18
Zou ɠaiziɛ vai Dan mavofodaiti bɛ
1 Naama ziɛgi zu, masa ge la ɠɛni Izelayɛle unda. Dan mavofodaiti ti ɠɛni zou ɠaiziɛzu, ʋɛ ta zei ná. Mazɔlɔɔ eyɛsu naama ziɛgi zu zeeli, ti la ɠɛni dɛ zou zɔlɔɔni Izelayɛle ʋɛlɛyeɠei zɔiti saama.
2 Dan mavofodaiti ti zunu ɠɛzɛɠɛzɛ dɔɔlugɔ ɠulani ɓɔɠɔ zaama, ti zeɠe Sɔleya ta Esetawɔle, ti li ti zooi ʋɛtɛ, ti ziɛziɛ su. Ti ɠɛni ti ma: «À li, wo zooi zuʋɛtɛ.»
Ti zeelini Efelayime ɠize yooi zu, eyɛsu ti li Mika ná-pɛlɛi wu, ti ɲi ná.
3 Ti maaɓuɠaai ma Mika ná-pɛlɛi ʋa, ti Leevi zunu loungoi wooi ʋaaɠulabai ɠwɛɛni, ti ɠale ma, ti ɠɛ ma: «Ɓɛ ɠa paai ga ɗe ʋɛ? Leeni ɠa è kɛɛzu ʋɛ? Leeni vaa zu è yɛsu ʋɛ?»
4 Nii kpein Mika kɛɛni bɛ, é naati boni ti ma, é ɠɛ ti ma: «Toɠa ɗa sàla, gè ɠɛa ga ná-zalaɠa ɠula nui.»
5 Názu ɠa ti ɠɛni ma la: «Gá è maanɛɛnɛzu, GALA gaazaɠa dɛɛ, gi kwɛɛ ni siɛi gi tɔɔzeiɗa, toɠa zoloo.»
6 Zalaɠa ɠula nui ti wooɠaaʋoteni, é ɠɛ ti ma: «À li ziilɛigi zu, Ɠɔoɠɔ GALAGI ɠa wo ʋa, siɛi zu wo tɔɔzeizu.»
7 Zunu lɔɔlugɔi naati ti liini, ti zeeli Layise. Ti nuɓusɛiti kaani ti zeini ná, ti laai ɓɔɠɔ la, ga Sidɔn nuiti kɛʋele, ti yiilɛiɗai kitogi zu. Nu nɔpɛ ge la ɠɛni ti ɓɔlɔzu ti-maaɠoolii zu, ɓaa é ʋa zei ti unda. Ti maaɠoozani Sidɔn nuiti ba, kpɔfaama la ɠɛni ti yɔɠɔzu ta nu nɔpɛ.
8 Zunu lɔɔlugɔi naati ti ɠaleni ma, ti li ti-ɠɛɛleaiti pɔ bɛ Sɔleya ta Esetawɔle, naati ti ɠɛni ti ma: «Lee vaa ɠa siɛi ma?»
9 Ti ɠɛni ti ma: «À wuzeɠe! Ade lɛ ti laalɔɠɔma, mazɔlɔɔ gi zooi ɠaaʋɛ, gola ʋagɛ. Toɠa ɠale! Wa zeini nɔ, wo la faa wosu! À mina ɠɛ ga dɔɔʋɛ nui. À pele zo, wo li wo zooi naa zo!
10 Wa zeelina náʋɛ, wa nuɓusɛiti ka ná, ti laai ɓɔɠɔ la. Zou ʋe gola wɔɔlɔai, GALA ge fea wo ya, ada ʋe nu la ʋalaga ani nɔpɛ ma ná, anii nii kpein nɔ é eteai zu.»
11 Zunu undɔzita (600), Dan mavofodaiti su, naati ka ti ta-ɠɔɔɠɔ zɔɔlaiti seɠeni, ti zeɠe Sɔleya ta Esetawɔle.
12 Ti lɛɛni, ti kɔɔlaɠai ʋu Kiliyate-Yeyalime ʋoluʋɛ, Zuda yooi zu. Naa ɠa é ba, naama adaʋɛ laasei pɛai ga Maɠanee-Dan, zaaɠaza (nii poluʋɛ ga «Dan ná-kɔɔlaɠai»).
13 Ti zeɠeni miná, ti li Efelayime ɠize yooi zu, eyɛsu ti zeeli Mika ná-pɛlɛi wu.
14 Zunu lɔɔlugɔi niiti ti liini Layise yooi zuʋɛtɛsu, naati ti ɠɛni ti-wɔɔlaiti ma: «Wo suɠwɛɛ nɛi ɓaa, ga zalaɠa ɠula zeɠei ɠa pɛlɛi nii ta wu, ta pɛlɛ wu zaleiti, ta vololibai, ta kɔɔɠɔ ganigi taɠili, nii é ga kɔlu ɠaawuungai? À naa leve, nii wa kɛ.»
15 Ti ɠaleni ma miná, ti lɛ Leevi zunu loungoi ná-pɛlɛi wu, Mika ná-pɛlɛi wu, ti tuʋɔgi wo.
16 Názu niina, Dan mavofodaiti, nu undɔzitai (600) niiti kɔɔɠɔ zɔɔlai ɠɛni ti ya, ti ɠɛʋele ɓɛtɛai kɔɔɠɔ vai ma, naati ti ɠɛni loni pɛlɛlaʋɛ.
