2
Zeeliko zuʋɛtɛ fai
1 Nun ná-doun zunui Zozuwe nɛnɛ felegɔ leʋeni dɔɔɠuzu, ti zeɠe Akasia nɛmɛi zu, é ɠɛ ti ma: «À li, wo zooi zuʋɛtɛ, ta Zeeliko ɓɔɔɓɔ.» Ti liini, ti ɲi koloɠolo anzanui ta ná-pɛlɛi wu, nii daaseigi ɠɛni ga Laɠaɓe.
2 Ti ɠɛni Zeeliko masagi ma: «Wɛlɛ, Izelayɛle nuiti seeliʋɛ ʋɛ kpidii, ga ti zooi zuʋɛtɛ.»
3 Zeeliko masagi keelai leʋeni Laɠaɓe ma, é ɠɛ ma: «Zunuiti fe gi ya, ti ɲiai ɗa-ʋɛlɛi wu, mazɔlɔɔ zooi zuʋɛtɛ fai ɠa ti ʋaai ma.»
4 Kɛlɛ anzanui zunu felegɔiti seɠeni, é ti lɔɔɠu, é ɠɛ ma: «Gaamazu, zunui naati ti ʋaani pɔ̀ bɛ, kɛlɛ gè la ɠɛni ti-zeɠezu ɠwɛɛ.
5 Siɠi daaʋɛ laaɠulu ziɛgi zu, fitilimaʋɛ, ma zunuiti ti ɠulani, ti li, gè la kwɛɛ, ʋɛ ti liai ná. À suvilɛ, wo ʋilɛ ti ʋolu, wa ti ɠɔɠɔzumɛɛnsu.»
6 Tɔun é ti lɛɛni pɛlɛ ɠɔmaʋɛ dooɠo bosuʋɛ, é ti lɔɔɠu geze ɓaku ziɠigi wu, nii é kɛʋele ɓɛtɛni ɓɔɠɔ ʋɛ ná-pɛlɛ ɠɔmaʋɛ.
7 Masagi ná-keelaiti ti ʋilɛni ti ʋolu pelei naa zu, nii é liizu Zuludɛn maaleʋesu ʋelei. Ti ɠulani nɔ taai ʋa feya, ti siɠigi laaɠulu ti ʋolu ʋelei.
Laɠaɓe ta nɛnɛ felegɔiti
ta-woolaamai
8 Laɠaɓe lɛɛni pɛlɛ ɠɔmaʋɛ dooɠo bosuʋɛ, é ma wɛɛinti ka, aisa ti ʋa la.
9 É ɠɛni ti ma: «Gè kwɛɛni ga Ɠɔoɠɔ GALAGI niima yooi veeʋɛ wo ʋɛ, dualuagi gi zoga, ʋɛ yɔɠɔzuʋɛ nuɓusɛiti kpein sasu ɠa ɓalizu wo luɠɔ.
10 Mazɔlɔɔ gi mɛnini ga Ɠɔoɠɔ GALAGI Seeli Kpoloɗɛi vɔɔni su wo luɠɔ, siɛgi zu wo ɠulani la Ezipete yooi ʋa. Gi naa mɛnini, ʋelei wo Amɔɔl nuiti ta-masa felegɔiti soni da, Siɠon ta Wɔge, ti ɠɛni masadai ɠɛɛzu Zuludɛn ʋolu ʋelei, folo ɠulazu ʋelei, wo ti zuwuɠaaleʋe ta ta-nuɓusɛiti, wo ta-yooi ɠoloɠolo.
11 Gi naama vaiti mɛnigai ma, gi iɲɔ ge leʋea. Nu nɔpɛ zii la lɔa, é ʋa lo wo luɠɔ. Tɔɔzei Ɠɔoɠɔ GALAGI wa-ƓALAGI ɠa é ga GALA, geeɠɔlɔgi zu ta zooi ma.
