18
Zelemi lii vai pɔlɔ liɠi lo nui ʋɔ bɛ
1 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya:
2 «Wuzeɠe, Zelemi! Li pɔlɔ liɠi lo nui ʋɔ bɛ, miná ɠa è dàawooi mɛnisu ná, gè ʋaazu bosu è ma.»
3 Gè yeini pɔlɔ liɠi lo nui ʋɔ bɛ, gè kaani, é ɗa boti ɠɛ ná-diɠi losuʋɛ.
4 Diɠii é ɠɛni kpɛtɛzu, naa ɠoloɠoloni, eɠɛʋelei ná tanisu a ɗa ɠɛ la pɔlɔ liɠi lo nui ya. É taɠili kpɛtɛni, eɠɛʋelei é zolooni la gaazu.
5 Ɠɔoɠɔ GALAGI ɓɔɛni pɔ̀, é ɠɛ mà:
6 «Gè la zooga gè ʋa kɛ ga woye ɠana ɓaa, Izilayɛle ʋɛlɛyeɠei, eɠɛʋelei pɔlɔ liɠi lo nui kɛɛzu la?» Ɠɔoɠɔ GALAGI wooi ɠana. «Ʋele ɠana wo la zèa, eɠɛʋelei pɔlɔi la diɠi lo nui yeezu, ee, Izilayɛle nuɓusɛiti!
7 Ná tanisu nà ɗa ɓɔɛ zii ta ná-faa zu, ɓaa masadai ta, ga gè tɔɔɠula, ɓaa gè toka, ɓaa gè undaaʋili.
8 Kɛlɛ ni zii naa a nimizana, é zeɠe faa ɲɔi ʋolu nii gè yiiɠaawana ma su, naazu nà nà-kisiɛi valibo é ʋilɛ maanɔɠɔi naa ʋa, nii gè deveni bɛ.
9 Tanisu, nà ɓɔɛna é ʋilɛ zii ta ʋa, ɓaa masadai ta ʋa, ga é lo ʋolu, é zin.
10 Kɛlɛ ni zii naa la naa ɠɛɛni nii pagai gàazu, é la woiloni nà-tɛnɛ gooi ma, nà zeɠe faa ʋagɔi ʋolu, nii gè deveni ga gè kɛ bɛ.
11 «Ɓɔɛna Zuda nuiti pɔ, ta nuiti ti zeini Zeluzalɛme, è ɠɛ ti ma: ‹Ɠɔoɠɔ GALAGI wooi ɠaa: Gè deve woga wo laalɔɠɔma, nà ba gè ɗa maanɔɠɔi ɠɛʋele ɓɛtɛ. Ɛsɛ ge zeɠe siɛ ʋele ɲɔi ʋolu, à ziɛ wo faiti kɛ eɠɛʋelei soloogai la.›
12 Kɛlɛ ta ʋaazu è wooɠaaʋotesu ga: ‹Wafuun faa ɠa ga naa! Nii gi deveai, naa ɠa gi ziɛzu la.› »
Izilayɛle yeema vai Maliɠii ma
13 Naa ɠa é ba, Ɠɔoɠɔ GALAGI wooi ɠaa:
«À zii ɠiligiti gaazaɠa dɛɛ,
ni nu naa ɠɛɠala vai ta mɛniga!
Nii Izilayɛle kɛa, toɠa ga kɔzɔba vaa.
14 Nu ɠa ɗa kɔɔlɛ vukɔi ɠa nɛi
é zeɠe Liɓan ɠizei ma vasaiti ma ɓaa?
Nu ɠa ɗa kɔtuɗɛi ɠa nɛi ma lɛilɛigi é yeizu,
é ɗa vɔ ɓaa?
15 Anɛɛ naa ʋe, nà-nuɓusɛiti ti yeemani mà.
Ta zalaɠaiti kulazu kɔɔɠɔ ganigiti bɛ,
naati bɛ niiti ti la ga gala kitea,
ti ɗa ti ɠaka peleiti ba,
ti ɗa zeɠe ta-vaa wɔlɔmai ʋolu,
ti ɗa ziɛ ga pele ɲɔi.
16 Ti ta-yooi ɠɛa ga inɛinɛ zooi,
é ɠɛ ga ɲɛɛɠulasu anii eyɛsu ɠɔ.
Nui kpein é leʋesu ná, ti laa ɠa ɗa vɔ,
ti ɗa tɔungi ɲiikpi.
17 Nà-nuɓusɛiti ti zili nuiti ta ɠɛna maaɓuɠaa, nà ti zuvaza,
eɠɛ fufiligi nii folo ɠulazu ʋele viilɛi fazasu.
Ta-ɠidaaʋili foloi, nà ʋoluave ti ʋa,
kɛlɛ gè la ɠaaʋotega ti ma.»
Ti yaavai ɠili vai Zelemi ma
18 Naazu nui tanigaa ti ɠɛni ma: «Ade li lɛɛ, de fai ta ɓɛtɛ Zelemi laalɔɠɔma! Ada zalaɠa ɠula nuiti sɔlɔɔ nɔ yeenɔpɛ, ti ɗa ade ɠala ga tɔgi, ta ɠima nuiti ti ɗa ade lɛnɛ, ta GALA goo wo nuiti ti ɗa GALA daawooi wo ade ma. À ʋaa lɛɛ, ade laalɛ bu ga maalɔɔ ɓɔɛiti! Ade mina woilo naa tanɔpɛ ma, nii é bosu!»
19 Kɛlɛ ɗɔun, Ɠɔoɠɔ GALAGI, kɛni è dama ga nà-faa.
Woilo sìli nuiti gooi ma!
20 Nu ɠa faanɛɛi zuloo ga faa ɲɔi?
Ti zeɠei wɔa tùɠɔ, ti ʋa zɛ̀nvui ɠula zèa.
Kɛlɛ mina yeema mà, gè ɠɛni losu è ɠaazu,
gè ɗa ti maalobo ɓɔɛiti bo, ɗa-yiiɠaawanai ɗa ɓudɛ ti maazu.
21 Naa ɠa é ba, ti-lointi dɔ pului zu,
è tiya ɓɔɠɔi ti undaaʋili ga boɠa zɔkpɔi.
Ti-anzaiti ti ʋala dointi ma, ti ɠɛ ga poanzaiti!
Ti-zinigiti ti za ga ɗɔfɔ zeeɓɛi,
ta-nu niinɛiti undaaʋili kɔɔmaʋɛ!
22 Kpee wooi mɛni, é ɠula ta-ʋɛlɛwuʋɛti,
siɛgi zu è ti ziliɲɔɠɔiti kpɛtɛzu la, ti ʋa ti laalɔɠɔma!
Mazɔlɔɔ ti zeɠei wɔa kɔ̀ɠɔwu, ti ʋa sò,
ti tumɔi lɔɔɠu, ti ʋa kɔ̀ɠɔi zo da.
23 Kɛlɛ ɗɔun ɗa, ee, Ɠɔoɠɔ GALAGI,
è ta-yaava vai kpein kwɛɛ, nii ta kɛ ti pàa.
Mina ta-ɲama ʋuu vai zuvaayɛ,
mina ta-ɠotoi ɓale ɠaazu!
Ti loo bu è ɠaazu!
Wuzeɠe ti laalɔɠɔma ɗa-yiiɠaawana ziɛgi zu!