15
Ansaɠɔ tɔkulugi ta ma ɓekegiti
1 «Nà ɠa gè ga ansaɠɔ tɔkulu kitei, Kɛ̀ɛ ɠa é ga makɛ nui.
2 Kpekegi niiti kpein ti bà, ti la waazu, toɠa naati teʋe ga, kɛlɛ kpekegi niiti kpein ti waazu, toɠa naati gaaleʋe, naa ɠa a kɛ ti waa ʋolu mɔnɔ ga gola.
3 Wɔun, kalagi nii gè boga ga woye, naa wo ɲadegɛ niina.
4 À ɠili bà kpaan, nà ɓalaa nà ɠili wo ʋa kpaan. Ansaɠɔ kpekegi la ɗa ga zoo é ʋa waa ɓɔɠɔ ʋɛ, ni é la yɛni ma lɔkulugi ʋa, zenɔ ɠana wa ɓalaa, wo la zooga waazu, ni wo ɠiliai la yɛni bà.
5 «Nà ɠa gè ga ansaɠɔ tɔkulugi, wa ɠa wo ga ma ɓekegiti. Zɔi nɔpɛ a ɠilina bà kpaan, nà ɓalaa gè ɠili ba kpaan, naama nui ɠa gwaa mɔinmɔin bo, tɔɔzei ni gè la wo ʋa, wo la zooga faa nɔpɛ kɛɛzu.
6 Zɔi giliai la yɛni bà, naa ɠa ʋili ya kamaʋoluʋɛ eɠɛ ansaɠɔ kpekegi, é vɔ. Naa ʋolu ta ɗa ma ɓekegiti gaalɛ ba, ti ti ʋili abui zu, ti ɠala.
7 Ni wa ɠilina bà kpaan, dàawooiti ɓalaa ti yɛ wo-yiimaʋɛ kpaankpaan, nii nɔpɛ wo pɔ, à naa vali, tama toɠa ve wo ya.
8 Ni wa gwaa mɔinmɔin bona, wo dɛɛ ga naa maaʋele ga wa ga nà-kaladopoiti, naazu ɛsɛ pɛ ka Kɛ̀ɛ ná-lɛbiyai ʋɛtɛ.
9 «Eɠɛʋelei Kɛ̀ɛ nɛ̀ai la ʋɛ, zekana nà ɓalaa gè wo nɛai la ʋɛ. À yɛ nà-nɛɛbɛi zu kpe.
10 Ni wa nà-deveiti sona, wa yɛ nà-nɛɛbɛi zu, eɠɛʋelei gè Kɛ̀ɛ ná-deveiti sogai la, ta zɛ̀gai la ná-nɛɛbɛi zu.
11 «Gè niima vaiti bogɛ wo ma, naa ɠa a kɛ nà-koozunɛɛi ɠɛ wo-yiimaʋɛti, naazu wa-ɠoozunɛɛi laa ɠa zeeli.
12 Nà-devei ɠa ga: Wo ɓɔɠɔ nɛɛ ʋɛ wo ɠilagilagi pɛ, ʋelei gè wo nɛai la ʋɛ.
13 Nɛɛbɛ la leʋeni naa ʋa ga nu zɛnvui ve bɔɔlaiti ta-vaa zu.
14 Wa ga bɔ̀ɔlaiti, ni wa nà-deveiti sona, wo ɗa kɛ.
15 Gè la mɔ wo lolisu ga botiɠɛ nuiti, tɔɔzei botiɠɛ nui la ɗa ga naa pɛ kwɛɛga, nii maliɠii kɛɛzu. Nà wo lolisu ga bɔɔlaiti, tɔɔzei nii pɛ gè sɔlɔɔga Kɛ̀ɛ ya, gè naa pɛ dɛɛʋɛ ga woye.
16 Wa lɛi wo ʋa yiimazeɠe ga ze, nà ɠa gè yiimazeɠea ga woye, gè wo leʋe keela ziɛgi ma, naa ɠa a kɛ wo li, wo waa, wo ɠaawaai ɠɛ ga nii é lɛbisu. Názu, nii nɔpɛ wa fali Kɛ̀ɛ ma ga dàaseigi, é fe wo ya.
17 Nii gè wo levezu ma, naa ɠa ga: Wo ɓɔɠɔ nɛɛ ʋɛ wo ɠilagilagi pɛ.»
Eteai Yesu ta nɔnɔiti wɔinzeɠe vai
18 «Ni eteai a wo wɔinzeɠena, à kwɛɛ ga nà ɠa mɔunpa, é wɔ̀inzeɠeai.
19 Ni wo ɠɛni ga eteai nɔnɔ, eteai a la wo nɛɛ ʋɛ. Kɛlɛ tɛi wo la ga eteai nɔnɔ, nà ma, gè yiimazeɠea ga woye eteai zu nuiti saama, naa maaʋele ma, eteai ɠa wo wɔinzeɠezu.
20 À ɠizɛ naama wooi zu, nii gè bogai wo ma ga: ‹Botiɠɛ nui la leʋeni maliɠii ʋa.› Ni ti wɔ̀inzeɠeʋɛ, ta wo wɔinzeɠe nɔ ti, ni ti gòoiti sogɛ, ta wo-wooiti so.
21 Kɛlɛ màaʋele ɠa ti naama vaiti pɛ kɛɛzu la ga woye, tɔɔzei ti la naama nui ɠwɛɛ, nii é tèʋega.
22 Ni gè la ɠɛni ʋaani, gè ʋa ɓɔɛ ti ʋɔ, ti la ɠɛni ɠɛa ga sɔba nu, kɛlɛ niima ziɛgi zu niina, goozuɠula nɔpɛ ge la mɔ ti ʋɛ ta-ɠotoiti faa zu.
23 Zɔi nɔpɛ é wɔ̀inzeɠezu, naama nui ɠa Kɛ̀ɛ ɓalaagi wɔinzeɠezu.
24 Ni laavɔ ɠɛɛwotii niiti nu ɠili nɔpɛ ge la dɛ ta ɠɛɛni, gè la ɠɛni naati kɛɛni ti zaama, ti la ɠɛni ɠɛa ga sɔba nu. Kɛlɛ anɛɛ ti naama ɠɛɛwotiiti kaa, ta ba nɔ ti ɗa gi wɔinzeɠe gá Kɛ̀ɛ.
25 Kɛlɛ kɛni naama wooi a la ʋilɛsu nɔ ti, nii sɛʋɛai ta-lɔ sɛʋɛi zu ga: ‹Ta wɔ̀inzeɠezu un ge la ba.›
26 «Siɛgi zu Kpɔba Nui ʋaazu la, nii gè ʋaazu teʋesu wo ma, é zeɠe Kɛ̀ɛ ʋɔ bɛ, Gaama Yɛnvui nii é zeɠezu Kɛ̀ɛ ʋɔ bɛ, toɠa zeele wooi wo nɔ̀un bɛ.
27 Wa ɓalaa wa zeele wooi wo bɛ̀, tɔɔzei wa pòlu kaite, tɔɔzeizu munu.»