12
Zii ɠɔɔi Efelayime ta Galaade yɔɠɔzu
1 Efelayime wolodai ma zunuiti ti ɠaalɛɛni ba, ti Zuludɛn ɓudɛ, ti li Safon, ti ɠɛni Zɛfetee ma: «Leeni vaa zu è leʋegai, è li, è kɔɔi ʋɛɛ Amɔn nuiti ba, è la gi lolini, gi ʋa ʋilɛ è ʋolu? Gá pɔ gi ɗa-ʋɛlɛi ɠala, gi è ɓɔ ba, è ɠala.»
2 Zɛfetee ti wooɠaaʋoteni, é ɠɛ ti ma: «Kpɔɛ wola ɠa é ɠɛa loni gi ʋa gá nà-nuɓusɛiti, é lo gi yɔɠɔzuʋɛ ʋa gá Amɔn nuiti. Siɛgi zu gè wo lolini la, ga wo ʋa wo ɓɔ bà, wo la ʋaani wo ʋa ɓɔ bà, wo ʋa kùla ti ya.
3 Siɛgi zu gè kaani la ga gè la zooga ɠitosu wo ʋa, gè ɠikulani zɛ̀nvui zu, gè liini nà ɠila, gè Amɔn nuiti sakpe. Ɠɔoɠɔ GALAGI ti lɔɔni zèezu. Lee vaa zu za wo ʋaazu dàalɔɠɔma, ga wo kɔɔ ʋɛɛ bà?»
4 Efelayime nuiti ti ɠɛni ɠɛɛzu: «Wa ya, Galaade nuiti, wa ga Efelayime nuiti ti ʋelaai, ti li Manasee.» Naa ɠa é kɛɛni, Zɛfetee Galaade zunuiti kpein gaalɛ ba, é kɔɔi ʋɛɛ Efelayime nui naati ba, ti pilɛ sɔlɔɔ ti ma.
5 Galaade nuiti ti Zuludɛn maaleʋesuʋɛti soni Efelayime letemaʋɛ. Pela nuiti ti ɠɛni zeɠezu Efelayime, naa ta a la ɠɛna: «Nà pɔ gè leʋe,» Galaade nuiti ti ɠɛni gaazaɠasu, ti ɠɛ ma: «Ɗa ga Efelayime nuiti ta?» A la ɠɛna ti ma: «Ɓa-o,»
6 ti ɠɛni ɠɛɛzu ma: «Ɗa ɠɛ ‹Siɓɔlɛte.› » É ɠɛni ɠɛɛzu «Ziɓɔlɛte,» mazɔlɔɔ ti la ɠɛni zoosu ti ʋa bo ga pagɔ. Naa ɠa é ɠɛni kɛɛzu, Galaade zunuiti ti ɠɛni ti zosu, ti ɗa ti ɠɔdaaleʋe Zuludɛn maaleʋesuʋɛ. Efelayime zunuiti ti undaaʋilini naama vai zu, é ɠɛni ga nu waaʋuunaani maazu fele (42 000).
7 Zɛfetee ɠɛni ga tukpɔɠaaleʋe nui Izelayɛle yooi zu kona dɔzita laawu. Naa ʋoluma Galaade nui Zɛfetee zaani, ti maaɠuluni Galaade laa wolai ta zu.
Iɓesan ta Elon ta Aɓedon,
tukpɔɠaaleʋe nuiti
8 Tɔun poluma, Ɓɛteleyɛme nui Iɓesan ɠɛni ga tukpɔɠaaleʋe nui Izelayɛle yooi zu.
9 É doun zunu ʋuusaʋagɔ (30) zɔlɔɔni, ta doun anzanu ʋuusaʋagɔ (30), é ti veeni Izelayɛle wolodama ɠiligiti bɛ ga anzai, é anzanuiti fuluni ná-doun zunuiti bɛ, ti ɠula Izelayɛle wolodama ɠiligiti su. É ɠɛni ga tukpɔɠaaleʋe nui Izelayɛle yooi zu, kona dɔfela laawu.
10 Naa ʋolu, Iɓesan zaani, ti maaɠulu Ɓɛteleyɛme.
11 Tɔun poluma, Zaɓulɔn nui Elon ɠɛni ga tukpɔɠaaleʋe nui Izelayɛle yooi zu kona puugɔ laawu.
12 Saai ma, ti maaɠuluni Ayalon, Zaɓulɔn yooi zu.
13 Tɔun poluma, Aɓedon, Pilaton nui Ɠilɛle ná-doun zunui ɠɛni ga tukpɔɠaaleʋe nui Izelayɛle yooi zu.
14 É doun zunu ʋuunaanigɔ (40) zɔlɔɔni, ná-dounloin ɠɛni ga puusaʋagɔ (30), ti ga zunuiti, ti pɛ ti ɠɛni zeizu soovale ʋuulɔfela (70) ɠɔma. É ɠɛni ga tukpɔɠaaleʋe nui Izelayɛle yooi zu kona dɔsaʋa laawu.
15 Naa ʋolu, Pilaton nui Ɠilɛle ná-doun zunui Aɓedon zaani, ti maaɠulu Pilaton, Efelayime yooi zu, Amalɛke nuiti ta-ɠize yooi zu.