16
Zozɛfe mavofodai ná-zooi
1 Zozɛfe mavofodai ná-zooi é sɔlɔɔni ga kpakutoomai, ma ɠwɛpelei tɔɔzeini Zuludɛn ʋa, Zeeliko ɠobaʋɛ, folo ɠulazu ʋelei, ziɛungi letemaʋɛ, nii é kpɔɔle ɗɛi veezu taa nuiti zea. É zeɠeni miná, é lɛ ga gize yooi zu ʋelei, teʋebai zu, é li Ɓeetɛle.
2 É zeɠeni Ɓeetɛle, é li ga Luze ʋele, é leʋe Aaleke nuiti ta-ɠwɛpelemaʋɛ Atalɔte ʋele.
3 Naa ʋolu é yeini folo liizu ʋelei, ga Yafelɛte nuiti pɔ pelei, eyɛsu Ɓɛte-Ɠɔlon ná ɠɔɠɔwu ʋelei, é zeeli Geezɛɛl, é lo Kpoloɗɛ Wolai ʋa.
4 Zooi ɠana, nii é ɠɛni ga Zozɛfe mavofodaiti tɔnɔi, Manasee ta Efelayime.
Efelayime ná-bolodai ná-zooi
5 Zooi ʋɛtɛ, nii é veeni Efelayime mavofodaiti zea, eɠɛʋelei ta-ʋɛlɛyeɠeiti ti la: Folo ɠulazu ʋelei, ta-ɠwɛpelemaʋɛ zoni Atalɔte-Adaal, é zeeli Ɓɛte-Ɠɔlon ná maazu ʋelei.
6 É loni Kpoloɗɛ Wolai ʋa, folo liizu ʋelei. Lɛkpɛmaʋɛ nu ɠɔʋɛzuʋɛ, kwɛpelemaʋɛ liini ga Mikemetate ʋele, é lati ga folo ɠulazu ʋelei, é Taanate-Silo maaleʋe, é li ga Yanoa ʋele.
7 Miná ɠa é yeini ná ga Atalɔte ʋele, ta Naalata, é lo Zeeliko ʋa, é ʋilɛ Zuludɛn ʋa.
8 É zoni Tapua, é li folo liizu ʋelei, Kana kɔtuɗɛi ʋɔ bɛ, é lo Kpoloɗɛ Wolai ʋa. Naa ɠa é ɠɛni ga Efelayime mavofodai nɔnɔi, eɠɛʋelei ta-ʋɛlɛyeɠeiti ti la,
9 é ɓɔ taa wolaiti ba, ta ma laa goiti, niiti ti makɛni ti ʋɛ, Manasee mavofodai ná-zooi zu.
10 Efelayime nuiti ti la ɠɛni zooni ti ʋa Kanaan nuiti kpɛ, niiti ti ɠɛni zeini Geezɛɛl. Naati ta zeini ti zaama, zaaɠaza, kɛlɛ Efelayime nuiti ti boti ɓaagi kpein daani ti unma.