34
Gooleʋe gooi é liini
masagi Sedesiyase ma
1 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya, siɛgi zu Ɓaɓilɔne masagi Neɓukadenɛzaal ta ná-kɔɔʋɛbɛi kpein, eteai zu zalaʋusuiti pɛ niiti é ɠɛni zeini ti unda, ta nuɓusɛiti pɛ ti ɠɛni kɔɔi ɠɔɔzu Zeluzalɛme laalɔɠɔma ta taaiti pɛ ti loni ba:
2 «Ɠɔoɠɔ GALAGI, Izilayɛle ná-GALAGI wooi ɠaa: ‹Li, è Zuda masagi Sedesiyase ɠa, ɗa ɠɛ ma: Ɠɔoɠɔ GALAGI wooi ɠaa: Nà taai nii lɔɔzu Ɓaɓilɔne masagi yeezu, é gala ga abui.
3 Ɗa ʋe, è la ɠulazu zea, ɗa zosu, ɗa lɔɔzu zeezu. Ɗa losu ɠaazuni ta ɠaazu, é è ɠaazaɠa, è gooɠaaʋote, aisa è ʋa li Ɓaɓilɔne.
4 « ‹Naa pɛ ge ɠɛɛ ʋa, woilo Ɠɔoɠɔ GALAGI wooi ma, Sedesiyase, Zuda masagi! Ɠɔoɠɔ GALAGI wooi ɠaa é ʋilɛ è ʋa: È la zaa ga boɠa zɔkpɔ pa.
5 Kɛlɛ tɔun, ɗa za ziilɛigi zu. Nii é ɠɛɛni è-mɛmɛwolani bɛ, ti ɠɛni ga masagiti, naa ɠɛɠalai ɠa a ɠɛ è ʋɛ è-zaazuʋɛ: Ta ansansegiti gala è ʋɛ, ti saa wɔlɔ wuyeiti too, ti ɠɛ ma: Ee, dei! Masagi zaa! Nà ɠa gè niima wooiti bogai,› Ɠɔoɠɔ GALAGI wooi ɠana.»
6 GALA goo wo nui Zelemi niima wooiti pɛ boni Sedesiyase ma, Zuda masagi, Zeluzalɛme.
7 Naama ziɛgi zu, Ɓaɓilɔne masagi ná-kɔɔʋɛbɛi laalɛɛni Zeluzalɛme wu, ta Zuda laa wolai zɔiti siɠigi ɠɛni ti ma, ti ɠɛni dɛ ná, Lakise ta Azeka.
Duɔiti ti ʋilɛgai, ti zo faa ʋolu
8 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya, masagi Sedesiyase minazeɠegi wogai ma Zeluzalɛme nuɓusɛiti bɛ, ga duɔiti ta ɠɛ ɓɔɠɔ yeema,
9 nii a kɛ ɛsɛ ge yeeɓe ná-duɔ ʋa, zunu ɓaa anzanu, ni nɔ toɠa ga Eɓulu nui, nu nɔpɛ ge mina mɔ kɛɛɠɛloin Zuda nui zo ga duɔ, é ʋa makɛ.
10 Kundiɠii kpein ta Zeluzalɛme nuɓusɛiti, tɛiti ti zolooni naa ma, ti vaani bu, ga ti mina mɔ zunuiti ta anzanuiti suziɠa, niiti ti ɠɛni ti ya pɔlɔma duɔlai zu, kɛlɛ ti ti ʋilɛ ɓɔɠɔ yeema, ti li. Ɛsɛ ge vaani bu, ti yeeɓeni ta-luɔiti ba.
