7
Zeedeyɔn
ta kɔɔɠɔ nu unsaʋagɔiti (300)
1 Poluma zobui, Yeluɓaale, nii é ga Zeedeyɔn, ta ná-kɔɔɠɔ nuiti ti ʋilɛni pelei zu, ti liini ti ʋu Ɠalɔde ziɛungi ɠobaʋɛ. Madiyan nuiti ti ʋuuni ti ɠɔʋɛzu ʋelei, é zo Mɔlee ɠizei ʋa, eyɛsu ma nɛmɛi zu.
2 Ɠɔoɠɔ GALAGI ɠɛni Zeedeyɔn ma: «Nuɓusɛi é è ʋolu, naati gola mɔinʋɛ, gè ʋa va bu, ti ʋa pilɛ sɔlɔɔ Madiyan nuiti ma. Naa a ɠɛɛna, Izelayɛle nuiti ta waso nɔ̀un ma, ti ɠisiɛ ga ti ɓɔɠɔ zɛbɛi ɠa ti ɓɔɠɔ unmɔɔgai da.
3 Niima ɠaazaɠagi wo ɗa-ɠɔɔɠɔ nuiti saama, è ɠɛ ma: ‹Ɓɛ ɠa é wo zaama, é luazu sasu ɗa ɓali? É maaɠooza Galaade gizei ʋa, é li ná-taazu.› » Ná-kɔɔɠɔ nui zunu waaʋuufele maazu felegɔ (22 000) ɠa é ɠaleni ma, é yɛni ná ga zunu waapuugɔ (10 000).
4 Kɛlɛ Ɠɔoɠɔ GALAGI ɠɛni Zeedeyɔn ma: «Kɔɔɠɔ nuiti gola mɔinʋɛ dɛ. Yei ga tiye kɔtuɗɛi ʋɔ bɛ, miná ɠa suwɛɛngi wosu ná. Nii nà ɠɛ è ma: ‹Nii ɠa ʋilɛ è ʋolu,› naa ɠa ʋilɛ è ʋolu. Kɛlɛ nii kpein nà ɠɛ è ma: ‹Nii mina ʋilɛ è ʋolu, wo ʋa li,› naa mina ʋilɛ è ʋolu, wo ʋa li.»
5 Zeedeyɔn yeini ga ná-zunuiti kɔtuɗɛi laaʋɛ. Ɠɔoɠɔ GALAGI ɠɛni ma: «Nui nii kpein a laaʋɛ ziɛi ɠa, é ɗa kpɔle ga gilɛi ɠɛʋele, naati seɠe zɔiti ba, ti ʋilɛsu ɲiibiɠa, ti ɗa ɓɔɔle, è ti ʋu yɛ.»
6 Nui niiti ti ɠɛni ziɛi ɓɔlezu, ti seɠe ga yeei, ti to la, naati ti ɠɛni ga zunu unsaʋagɔ (300). Zɔiti kpein ti ʋilɛni ɲiibiɠa, ti laaʋɛɛ ziɛi ɠa, ti ɗa kpɔle.
7 Ɠɔoɠɔ GALAGI ɠɛni Zeedeyɔn ma: «Zunu unsaʋagɔi (300) niiti ti ziɛi ɓɔlea ga yeei, naati ka gè wo unmɔɔsu ga ti maaʋele, gè Madiyan nuiti dɔ wo yeezu. Nuɓusɛi mɔtaiti ti ɠale ma ta-ʋɛlɛiti bu.»
8 Naa ʋolu, Zeedeyɔn Izelayɛle zunuiti kpein gaaɠaleni ma, ɛsɛ ge li ná-seɠe ɠotai wu, é zunu unsaʋagɔ (300) nɔ makɛ, naati ma ti ta-laamianigiti seɠeni, ta ta-ʋuʋugiti. Tama Madiyan nuiti ti ɠɛni ʋuuni ti yeeɠɔɠɔwuʋɛ nɔ nɛmɛi zu.
Zeedeyɔn zili nuiti ta-ɠɔɔɠɔ nui
ta segi wo fai
9 Naama ɓidi ná, Ɠɔoɠɔ GALAGI ɠɛni Zeedeyɔn ma: «Li, è laalɛ Madiyan nuiti bu ta-ɠɔɔlaɠai zu, mazɔlɔɔ gè ti lɔa è yeezu.
10 Ni ɗa luazu ga è yei ná, à yei ta-ɠɔɔlaɠai zu, wa ɗa-wotiɠɛ nui Pula.
11 Woilo, è naa mɛni nii ti bosu, naa ɠa è zɛbɛlɔ, ɗa yei naa ʋolu è laalɛ ta-ɠɔɔlaɠai wu.» Zeedeyɔnni ti yeini ta ná-botiɠɛ nui Pula, naati ta-ɠɔɔlaɠai ma mɔungi ʋɔ bɛ.
12 Madiyan nuiti, ta Amalɛke nuiti, ta folo ɠulazu ʋele nuiti, ti vazaga ɠɛni de nɛmɛi zu, ti mɔin gola, eɠɛ kotogiti, nu la ɓena zoo é ʋa ta-ɲɔmɛiti gaalu, ti mɔinni eɠɛ kpoloɗɛi ɠobaʋɛ ɲaɠaegi.
13 Zeedeyɔn zeeliai ma ná, wɛlɛ zunui ta ɠɛni segi zuɠulazu bɔɔlai ta ma. É ɠɛni ma: «Sèsuʋɛ, wɛlɛ wɔɔlezegi ma ɓului gila ge ɠilikilini, é li é loo Madiyan nuiti ta-ɠɔɔlaɠai zu, seeliai ma seɠe ɠotai ʋɔ bɛ, é loɠani maazuʋɛ ta buuʋɛ ʋa, é toka zooi ma.»
