24
1 «Leeni vaa zu, Zɛbɛi-Pɛ-Maliɠii la yeeɠɛɠala leʋezu ba, é ʋa ná-tukpɔi ɠaaleʋe?
Leeni vaa zu, niiti ti kwɛɛ, naati ti la naama voloiti kwɛɛ?
2 Ta kwɛma ɠɔtuiti seɠezu ti-laazuʋɛti.
Ta baala kpulugiti unmazu, ti ɗa ti lo.
3 Ta podointi ta-zoovalegi zeɠezu ʋɛ,
ti poanzai ná-nikɛi zeɠe ga kpɔunmai.
4 Ti ɗa bala nuiti kaka pelei ʋa.
Kɛni nɔ maanɔɠɔ nuiti ti zooi zu ti ɗa lɔɔɠu.
5 Wɛlɛ, eɠɛ dɔɓɔ zoovalegiti ti ʋuuni teʋebai zu,
maanɔɠɔ nuiti ta liizu sobuzobui boti ɠɛɛzuʋɛ, ti ɠɔnɔgi ɠaiziɛ.
Teʋebai zu nɔ ɠa daamianigi a zɔlɔɔ ná ti-lointi bɛ.
6 Kɛni ti tufai leʋe ɓalaɠai zu,
ti nu ɲɔi ná-leezɛn ɓelei ma waai ɠula.
7 Ta laazu kpidii ga ti maaɲakai, seɠe la ti ma,
pɛɛmazeɠe la ti ʋɛ ɲɛgɛlɛin kɔɔlɛi laalɔɠɔma.
8 Gizeiti su lonai ti yɛɓɛni,
tɛi dɔɔɠuzu la ɠɛni ti ʋɛ, ti liɓini fasai ʋa.
9 «Ti podoin volo dee ɠobu ga maaɓaai,
ti kpɔunmaiti kula maanɔɠɔ nuiti zea.
10 «Ti ɗa li ga ti maaɲakai, seɠe la ti ma.
Pului ti ma, ti ɗa molo ɠiliiti mɛɛn.
11 Ti ɗa wolive wulɔi ɓɛtɛ nu ɠiligiti bɛ,
ti ɗa dɔɔɓɔigi ɓɛtɛ, anɛɛ naa ʋe, kpɔɔle wɔin ɠa ti ma.
12 «Nuiti ta kpalagi wosu taazuʋɛ.
Nuiti ti maawanaai, naati ta kpeei loozu, ti ɗa kpɔbai ɠaiziɛ.
Kɛlɛ GALA ge la daazu ma, é ʋa ɠidɔɔ kaka fai naa wu!
13 «Foloi la nɛɛni faa ɲɔu ɠɛ nuiti bɛ,
ti la ziɛ ga pelei suɠalagai,
ti la loga miná pɛ.
14 Nu ʋaa nui ɠa ɗa wuzeɠe ga sobui,
é bala nui ʋaa ta maanɔɠɔ nui.
Kpidii é ɓɔɠɔ ɠɛ ga unma nui.
15 Wɛɛnziɛ nui ɠaazuɠɛzɛi ɠa ɗa fitili pɛɛzuʋɛ maaʋɛɛnɛ,
é ɠɛ ma: ‹Nu nɔpɛ ge la kàazu,›
é ɠaazuʋɛ maalɔɔɠu ga seɠei.
16 Kpidii ɠa unma nuiti ta ɗa pɛlɛiti baaɓota la,
foloi, ti la, ti pɛlɛi laaɠulu ɓɔɠɔ ma,
wozakalagi ma ɠisiɛ pa ge la ti ma.
17 Nui niiti ta-voloi ɠa ɗa tɔɔzei ga kpidii,
ti ʋɔ ka kpidii ma maalua vai ʋa.
18 «Kɛlɛ wɔun, wo vaa bu, ga faa ɲɔu ɠɛ nui ɠa veɠa ziɛi ɠa, é ɗa yei.
Zooi é zea eteai zu, miná ɠa voovoo,
é la mɔ ziaa ga ná-leezɛn ɓelei ma ʋeleiti.
19 Ʋelei foloi ma liegi a ɗa kɔɔlɛ vukɔi ma ɗɛi ɠaawuun da,
zekana, kotoba nuiti ti ʋaazu ɲɛɛlɛzu la gɔvɛalaazu.
20 Anzanui é gaazulaa etea ma, é kula su, naa ɠa yeema ma,
koegiti ta ma ʋoomai ɠɛ ga laamiani pagɔ,
nu la mɔ ɠigaiziaa ná-faa zu.
Kotoi lɔɔ ɠa ɠula eɠɛ gulu wola.
21 «Maalo anzanui, nii dounɠa ti la bɛ, ta naa zopele ɲɔuzu,
ti la ta-nuɓɔɠɔla ɠulazu kɛlɛma poanzaiti bɛ.
22 Kɛlɛ zɛbɛi ɠa GALA ba ga é totuɠɔ nu ɲɔiti kpɛ.
Siɛgi zu GALA ge wuzeɠezu la,
kito ge la mɔ naama nuiti bɛ ga ta yɛ vulua.
23 GALA ka ɗa ti yɛ ná yeeta, ti ɓɔɠɔ ɠa ga ziilɛigi ɠa ti su,
kɛlɛ gaazu ɠa ti-ziɛ ʋeleiti ba.
24 Tiya ɠa yeeɠɛɠala go nɔ laawu, ti wuzeɠeni, naa ʋolu ti ɲɛɛlɛ.
Ti looni bu, eɠɛ nuɓusɛi kpein kɛʋele, wɛlɛ ti leʋea ga.
Ti leʋea ga, eɠɛ ani ɠɔpɔgi mɔai.
25 Nii nɔ̀un gè bogai, toɠa ga ɠitei!
Ɓɛ ɠa a zoo é kɛ̀ ga zɛɛ nu?
Ɓɛ ɠa a nà-kpɔɛzuɠulaiti ka ga wafuun faa?»