ɲɛɛɠulazu sù.
19 Bɔ̀ɔlaiti kpein ta luazu bà.
Niiti gè ti nɛɛni ʋɛ gola, naati ti ʋoluavega bà.
20 Gè vɔa ɠae ma,
ta gè ʋalaga anii pɛ ma.
21 À màawɔinɠa, à màawɔinɠa, wɔiti wo ga bɔ̀ɔlaiti!
Mazɔlɔɔ GALA zeei ɠa é dòɠani.
22 Leeni vaa zu wo ʋilɛsu pòlu, eɠɛʋelei GALA ge ʋilɛsu da pòlu?
Wo la dɛ ɓɔlɔni ɓaa ga kpùsɛi ɓɔlɔ vai?
23 «Ee, ni nui ta ɠa dàawooiti sɛʋɛ!
Ni nui ta ɠa yeeʋozɛ ti ʋa, ti zɛʋɛ sɛʋɛi zu!
24 Ti zoo ti kɔlu ɠaazoɓagi zeɠe, ti sɛʋɛ la fasai ma,
ti kena kpui ziɛ su, sulɛi, é yɛ ná eyɛsu ɠɔ!
25 Gè kwɛɛ gè ɠɛ ùnmɔɔ nui ɠa vulua,
tɔ ɠa é wuzeɠezu ga gaaɓelagi eteai zu.
26 Niima ɓusɛi ɠoloɠologa ʋoluma,
nà ɠɛ kpùsɛi zu, gè GALA ka.
27 Nà ka nà ɓɔɠɔi ga gàazuʋɛ.
Nà ka ga gàazuʋɛ, nu ɠili nɔnɔ laade.
Ee! Zìi ɠa ɠalazu kòozu ga maaɓɔungi naa wo fai.
28 Wa ɓɔɠɔ ɠaazaɠasu ga, gá ʋilɛ polu ɠale?
Goozuɠulagi ɓɛgele ɠa ada tukpɔ la?
29 À lua boɠa zɔkpɔi ʋa,
mazɔlɔɔ maaɠoloi ɲɔu ʋe, nii é ɠɛɛzu ga boɠa zɔkpɔi,
naa ɠa a kɛ wo suɠwɛɛ ga tukpɔɠaaleʋei ɠa ná!»