17 Zunu lɔɔlugɔi niiti ti liini zooi zuʋɛtɛsu, naati ti lɛɛni, ti vololibai zeɠe, ta zalaɠa ɠula zeɠei, ta pɛlɛ wu zaleiti, ta kɔɔɠɔ ganigi, nii é ɠɛni ga kɔlu ɠaawuungai. Zalaɠa ɠula nui ɠɛni loni pɛlɛlaʋɛ ta nu undɔzitaiti (600) niiti kɔɔɠɔ zɔɔlai ɠɛni ti ya.
18 Zalaɠa ɠula nui zɔiti kaai ma, ti lɛ Mika ná-pɛlɛi wu, ti vololibai zeɠe, ta zalaɠa ɠula zeɠei, ta pɛlɛ wu zaleiti, ta kɔɔɠɔ ganigi é ga kɔlu ɠaawuungai, é ɠɛni ti ma: «Leeni ɠa wo kɛɛzu miná?»
19 Ti gooɠaaʋoteni, ti ɠɛ ma: «Maaɠɛ kpɔ! Yeeʋɛɛ la, è ʋilɛ gi ʋolu, ɠɛ ga ɠɛɛɠɛi gi ʋɛ, ta zalaɠa ɠula nui. Fizɔgɛ è ma nɛi ɓaa, è ɠɛ ga zalaɠa ɠula nui zunu ɠilagi nɔ ʋɛ, ɓaa è ɠɛ ga zalaɠa ɠula nui bolodai ʋɛ, ta pɛlɛyeɠei ʋɛ, Izelayɛle yooi zu?»
20 Zalaɠa ɠula nui wola ɠoozunɛ naama vai zu. É zalaɠa ɠula zeɠei zeɠeni, ta pɛlɛ wu zaleiti, ta vololibai, é ʋilɛ nuɓusɛiti saama.
21 Ti pele zoni, ti ɗa li, ti doungoiti toni luɠɔ, ta toganiiti, ta kasɔiti.
22 Ti maaɠoozaai ma Mika ná-pɛlɛi ʋa, Mika zeiɲɔɠɔiti ti ɓɔɠɔ lolini, ti ʋilɛ Dan ná-nuiti polu.
23 Ti ɠɛni kpeei loozu Dan ná-nuiti polu, naati ti ɠaleni ma, ti ɠɛ Mika ma: «Leeni ɠa kɛai, è toligi wosu ɠana?»
24 É ti wooɠaaʋoteni, é ɠɛ ti ma: «Nà-galagiti gè ti ɓɛtɛni, wo ti zeɠea, é ʋɛɛ zalaɠa ɠula nui ʋa, wo lia ga tiye, lee ɠili ka niina zɛgai zèa, wa gaazaɠa mà vaa zu?»
25 Dan ná-nuiti ti gooɠaaʋoteni, ti ɠɛ ma: «Mina gi woizuɓɔlɔ! Tanisu gi zaama, nui tanigaa yiiɠaawana, ti loo è ma. Toɠa ɠɛ ga è undaaʋili faa, wa ɗa-ʋɛlɛyeɠei.»
26 Dan ná-nuiti ti pele zoni, ti ɗa li. Mika kaai ma ga ta-zobogi wɔɔlɔʋɛ nɔnɔi ʋa, é ɠaleni ma, é li ná-pɛlɛi wu.
Dan mavofodaiti ti zei vai Layise
27 Nii kpein Mika kpɛtɛni, zekana Dan ná-nuiti ti naati seɠeni la, ti li ga tiye, é ʋɛɛ zalaɠa ɠula nui ʋa, é ɠɛni zea. Naa ʋoluma, ti laalɛɛni Layise wu, ti nuɓusɛiti paa, niiti ti ɠaalɛini, ti laai ɓɔɠɔ la, ti zeini ziilɛigi zu, naa ʋolu ti abui loni taai ʋa.
28 Nu nɔpɛ ge la ɠɛni ʋaani, é ʋa ɓɔ ti ʋa, mazɔlɔɔ ti maaɠoozani Sidɔn yooi ʋa, kpɔfaama la ɠɛni ti yɔɠɔzu ta nu nɔpɛ, ná ɠɛni nɛmɛi zu, nii é Ɓɛte-Leɠɔɓe.
Dan ná-nuiti ti taai loni ʋolu, ti zei ná.
29 Ti taai laasei pɛɛni ga Dan, ti-mɛmɛwola Dan laaseigi, Izelayɛle ná-doun zunui, kɛlɛ mɔungi daaseigi ɠɛni ga Layise.
30 Dan ná-nuiti ti vololibai naa ɠaalɔni ná, ti Zonatan zei ga zalaɠa ɠula nui, Dan mavofodaiti bɛ, nii é ɠɛni ga Gɛɛlesome ná-doun zunui, Moize ná-dounloin. Naa mavofodaiti ka ti ɠɛni naama wotii ma, eyɛsu ti li ga tiye duɔlai zu.
31 Vololibai nii Mika kpɛtɛni, ti naa makɛni, GALA pɛlɛi nii é ɠɛni Silo, naa ná-yeeɠɛɠalai kpein daawu.