4
Ani wɔin ɲɔi zakpe
1 Kpɔɛ vai ta sakpegiti ti wo zaama, naati seɠeʋɛ mini? Ta ɠulazu wo yiima vaa ɲɔiti su, ti kɔɔi ɠɔɔzu yeenɔpɛ wo-ɓusɛi zu.
2 Wo ɠaazu ɠa ɠulazu ani mɔinmɔin ba, kɛlɛ wo-yiimai laa la zeelizu, naa maaʋele ma wa nuiti paazu. Wa gaazuɠulapɔi ɠɛɛzu, wo la naa zɔlɔɔsu nii wɔin wo ma, naa maaʋele ma wa zakpesu, wo ɲɛpii ɠɔ. Nii wɔin wo ma, wo la naa zɔlɔɔsu, tɔɔzei wo la falizu GALA ma.
3 Ni wa falina, wo la sɔlɔɔsu, tɔɔzei wa fali ʋele ɲɔu zu, nii a kɛ wo dɔ wo yiima vai nɔ zu.
4 Wooʋalada nuiti! Wo la suɠwɛɛ ɓaa, ga eteai ná-nɛɛbɛi ɠa ga GALA ná-wɔinzeɠemai? Zɔi deɠɛmu é pɔ é ɠɛ ga eteai bɔɔlai, naa ɠa ɓɔɠɔ ɠɛɛzu ga GALA sili nui.
5 Toɠa wo ɠisu ga GALA Sɛʋɛi ɓɔɛni wafuun ɓaa, ga: «GALA wɔinʋɛ gola ga zɛnvui é seini ade-yiimaʋɛ»?
6 Anɛɛ naa ʋe, GALA ka ná-zaala wolai la de ma mɔnɔ, mazɔlɔɔ GALA Sɛʋɛi ɠɛ: «GALA ka waso nuiti sakpe, kɛlɛ toɠa ná-zaalai la ɓɔɠɔmaayei nuiti ma.»
7 Deɠɛmu à ɠolo GALA bɛ. À lo kpaan Inɛgi laalɔɠɔma, toɠa ʋela, é maaɠooza wo ʋa.
8 À maaɓuɠa GALA ba, toɠa maaɓuɠa wo ʋa. À wo-yeeiti gaagba, kotoba nuiti, wo wo-yiimaʋɛti ɲade, ɠi fele nuiti!
9 À wa-maanɔɠɔ vai ɠwɛɛ, wo ɠaalɛi, wo wɔlɔ. À wa-ɲɛɛiti falibo ga gɔlɔi, wa-ɠoozunɛɛi valibo ga gaazuɠilii.
10 À ɓɔɠɔmaayei Maliɠii ʋɛ, toɠa wo wuzeɠe.
Ɠɛɛɠɛloin lukpɔɠaaleʋe vai
11 Kɛ̀ɛleaiti, à mina woo ɲɔu wo ɓɔɠɔ laalɔɠɔma. Zɔi a woo ɲɔu wo kɛɛɠɛloin laalɔɠɔma, ɓaa é tukpɔɠaaleʋe, naa ɠa woo ɲɔi wosu tɔgi laalɔɠɔma, é ɗa tɔgi lukpɔɠaaleʋe. Tama ni ɗa tɔgi lukpɔɠaaleʋezu, è la mɔ ga nui nii é ɠolozu tɔgi ʋɛ, kɛlɛ è ɠɛa ga tɔgi lukpɔɠaaleʋe nui.
12 Tama tɔgi zei nui ɠa ɠila kpe nɔ, tɔ ɠa é ga tukpɔɠaaleʋe nui, tɔ ɠila nɔ ɠa a zoo é nu ɠizo, ɓaa é nu undaaʋili. Ɗa ɓɔɠɔ ɠaazu ga leeni, ɗɛi è è-zeiɲɔɠɔi lukpɔɠaaleʋezu?
Nu mina ɠɛ ga waso nu
13 À woilo dɛɛ gòoi ma niina, wɔiti wo ɠɛɛzu ma: «Za ɓaa lina, gá liizu taa wolai ta zu, gi kona gila kɛ ná, gi yaaɠolai ɠɛ ná, gi tɔnɔ sɔlɔɔ.»
14 Wo la kwɛɛ, nii a ɠɛ ga woye lina. Leeni ɠa é ga wa-eteai? Wo ɠɛɛʋɛ nɔ eɠɛʋelei ɓumugi la, é ɠulazu, é yeeɠɛɠala go nɔ ɠɛ, naa ʋolu é ɲɛɛlɛ.
15 Wo maanɛɛni, wo ɠɛ ma: «Ni Maliɠii a vaana bu, gá yɛ vulua, gi nii ɠɛ, ɓaa nuu.»
16 Kɛlɛ gaamazu, wa ɓɔɠɔ wɔɔlɔzu wa-wasogi zu. Ɓɔɠɔ wɔɔlɔ vai naa ma zii pɛ ɲɔuʋɛ.
17 Naa ɠa é ba, zɔi é faa ʋagɔi ɠwɛɛ, nii maanɛai é kɛ, tama, é la kɛɛzu, naama nui kotoi ɠɛa.