Zowɛle
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Zowɛle ná-GALA gooiti ka ti sɛʋɛi nii zu. Nu la faa mɔinmɔin kwɛɛ, é ʋa lo Zowɛle ʋa, ɓaa é ʋa lo kɛɛɠɛ Petuwɛle ʋa. GALA Daawoo Zɛʋɛi zu ná pɛ, sɛʋɛi nii zu nɔ ɠa ná-faa wogai ná ta Keelaiti Kɛɛwotiiti su (KKw 2:16-21). Faaɠwɛ nu wolaiti ti la kwɛɛ yeeɠɛɠalai Zowɛle ná-eteai ziɛni la, ta ná-sɛʋɛi ɠɛɛ ziɛgi. Zowɛle laaʋilɛgɛ Zuda ta Zeluzalɛme ʋa, tanisu miná ɠa é ná-botii ɠɛɛni ná.
Ʋelei nɔ GALA goo wo nui zɔiti ti la GALA Daawoo Zɛʋɛi zu, Zowɛle ɓɔɛʋɛ é ʋilɛ tukpɔɠaaleʋei ʋa, é ʋaazu ziiti daalɔɠɔma eteai zu ta Zuda ɓalaa daalɔɠɔma. É ɛsɛ pɛ tɛnɛgɛ ga ti ti-ziɛ ʋeleiti maavalibo, ti ɓɔɠɔmaayei, ti GALA gaiziɛ (2:12). GALA ge zɛba é minazeɠe ga toɠa ná-Zɛnvui yei nuɓusɛi pɛ ma (3:1-5). GALA keelai Piyɛlɛ boni ga minazeɠegi naa daa ɠɛni zeelizu Pantekote voloi (KKw 2:16-21).
Unsosuʋɛ
1. Koto kpulugi vaza fai zooi zu (1:1—2:17).
2. GALA ka ʋaazu ná-nuɓusɛiti ta ta-yooi ɠizosu (2:18—4:21).
1
Kotogi ta fɔɔvɔgi ʋaa vai
1 Wɛlɛ keela wooi ʋa Petuwɛle ná-doun zunui Zowɛle sɔlɔɔni Ɠɔoɠɔ GALAGI ya.
2 À nii mɛni, wɔi wo ga kɛwolaiti!
À woilo nii ma, zooi zu nuɓusɛiti pɛ.
Anɠɛ nɛi nii ɠɛɠala vai ta ɠɛɛni wa-yeeɠɛɠalai zu,
ɓaa wo-mɛmɛwolani ta-ziɛgi zu?
3 À suɠula wo-lointi ma,
naati ɓalaa ti daazeeli ti-lointi ma,
tɔnɔ ma lointi ɓalaa ti ʋa ɗa bo ʋelela ʋele yeeɠɛɠalai zu nuiti ma.
4 Nii kotokɔliiti ti zɛgai ná,
kotogiti ti naa mia,
nii kotogiti ti zɛgai ná,
kolegiti ti naa mia,
nii kolegiti ti zɛgai ná,
kpazinɛgiti ti naa mia.
5 À wuun, wo wɔlɔ, wɔigiti dɔɔi wo zogai!
Dɔɔ ɓɔle nuiti, wo pɛ à kpee lo,
tɔɔzei dɔɔ niinɛi ɠula vai ʋa wo-la.
6 Mazɔlɔɔ ani vului ma ɠɔɔɓɔ kiligaa ti wuzeɠea nà-zooi laalɔɠɔma.
Ti mɔinʋɛ gola, ti-zɛbɛi wɔɔlɔ,
ti-ɲiigaiti kulaʋɛ ga zala zinɛi ɲiigaiti,
ti-ɓalɔɠaegiti kulaʋɛ ga zala zaai ɓalɔɠaegiti.
7 Ti nà-leezɛn ɓelei ɠɛa ga teʋebai,
ti nà-kooleɠoole guluiti suɠoloɠolo.
Ti naati suɠaleɠalea mɛtu, ti ti laaziɛ zooi ma,
naati kpekegiti ti ɠolekolega tɔɔzei ani vuluiti ti maamiiʋɛ.