11 Kɛlɛ naa ʋolu, ti zeɠeni ta-levei ʋolu, ti ʋa ʋolu ga duɔiti ti yeeɓeni ti ʋa, ti ɓɔi ti la ga ti ɠɛ ʋolu ga duɔiti.
12 Wɛlɛ Ɠɔoɠɔ GALAGI wooi ʋa Zelemi sɔlɔɔni Ɠɔoɠɔ GALAGI ya:
13 «Ɠɔoɠɔ GALAGI, Izilayɛle ná-GALAGI wooi ɠaa: ‹Gè minazeɠe boni wo-mɛmɛwolani bɛ, voloi gè ti ɠulani la Ezipete yooi ʋa, ʋɛ ti ɠɛni ná duɔlai zu, gè ɠɛni ma:
14 Kona dɔfelasiɛi, ɛsɛ ge yeeɓe kɛɛɠɛloin Eɓulu nui ʋa é ɓɔɠɔ ʋɔdini ma. Toɠa boti ɠɛ è ʋɛ ga kona dɔzita, naa ʋolu yeeɓe ba, é li ɓɔɠɔ yeema, é zeɠe è ʋɔ bɛ. Kɛlɛ wo-mɛmɛwolani ti la ɠɛni ɠoloni gòoi ʋɛ, ti la woiloni.
15 Wɔun, wo wo-ziɛ ʋelei ɠulaa kazemazu. Gè kaani ga wo ɠilagilagi kɛɛni ga pagɔ, wo wo-zeiɲɔɠɔi ʋilɛ, ɓɔɠɔyeema vai wogai ma. Wo faa ɠilini ba ɠite gàazu, GALA sei ʋɛlɛi wu feai bɛ̀.
16 Wo ɠalega ma, wo zeɠe wa-levei ʋolu, wo dàaseigi ɠɔzɔa, wo ɠilagilagi wo ʋaa ʋolu ga duɔiti, zunuiti ta anzanuiti, niiti wo ti ʋilɛni ɓɔɠɔ yeema, ga ti li ʋɛ ná nɛai ti ʋɛ, wo ɓɔiɗa ti la, ga ti ɠɛ ʋolu ga wa-luɔiti.›
17 «Naa ɠa é ba, Ɠɔoɠɔ GALAGI wooi ɠaa: ‹Wo ɠilagilagi maanɛɛni é yeeɓe ná-duɔ ʋa, kɛɛɠɛloin, seiɲɔɠɔi. Kɛlɛ wo la gòoi zoni. Naa ɠa é ba, nà yeeɓesu kɔɔi ʋa wo laalɔɠɔma, ta ɗɔfɔ zeeɓɛi ta pului. Eteai masadai pɛ sasu ɠa ɓali, ta ɠɛna wo ɠaa,› Ɠɔoɠɔ GALAGI wooi ɠana.
18 ‹Nà zunui tɛiti dɔ yeelɔɔzu, tɛiti ti nà-minazeɠegi ɠoloɠoloni, ti la minazeɠegi zu vaiti daazeelini gàazu, ti nikɛ yiʋoi leʋesu fele, ti ziɛ ma ɓuɠaiti zɔɠɔzuʋɛ:
19 Zuda ta Zeluzalɛme ɠundiɠiiti, botiɠɛ nu wolaiti, zalaɠa ɠula nuiti, ta zooi zu nuɓusɛiti pɛ, tɛiti ti leʋeni nikɛ yiʋoi maaleʋesu felegɔiti zɔɠɔzu.
20 Nà ti lɔɔzu ti zili nuiti zeezu, niiti ti wɔinɗai ga ti ti ʋa. Ti-ma ʋoomaiti ta ɠɛ ga daamianigi wɔniiti bɛ, ta dɔɓɔ zuaiti.
21 Zenɔ ɠana, nà Zuda masagi Sedesiyase ta ná-kundiɠi wolaiti dɔɔzu ti zili nuiti zeezu, niiti ti wɔinɗai ga ti ti ʋa, nà ti lɔ Ɓaɓilɔne masagi ná-salaʋusuiti zeezu. Mazɔlɔɔ anɛɛ ni kɔɔɓɔgi naa maaɠoozaʋɛ dɛ wo ʋa,
22 nà devei ve ti ya, ti ʋa ʋolu taai tɛi daalɔɠɔma, ti laalɛ bu, ti so, ti koloɠolo ga abui. Nà Zuda laa wolaiti kɛ ga teʋebai zu ná maaluai,› Ɠɔoɠɔ GALAGI wooi ɠana.»