GALA Daawoo Zɛʋɛi Zake 1

Zake

Ná-Sɛʋɛi

Sɛʋɛi lɔɔzeizuʋɛ ma woo mɔungiti

Nui ta nii daasei ge ɠɛni ga Zake, naa é Zake Ná-Sɛʋɛi ɠɛai. É ɠɛni tanisu ga Yesu deeloin, é ɠɛni ga totuɠɔi ta Egilisi mɔungi zu, pɔ ge ɠɛni totuɠɔiti ta-maaɓɔgi ʋa, nii é ɠɛɛni Zeluzalɛme (KKw 15:13). Keelai Pɔle daasei pɛɛʋɛ ɓalaa ga Egilisii «ma ɓɛdɛgi ta» (Gal 2:9). Faaɠwɛ nuiti daaʋɛ da ga Zake Ná-Sɛʋɛi ɠɛɛni kona ʋuulɔɔlugɔ (50) ɠɛɠala, Kilista zɔlɔɔga ʋoluma. Tɛi Zake ɠɛni ga Egilisi lotuɠɔi ta Zeluzalɛme, tanisu kɛai ma ná, názu ɠa é sɛʋɛi ɠɛɛni la.

Zake Ná-Sɛʋɛi leʋegɛ «GALA ná-boloda puugɔ maazu felegɔiti (12), ti vazagai eteai zu ná pɛ» (1:1). Kalagi niiti ti Zake Ná-Sɛʋɛi zu, ta keletiɛinti tɔnɔ, kɛlɛ wooi é bosu náʋɛ «boloda puugɔ maazu felegɔiti» (12), naa ɠa dɛɛzu ga é sɛʋɛi leʋeni ɓɔɠɔɓɔɠɔ keletiɛinti ma, ti ga Zuifuiti. Sɛʋɛi nii ɠa kala mɔinmɔin feezu, tɔɔzei teʋegɛ ga é zeeli kpɔ mɔinmɔin ma, ti kala. Zake laaɓakpagɛ kidaaleʋeiti zɔɠɔzuʋɛ ma ta kɛɛwotiiti. Kidaaleʋe ɠitei ɠa ɗa ɠula kɛlɛma ga kɛɛwotiiti (2:17). É dɛɛʋɛ ɓalaa ga kɛni nu dama ga zeelɔzɔɠɔzu vai, é lo naavolo nuiti ba (2:1-4), é ɠɛ ade dama ɓalaa ga wooi, niiti ti ɠulazu ade laaʋɛ (3:1-12).

Unsosuʋɛ

1. Zake ɠa naati tuʋɔsu, niiti ti ʋaazu ná-sɛʋɛi ɠalasu (1:1).

2. Naa ʋolu é keletiɛinti iɲɔdɔ, ga ti yiilɔɔ siɛgi zu kpɔlɔi zeelizu la ti ma (1:2-27).

3. É zɛba é ɠɛ ma, toɠa ga faa ʋagɔ ga kidaaleʋei ɠula kɛlɛma ga kɛɛwotiiti maaʋele (2:1-26).

4. Naa ɓegai ma, zɛbɛi nii a zoo ɠɛɛzu nu laawooiti ba, é naa ɓalaa lɛɛ (3:1-12).

5. Naa ʋoluma Zake dɛɛʋɛ ga GALA ná-ɠimalai ta nuɓusɛi ná-ɠimalai ti yeeɠaaɠwɛɛʋɛ gola (3:13—4:10).

6. É ná-sɛʋɛi ɠala nuiti tooni ɠisu naa ʋoluma ɓɔɠɔvaalɛsui laalɔɠɔma (4:11—5:6).

7. Zake Ná-Sɛʋɛi ɠaaɓelagɛ ga, é kiti levei tanigaa ve (5:7-20).

Tuʋɔ gooiti

1 Nɛ̀i gè ga Zake, gè ga GALA ta Maliɠii Yesu Kilista ta-wotiɠɛ nu, nà wo luʋɔsu, GALA ná-boloda puugɔ maazu felegɔiti (12), ti vazagai eteai zu ná pɛ.

Suɠɔɠɔgi ta ziilɔɔi

2 Kɛ̀ɛleaiti, siɛgi zu wo lɔɔzu la suɠɔɠɔgi ma ziiti pɛ su, à deve ga wa-ɠoozunɛ vaa wola. 3 Mazɔlɔɔ à suɠwɛɛ ga wa-ɠidaaleʋei zuɠɔɠɔ fai, naa ɠa é ʋaazu ga ziilɔɔi. 4 À ɠaaɓa, wa-yiilɔɔi laazeeli kwɛgi ma, naa ɠa a kɛ wo laazeeli, ta wo ɠaavɔni fai pɛ su, peelalazu nɔpɛ ge mina ɠɛ wo ʋa.

Ɠimalai ta GALA falii

5 Ni nui ta ɠa wo zaama, balagai ɠimalai ma, kɛni é fali GALA ma, nii a fe bɛ, mazɔlɔɔ GALA ka ɗa ɛsɛ pɛ kɔ ga faanɛɛi, zelilo faa nɔpɛ ge la ba. 6 Kɛlɛ é fali ga kidaaleʋei, é mina inɛinɛ, mazɔlɔɔ zɔi é inɛinɛsu, naa ɠulaʋɛ ga kpoloɗɛi ma lakpatakpagi, fiilɛi ɲiikpisu, é ɗa buzeɠe. 7 Naama nu zii mina ɠisiɛ ga toɠa ani zɔlɔɔ Maliɠii ya. 8 Mazɔlɔɔ toɠa ga kisupu nui, ki ge la ɠila siɛ ʋelei tanɔpɛ su.