12 Niizu, à ɠonana bɛ̀, Ɠɔoɠɔ GALAGI laaseigi zu, ga faanɛɛi gè kɛai wo ʋɛ, wa buuɠwɛɛ, wa ɓalaagi wo faanɛɛ ɠɛ nà-pɛlɛyeɠei ʋɛ. À poogi ta ve zèa, nii nà la da.
13 À minazeɠe bɛ̀ ga wa kɛ̀ɛ yɛ vulua, ta dèe, ta kɛ̀ɛ ná-dointi, ta tɔnɔiti kpein, wo la vaa bu, gi ʋa za.»
14 Zunui niiti ti ɠɛni ma: «Ni nɔ wo la gi maalɔɔni, gi ɠonaa gi-yɛnvui ma, gá ɠɛ ga wooɠɛɠila nu gá-minazeɠegi zu, gá ɠɛ ga faanɛɛ wuuɠwɛɛ nu è ʋɛ, siɛgi zu Ɠɔoɠɔ GALAGI zooi veezu la gi ʋɛ.»
15 Laɠaɓe ná-pɛlɛi ɠɛni loni taai ma ziɠigi ʋa, siɠigi ɠoozuʋɛ ɓɔɠɔi ɠa é ɠɛni zeini ná. Naa ɠa é kɛɛni, é zooni é zunu felegɔiti kula fenɛtɛlɛi laaʋɛ, é ti yei ga galui.
16 É ɠɛni ti ma: «À li ga gize yooi zu ʋelei, ni naa laade, wo la ɠulaa wo ɓɛɛ nuiti zea. À lɔɔɠu ná folo saʋagɔ laawu, eyɛsu ti ɠale ma. Naa ʋolu, wa pele zo niina.»
17 Zunu felegɔi naati ti ɠɛni ma: «Wɛlɛ, ʋelei gá minazeɠegi a yɛ ma la, nii è boga ga gi kɛ è ʋɛ, faa la ɠɛa gi ʋa:
18 Aisa gi ʋa ʋa zooi zu, galu ɓɔigi nii ɠili fenɛtɛlɛi laaʋɛ, nii gi ɠulaai daaʋɛ, gi ʋilɛ, è è-ɠɛɛ, ta è-lee, ta è-ɠɛɛleaiti, ta ɗa-ʋɛlɛyeɠei kpein gaalɛ ba ɗa-ʋɛlɛi wu.
19 Nu nɔpɛ a ɓudɛna ɗa-ʋɛlɛi ma ɓofalagi maazu, é ɠula eteaʋɛ, naa ma ɲamai ɠa la tɔ ɓɔɠɔi unma, faa la ɠɛa gi ʋa. Kɛlɛ ni gá yeevɔɔɠuna naa taɠila kpalaa ba, niiti ti è ʋa pɛlɛi wu, naa ma ɲamai ɠa la gi unma.
20 Ni ɗa gi maalɔɔna, faa la gi ʋa, é lo konai ʋa, gi bogai è ʋɛ.»
21 É ɠɛni ti ma: «É ɠɛ, eɠɛʋelei wa-minazeɠegi la!» É ɓeni ti ʋa, ti li. É galu ɓɔigi ɠilini ná-fenɛtɛlɛi laaʋɛ.
22 Ti liini, ti zeeli gize yooi zu, ti yɛ ná, eyɛsu folo saʋagɔ, eyɛsu ti ɠaiziɛ nuiti ti ɠale ma. Ti ɠaiziɛ nuiti ti ti ɠaiziɛni pele ɠobaʋɛ ná pɛ, ti la ti ɠaani.
23 Zunu felegɔiti ti yeini ʋolu, ti zeɠe gize yooi zu, ti Zuludɛn ɓudɛ. Ti zeelini Zozuwe ʋɔ bɛ, Nun ná-doun zunui, ti ʋoluvaawo ma ga nii kpein é ziɛni.
24 Ti ɠɛni Zozuwe ma: «Gaama ʋe, Ɠɔoɠɔ GALAGI zooi kpein feeʋɛ ade ʋɛ, mazɔlɔɔ zooi zu nuɓusɛiti kpein sasu ɠa ɓalizu ade luɠɔ.»