22
Elifaze ná-kpɔɛzuɠulai zaʋasiɛi
1 Teman nui Elifaze kpɔɛi lɔɔzeini, é ɠɛ ma:
2 «Nui losu ɠa zoo nɛi é ɠɛ Ɠɔoɠɔ GALAGI ʋɛ?
Ɠima nui ɠa botii ɠɛɛzu ɓɔɠɔ nɔ ʋɛ.
3 Kɛlɛ Zɛbɛi-Pɛ-Maliɠii ná-kulanumai ɓɛgele ɠa é ɗa-lelebodai zu?
Leeni ɠa a sɔlɔɔ, ni è-ziɛ ʋelei a zɔlena?
4 È laaʋɛ da, ga toɠa è maaɠolozu, é è lukpɔ,
tɔɔzei ɗa unmaayeizu ná-zobogi wu?
5 È la ɓɔɠɔ ɠɛɛni ga sɔba nu tooma vaa mɔinmɔin su ɓaa?
Kwɛ ka nɛi ɗa-vaaɠaazagiti ba?
6 È ɠɛni kpɔunmai ɠulazu è-zeiɲɔɠɔiti zea, un ge la ba.
È ɗa nuiti ta-zeɠeiti kula ti ma, eyɛsu è ti maaɲakai ʋilɛ.
7 Nui kpɔɔle wɔin ma, è la ɠɛni ziɛ veeni naa ya.
Nui pului ɠɛni ma, è naa ɠomani ga daamianigi.
8 È zooi lɔɔni tooma nui yeezu.
Nui nɛai è ʋɛ, naa nɔ ɠa è ɠɛni seizu ɓɛtɛzu.
9 È ɠɛni yeeɓesu poanzaiti ba, ti li ga yeaɲaka.
È ɠɛni podointi suvikɛi ɠulazu ti ya.
10 Wɛlɛ, naa ɠa é ba, baliiti daai è maaɠoolizu,
gaamago nɔ, dualua golai è zogɛ.
11 È la kpidii naati kaazu ɓaa,
ziɛi naati kpein ti è maaɓɔlesu?
12 «GALA ge la geeɠɔlɔgi zu ɓaa?
Geezuʋɛ ʋɛtɛ, ná ɠaaɠoozaai, somideɠaiti ɲɛkpɛai ga!
13 È woo ɠaaɓela ga: ‹GALA ka zoo nɛi é suɠwɛɛ?
Toɠa zoo nɛi, é ɓudɛ tonaɓiingi maazu, é tukpɔi ɠaaleʋe?
14 Tonaɓiingiti gaaɠiligɛ gola GALA gaazu, é la ani nɔpɛ kaa,
siɛgi zu é ziɛzu la, é ɗa lati geeɠɔlɔgi ma.›
15 «Ɗa pɔ è yɛ pele wɔlɔmai ʋolu,
nii telebotala nuiti ti ziɛni la?
16 Ungo, ti leʋeni ga ma yeeluɠɔ,
eɠɛ siɠigi nii ziɛ ɓoigi yeizu la.
17 Tɛi ti ɠɛni ɠɛɛzu GALA ma: ‹Maaɠooza gi ʋa!
Toɠa ga Zɛbɛi-Pɛ-Maliɠii, leeni ɠa a zoo é kɛ ga giye?›
18 Anɛɛ naa ʋe, tɔ ɠa é ta-ʋɛlɛiti buulaaveni ga ani ʋagɔiti.
Faa ɲɔu ɠɛ nuiti ta-lɛnɛ gooi maaɠoozani bà.
19 Telebo nuiti ta ti-ɠoloɠolosuʋɛ ɠa, ti ɠoozunɛ.
Sɔbalala nuiti ta ɲɛɛɠula ti zu, ti ɠɛ ma:
20 ‹Ungo, ade zili nuiti pɛtɛ, ti ɠoloɠologa!
Nii dɔi ti zɛni, abui naati galani.›
21 «À yɔɠɔzuɓɛtɛ wa GALA, ziilɛigi ɠaiziɛ wo yɔɠɔzu wa tɔ.
Ʋele ɠana undaanɛɛi a ɠaaɠale ma la è ma ʋolu.
22 Kalagi zo tɔ ɓɔɠɔi bosu ga ɗe,
ɠizɛ daawooiti su.
23 Ʋa ʋolu Zɛbɛi-Pɛ-Maliɠii ʋɔ, toɠa è zei ʋele ɓɛtɛ ʋolu,
telebotala vai kpein maaɠooza è-zeizuʋɛ ʋa.
24 Zanugi é è ya, pili ya zooi ma,
ɓaa è zanu kitei yɛ kɔtuɗɛi ma ɠɔtui saama.
25 Naazu Zɛbɛi-Pɛ-Maliɠii ɠa ɠɛ è ʋɛ ga zanugi, ta wali wola.
26 Mazɔlɔɔ naazu, ɗa GALA Zɛbɛi-Pɛ-Maliɠii ná-fai ɠɛ ga è yiima vai,
ɗa ɠaazuʋɛ wuzeɠe, è to GALA ba ga ladalai.
27 Ɗa wooɠula ma, toɠa è wooɠaaʋote,
ta ɗa ɗa-minazeɠegiti daazeeli.
28 Ni ɗa deve wona, naa laa ɠa zeeli è ʋɛ,
wozakalagi ɠa volo ɗa-ʋeleiti kpein su.
29 Ni nui ta ɠa ná kpɔlɔai, ɗa buzeɠe.
Mazɔlɔɔ GALA ka ɗa ɓɔ naa ʋa, nii é ga ɓɔɠɔmaayei nui.
30 Toɠa sɔba nui unmɔɔ ɓalaa.
È-yee ɲadegaiti saɓui zu ɠa zunui naa a ɠizo da.»