Baladai ta naavololai

9 Ɠɛɛɠɛloin é ga bala nui, é ɠoozunɛ mazɔlɔɔ GALA ka unbuzeɠe. 10 Ɠɛɛɠɛloin é ga naavolo nui, é ɠoozunɛ mazɔlɔɔ GALA ka maayeizu. Tɔɔzei naavolo nui ɠa leʋe eɠɛ tufa ʋuai. 11 Foloi a ɠulana, ná-die golai a ɗa galai wo, toɠa ɗa siinziin ganigi vɔ, ma ʋuai loo bu, ná-pagi ɲɛɛlɛ. Zekana é la ga naavolo nui, toɠa ɲɛɛlɛ ná-botiiti saama.

Suɠɔɠɔgi ta tɛgai

12 Undaanɛ nu ɠa ga naama nui, zɔi é losu kpaan suɠɔɠɔgi zu, mazɔlɔɔ suɠɔɠɔgi ʋoluma, toɠa pilɛ sɔlɔɔ masa bɔɔlɔgi zɔlɔɔ ga ɠɔoɠɔ zɛnvui, nii GALA ge minazeɠea la naati bɛ, niiti ti nɛa ʋɛ. 13 Siɛgi zu tɛgai zeelizu la nui ta ma, é mina ɠɛ ma: «GALA ka é tɛ̀ɛzu ga.» Mazɔlɔɔ GALA ge la zooga lɛɛzu ga, é ʋa faa ɲɔi ɠɛ, tɔ ɓalaa la nu nɔpɛ tɛa ga. 14 Kɛlɛ nui ɠa lɛɛzu ga, siɛgi zu tɔ ɓɔɠɔi ná-gaazuɠulapɔi mɛɛnsu da, é yaava. 15 Tama gaazuɠulapɔi a kogi zeɠena, toɠa ɗa sɔlɔɔ ga kotoi. Kotoi laa ɠa zeelina mɛtu, é sɔlɔɔ ga saai.

16 À mina ɓɔɠɔ yɛ ná wo ʋa yaava, kɛ̀ɛleaiti, wɔi wo ga nɛ̀ɛɲɔɠɔiti. 17 Faanɛɛ ʋagɔi kpein ta vebɛanii kɛɠala la ná, naa pɛ ka zeɠezu geezuʋɛ, GALA pɔ bɛ, é ga wozakalagi ma Ɠɛɛɠɛi. Tɔun pɔ bɛ, falibo ge la ná, falibogi ma maaniini ge la ɓalaa ná. 18 Tɔ ɓɔɠɔi yiimai ɠa é zɛnvui veeni la ade ya, ga daawooi maaʋele é ga gaamai, nii a kɛ de ɠɛ tosu mɔungi zu kpɛtɛaniiti pɛ saama.

GALA daawooi mɛni, è ziɛ la

19 Kɛ̀ɛleaiti, wɔi wo ga nɛ̀ɛɲɔɠɔiti, à nii zuɠwɛɛ: Nui pɛ ge zuvilɛ ga faa mɛnigi, kɛlɛ é mina ɗa ɓɔɛ fala, é mina yiiɠaawana fala, 20 mazɔlɔɔ nui a yiiɠaawanana, é la mɔ naa laazeelia, nii é ga telebo fai GALA gaazu. 21 Naa ɠa é ba, à kɔzɔba vaiti pɛ pili ya, ta nii pɛ a nu ɠɛ ga nu ɲɔu. Wooi nii siingai wo-yiimaʋɛ, à naa zo sɛsɛbogi zu, tɔ ɠa a zoo é wo-yɛnvuiti kizo. 22 À wooi zo, wo ziɛ la. À mina kwɛ mɛnigi nɔ ʋa, wo ʋa ɓɔɠɔ yaava. 23 Mazɔlɔɔ ni nu a woilona wooi ma, é la ziɛni la, kulaʋɛ ga nui nii é ɓɔɠɔ ʋɛtɛsu pɛtɛgi zu nɔ, 24 é ɓɔɠɔ ʋɛtɛga ʋoluma, é li, é yeema gaamanɔ ɓɔɠɔ ɠɛʋelei ma. 25 Kɛlɛ zɔi é ɠaazulosu tɔ daazeeliai ʋa, nii é wɔɔlɔyai veezu ade ya, é ɠili ba, é la nɔ ga é woilo ma, é yeema ma, kɛlɛ é ziɛzu la, naama nui undaa ɠa nɛ zɔlɔɔ GALA zea, ná-kɛɛwotiiti pɛ su.

26 Ni nui ta a ɓɔɠɔ ɠaana ga GALA pele ziɛ nu, tama é la zooni nɛgi zosu, toɠa ɓɔɠɔ yaavazu, ná-GALA pele ziɛi ɠa ga wafuun faa nɔ. 27 GALA pele ɠitei ɲadegai Ɠɛɛɠɛ GALA gaazu, naa ɠa é ga nu ɗa ɓɔ podointi ba ta poanzaiti ta-ɠidaaʋiligiti su, ta è mina ɓɔɠɔ yɛ ná, è ʋa ɠɔzɔ ga niima eteai zu vaiti maaʋele.