8 Nà-nuɓusɛiti, à wɔlɔ,
eɠɛ anzalopoi nii é saa wɔlɔ wo seɠei loai ɠɔba,
é ɗa sinigi zaa wɔlɔi wo, nii seiɗai bɛ nɔ feya.
9 Vebɛ zalaɠai ta puya zalaɠa vai ɓega Ɠɔoɠɔ GALAGI zei ʋɛlɛi wu.
Zalaɠa ɠula nui niiti ti botii ɠɛɛzu Ɠɔoɠɔ GALAGI ʋɛ, naati ta gaalɛi zu.
10 Kpalagiti suɠoloɠologɛ,
zooi ɗa wɔlɔ,
mazɔlɔɔ moloiti suɠoloɠologɛ,
dɔɔ niinɛi ɓega,
gulɔi vɔa.
11 Tii ɠɛ nuiti ti ɓɔlɔa,
leezɛn ɓelei makɛ nuiti ta wɔlɔzu ga iɲɔteʋei moloi ta wɔɔlezegi vaa zu,
tɔɔzei nii kpein teʋeai kpalagi zu,
ti pɛ ti ɠoloɠologa.
12 Leezɛn ɓelei vɔa,
kooleɠoole guluiti ti ʋooloa,
gelenade gului ɓalaa, ta dɔɔ wului, naa ʋɛɛ pɔme gului ʋa,
gwaa wuluiti pɛ ti vɔa,
koozunɛ ɲɛɛlɛa nuɓusɛiti saama.
Toligi é lo zu so fai ʋa
ta maanɛɛnɛ vai
13 À ɓɔɠɔ maaɠili ga saa wɔlɔ wo seɠei, wo ɠɛ gaalɛi zu,
wɔi wo ga zalaɠa ɠula nuiti, wo botii ɠɛɛzu zalaɠa ɠulazuʋɛ.
À ɲi piin gaazuɠili zu,
wɔi wo botii ɠɛɛzu nà-GALAGI ʋɛ,
mazɔlɔɔ ti la mɔ ʋaazu ga vebɛ zalaɠa ta puya zalaɠa wa-ƓALAGI zei ʋɛlɛi wu.
14 À zu so kui lo, wo nuiti toli.
À kɛwolaiti gaalɛ ba ta nuɓusɛi mɔtaiti pɛ
Ɠɔoɠɔ GALAGI wa-ƓALAGI zei ʋɛlɛi ma ɠoizuʋɛ.
À wa-maanɛɛnɛ wooiti daazeeli ma.
15 Ee, maanɔɠɔ volo ɠaa!
Mazɔlɔɔ Ɠɔoɠɔ GALAGI ná foloi ná-foloi wola maaɓuɠaa,
toɠa ʋaazu ga faa zuɠoloɠologi,
nii tokoleʋeai GALA Zɛbɛi-Pɛ-Maliɠii ʋɛ.
16 Gi-ɠaazu ɠa gi-ɠɔnɔgi ʋa, é ɗa ɲɛɛlɛ,
koozunɛɛi ta kɔkɔi maa ɗa ɠooza ada-ƓALAGI zei ʋɛlɛi ʋa.
17 Ani zuwuiti ti ɗa vɔ pɔlɔ ɓui wu.
Molo ɠotaiti suɲakaiti be,
ani makɛsuʋɛti ti ɠoloɠologa,
mazɔlɔɔ moloi ɓega tɛtɛ.
18 À woilo dɛɛ toganiiti goo ma, ʋelei ti ɓalasu da!
Togani ɓulugiti ta ʋilɛni unba, ti la liizu ɠwɛɛ,
mazɔlɔɔ ti la mɔ tufa lɛnu sɔlɔɔsu,
baala kpulugiti ta boliiti ɓalaa ta vɔɔzu ɠae ma.
19 Ee, Ɠɔoɠɔ GALAGI, ɗa ɠa gè wooɠulazu è ma!
Mazɔlɔɔ abui tufa lɛnugiti mia nɔ muluu teʋebai zu,
abuzogi dɔɓɔ wului kpein gala.
20 Dɔɓɔ zuaiti ɓalaa ti ɠaaʋotega è ma,
mazɔlɔɔ ziɛ laazuʋɛti kpein ti vɔa,
tama abui tufa lɛnugiti mia nɔ muluu teʋebai zu.