42
Pela wo fai ga Ezipete yooi zu ʋele
1 Salaʋusu ɠundiɠiiti kpein, é ɓɔ Kaleya ná-doun zunui Yoɠanan ʋa, ta Wosaya ná-doun zunui Yezania, ta nuɓusɛiti pɛ, ti liini,
2 ti ɠɛ GALA goo wo nui Zelemi ma: «Nii gi maaɠaazaɠabosu è ma, yeezei bu ga pagɔ: Ɗa-ƓALAGI, é ga Ɠɔoɠɔ GALAGI maanɛɛnɛ gi ʋɛ, gi mɔtaiti gi yɛgai ná. Mazɔlɔɔ gi mɔinni gola, gi maalɔiɗa, eɠɛʋelei è-ɠaazuʋɛ pɛtɛsu da.
3 Ɗa-ƓALAGI, Ɠɔoɠɔ GALAGI ɠaazaɠa, ʋɛ gá li ná, é naama ʋelei lɛ ga giye, ta nii maanɛai gi kɛ.»
4 GALA goo wo nui Zelemi ɠɛni ti ma: «Gè mɛniga. Nà ʋaazu Ɠɔoɠɔ GALAGI wa-ƓALAGI valizu, eɠɛʋelei wo bogai la mà. Naa ʋoluma, nà Ɠɔoɠɔ GALAGI ná-gooɠaaʋotegi lɛ ga woye, gè la tanɔpɛ dɔɔɠua wo ʋa.»
5 Ti ɠɛni Zelemi ma: «Gá minazeɠezu ga gá ziɛ ga naa nɔ, nii Ɠɔoɠɔ GALAGI ɗa-ƓALAGI a bo è ma, ga è bo gi ma. É ɠɛ ga gaama wo zeelei, nu la maaɠaalia, gá-minazeɠegi vaa zu.
6 É ɠɛni ga ma ʋagɔ, ɓaa ma ɲɔu, gá ɠolo Ɠɔoɠɔ GALAGI, gá-ƓALAGI wooi ʋɛ, nii gá ɓɔɠɔi gi è leʋega pɔ bɛ. Gi undaa ɠa nɛ ga ɠolona Ɠɔoɠɔ GALAGI, gá-ƓALAGI wooi ʋɛ.»
7 Folo puugɔ leʋegai ma, Ɠɔoɠɔ GALAGI gooɠaaʋotegi veeni Zelemi ya.
8 Zelemi Kaleya ná-doun zunui Yoɠanan lolini, ta salaʋusu ɠundiɠiiti pɛ ti ɠɛni polu, ta nuɓusɛi pɛ é ɠɛni ná, é zo ɓolomadɔɠɔiti ma, é li seizumaanɛgiti pɔ.
9 Naa ʋolu, é ɠɛni ti ma: «Ɠɔoɠɔ GALAGI, Izilayɛle ná-GALAGI wooi ɠaa, nii wo valini mà ga gè li, gè wo-maavai laazeeli ma:
10 ‹Ni wa yɛna zeini zooi nii zu, nà wa-nuɓusɛiti maamɔin ʋolu, gè la mɔ wo ɠoloɠologa, nà wo zapelɔ, gè la mɔ wo lɔɔɠulaa. Mazɔlɔɔ maanɔɠɔ vai gè kɛɛni ga woye, nà yee zeɠe naa ma.
11 À ɓena niina luazu Ɓaɓilɔne masagi ʋa, à mina lua ba,› Ɠɔoɠɔ GALAGI wooi ɠana. ‹Mazɔlɔɔ nà wo ʋa, gè wo ɠizo, gè la vaa bu é ʋa wo ɓɔlɔ.
12 Nà maawɔinɠai ɠɛ wo ʋɛ, naa ɠa a kɛ é nuɓɔɠɔlai ɠɛ wo ʋɛ, é wo yɛ ná, wo ɠale ma ʋolu wa-yooi zu.›
13 «Kɛlɛ ni wa ɠɛna: ‹Gi la zeizu zooi tɛi su, ni wo la ɠoloni Ɠɔoɠɔ GALAGI wa-ƓALAGI wooi ʋɛ,›
14 ni wa ɠɛna ma: ‹Ɓa, gá liizu Ezipete yooi zu, ʋɛ gi la kɔɔ ɠa ná, gi la kɔɔɠɔ ʋuʋu fɛɛ woomɛniga ná, ʋɛ pulu la gi ɓɔlɔa ná, miná ɠa gi zeizu ná,›
15 à woilo Ɠɔoɠɔ GALAGI laawooi ma, Zuda masadai zu nuɓusɛi mɔtaiti. Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Wa devena gaamazu ga wo li, wo zei Ezipete yooi zu, wa liina, wo lɔɔɠu ná,
16 kɔɔi é wo maaluazu, naa ɠa zeeli wo ma miná Ezipete yooi zu, pulu vai wo yiizoolɛzu la, naa ɠa ʋilɛsu wo ʋolu náʋɛ, ná ɠa wa za ná.
17 Zɔi pɛ a deve ga é li, é lɔɔɠu Ezipete yooi zu, naati ta za ga kɔɔi, ɓaa pului, ɓaa ɗɔfɔ zeeɓɛi. Taɠila kpalaa ge la ɠulaa maanɔɠɔi ya, nii nà sei ti ma.›
18 «Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: ‹Nà-ziiɠaawanai ʋooʋaai ma Zeluzalɛme nuiti daalɔɠɔma. Zenɔ ɠana nà-ziiɠaawanai ɠɛɛzu la wo laalɔɠɔma, ni wa liina Ezipete yooi zu. Ta ɠɛ yeezulazu ga woye kona wosuʋɛti, gaazuɗɛ ʋuu vaiti su, ta foovoo loozuʋɛti, ta ɓaaɠulama vaiti. Wo la mɔ niima yooi ɠaa ʋolu pɛ.›
19 «Zuda yooi zu nui mɔtaiti, Ɠɔoɠɔ GALAGI ɠɛ wo ma: ‹À mina li pa Ezipete yooi zu.› À ɠizɛ su ga pagɔ, gè ɠona wo ʋɛ za.
20 Wa ɓɔɠɔ ɠakasu, siɛgi zu wo tèʋeni la Ɠɔoɠɔ GALAGI wa-ƓALAGI ma, wo ɠɛni mà: ‹Ɠɔoɠɔ GALAGI gá-ƓALAGI maanɛɛnɛ gi ʋɛ, naa ʋoluma, nii Ɠɔoɠɔ GALAGI a bo, ti pɛ dɛɛ ga giye, gá ti ɠɛ.›
21 Za deɠɛmu, gè ʋaa wo ʋɔ ga Ɠɔoɠɔ GALAGI wa-ƓALAGI ná-gooɠaaʋotegi, kɛlɛ wo la woilosu naa ta ma, nii é boga ga gè bo wo ma.
22 Tama, wa za ga kɔɔi, ɓaa pului, ɓaa ɗɔfɔ zeeɓɛi, ʋɛ wo liizu lɔɔɠuzu ná!»