14 Bɔɔlai gooɠaaʋoteni, é ɠɛ ma: «Ani ɠili nɔpɛ ta ga ná, kɛni Zoase ná-doun zunui Zeedeyɔn ná-boɠa zɔkpɔi, Izelayɛle zunui, nii GALA ge zobogi veai bɛ, ga é pilɛ sɔlɔɔ Madiyan ma, ta ná-kɔɔɠɔ nuiti.»
15 Siɛgi zu Zeedeyɔn segi zu wooi mɛnini da, ta poluwo gooi, é nɔkɔni, é ɠale ma Izelayɛle nuiti ta-ɠɔɔlaɠai zu, é ɠɛ ti ma: «À wuzeɠe, mazɔlɔɔ Ɠɔoɠɔ GALAGI zobogi vea wo ʋɛ, wo pilɛ sɔlɔɔ Madiyan nuiti ta-ɠɔɔɠɔ nuiti ma.»
16 Zeedeyɔn zunu unsaʋagɔiti (300) gaaɠwɛɛni su saʋa, é puʋugi veeni kɔɔɠɔ nui ɠilagilagi pɛ zea, ta pɔlɔ liɠi zuɲakai, nii ti ɠɛni sɔmɔgi ɠaazosu, ti dɔ su.
17 É ɠɛni ti ma: «Wa ɠɛ nɔ̀un pɛtɛsu, wo ɗa naa nɔ ɠɛ, nii gè kɛɛzu. Nà zeelina nɔ feya ta-ɠɔɔlaɠai ɠobaʋɛ, nii gè kɛɛzu, wo naa ɠɛ.
18 Siɛgi zu gè puʋugi vɛɛzu la, niiti kpein ti bà, wa puʋugi vɛ wa ɓalaagi ta-ɠɔɔlaɠai maaɠoolii zu, wo ɠɛ ma: ‹Ɠɔoɠɔ GALAGI ʋɛ, Zeedeyɔn ʋɛ!› »
Ɠɔoɠɔ GALAGI zobogi vee vai
Izelayɛle ya
19 Zeedeyɔn ta zunu ungilagiti (100) ti zeelini Madiyan nuiti ta-ɠɔɔlaɠai zu, aisa kua zaamai. Naati ti kɔɔlaɠa maaɓɛɛ nuiti maavaliboni nɔ feya. Gaamago nɔ, Zeedeyɔn ta ná-nuiti ti puʋugi vɛɛni, ti pɔlɔ liɠiiti golo, niiti ti ɠɛni zoni ti ya.
20 Ti-zeizu saʋagɔiti pɛ ti puʋugi ʋɛɛni, ti ta-ʋɔlɔ liɠiiti golo. Ti sɔmɔgi zoni ga ti-ɠɔʋɛi, puʋugi ɠɛ ti-yeezai ɠa, ti ɗa fɛ, ti ɗa kpeei loo, ti ɠɛ ma: «À sogi wo ga wa-woɠa zɔkpɔi Ɠɔoɠɔ GALAGI ʋɛ, ta Zeedeyɔn ʋɛ!»
21 Ti ɠilagilagi pɛ ge yɛni loni losuʋɛ, kɔɔlaɠai maaɠoolii zu, zunuiti kpein ti ʋelani ti ɠula kɔɔlaɠai ʋa ga kpizɛi, ti ɗa kpeei loo.
22 Zunu unsaʋagɔi (300) ɠɛai ma puʋugi vɛɛzu, Ɠɔoɠɔ GALAGI vaani bu, ga tɛiti ti ɠɛni kɔɔlaɠai zu, ti ʋɛɛ ɓɔɠɔ ma ga boɠa zɔkpɔiti. Kɔɔlaɠai zu nui mɔtaiti ti ɓizɛni, eyɛsu ti li Ɓɛte-Sita, ti li ga Seleela ʋele, ti zeeli Aɓɛle-Meɠɔla taa wolai ʋɔ bɛ, Taɓate ɠobaʋɛ.
Izelayɛle ɠɔɔɠɔ nui zɔiti
ti ʋaa vai kpɔbai ma
23 Izelayɛle zunuiti ti ɠaalɛɛni ba, Nɛfetali geleiti, ta Asɛɛl ta Manasee geleiti, ti ʋilɛni Madiyan nuiti polu.
24 Zeedeyɔn keelaiti teʋeni Efelayime ɠize yooi zu ná pɛ, ti ɠɛ ma: «À yei wo Madiyan nuiti daaɠomi, wo ziɛ leʋesuʋɛti so ti luɠɔ, eyɛsu Ɓɛte-Ɓala, ta Zuludɛn leʋesuʋɛti.» Ti Efelayime zunuiti kpein tolini, ti yeini ti ziɛ leʋesuʋɛti so, eyɛsu Ɓɛte-Ɓala, ta Zuludɛn leʋesuʋɛti.
25 Ti Madiyan nuiti ta-ɠundiɠi felegɔ zoni, Wɔlɛɓe ta Zeeɓe, ti Wɔlɛɓe ʋaani fasai ma, daasei pɛai ga Wɔlɛɓe vasai, ti Zeeɓe ʋaani dɔɔ ɓɔi kpɛtɛzuʋɛ, nii daasei pɛai ga Zeeɓe ná-dɔɔ ɓɔi kpɛtɛzuʋɛ. Ti ʋilɛni Madiyan nuiti polu, ti liini ga Wɔlɛɓe nɔungi, ta Zeeɓe nɔungi, ti fe Zeedeyɔn ya, Zuludɛn ʋolu ʋelei, folo ɠulazu ʋelei.