4
Elifaze ná-kpɔɛzuɠula mɔungi
1 Teman nui Elifaze kpɔɛi zeɠeni, é ɠɛ ma:
2 «Nu ɠa zoo nɛi é woo ɲɛ gila bo è ma? È wola iɲɔteʋeʋɛ!
Kɛlɛ ɓɛ ɠa zoo é maaɠɛ kpɔ?
3 Wɛlɛ, ɗa ɠa è ɠɛa nu mɔinmɔin kalasu,
è ti iɲɔdɔ, tɛigiti ti-yee zuɓɔlɔni.
4 È ɓɔɛ wooiti ti ɠɛni naama nui wuzeɠezu nii é ɠɛni loozu,
è ɗa naati sɛbɛlɔ, niiti ti-ɲiibiiti suɓɔlɔai.
5 Niizu ɗa ɠa è iɲɔ ge leʋea siɛgi zu maanɔɠɔi è ma la!
Tɛi ɗa ɠa pilɛgai è ʋa, è ɠɛa unga wuulee!
6 Ɗa-ɠidaaleʋei è bo ga GALA ma, naa laade é ʋa ɠɛ ga ɗa-ladalai ma ungi ɓaa?
Ɗa-lelebodai la ga ɗa-ɠitogi ɓaa?
7 Ɠisiɛ lɛɛ, sɔbalala nui ɓɛgele ɠa undaaʋiliga?
Sɔle nui ɓɛɛni ka ti zuɠoloɠologa?
8 Ʋelegi gè ɠidaa bu la,
zɔiti ti telebotalai ta nimizai vazasu,
ta ɗa ti-ɠaawaai ɠula.
9 GALA daa viilɛi ɠa ɗa ti undaaʋili,
toɠa ɗa ti ɠala ná-ziiɠaawanai zu.
10 GALA ka ɗa zalaiti daaɠulu, ta ɠɛna zikɔa,
é zala ɓokpagiti ɲiigaiti galeɠale.
11 Daamiani balagi ɠa ɗa zalai ʋaa,
zala yiʋoiti ti vaza.
12 «Wooi ta zeelini mà dɔɔɠuzu,
gòiyeɠe ma woo goi mɛnini, é ɗa wo vaa,
13 segi zu, kpidii, siɛgi zu kisiɛiti supuai la,
siɛgi zu ɲiimɛni wolai leʋeai la ga nuɓusɛiti.
14 Gè ɓalini ga duai,
kàeiti su ɠɛ yɔɔɠɛ.
15 Fiilɛi ta ma zii ʋuuni gàazuʋɛ,
é kɔɔlɛ ɓooi yei ga ze.
16 Nui ta ɠɛni loni gàazu, gè la ɠɛni baaɠulaba ɠwɛɛ,
kulakɛlɛmai naa ɠɛni gàazu.
Gè woo goi ta mɛnini, é ɗa wo vaa, é ɠɛ ma:
17 ‹Nuɓusɛi ɠa lelebo nɛi ɓaa GALA gaazu?
Nui ɠa zoo nɛi é ɲade Kpɛtɛ Nui ɠaazu?›
18 Ni GALA ge la zooga é ʋa ʋoluzei tɔ ɓɔɠɔi ná-botiɠɛ nuiti ba,
ni é kaka fai ɠaa ná-geezuɠeelaiti su,
19 toɠa zoo ɠale ʋoluzeizu nuɓusɛiti ba, ti ɓɛtɛai nɔ ga penɛi,
ti ga fufiligi, nu a kpɔnɛkɛlɛ eɠɛ ɓaɠaɓaɠai.
20 É zo sobui ma, é ʋa li kpɔkɔi ʋɔ, ti ɠɛa ga fufiligi,
ti ɲɛɛlɛ eyɛsu ɠɔ, nu ɠi ge la loa ti zu.
21 Ti-yɛnvui ma ɠalui leʋea ga,
ti za, ti la ɠimalai zɔlɔɔni.»