12
Zuda masagi Zoase
(2 Dɔlɔ Sɛʋɛi 24:1-3)
1 Zoase ná-konagi ɠɛni ga dɔfela, siɛgi zu é zeini la ga masagi.
2 Zewu ná-kona dɔfelai ma masadai zu Izilayɛle unda, Zoase zeini Zuda unda ga masagi. Kona ʋuunaanigɔ (40) ɠa é kɛɛni masadai zu Zeluzalɛme. Dee laa ɠɛni ga Siɓia, Ɓeel-Seɓa nu ɠɛni de.
3 Zoase Ɠɔoɠɔ GALAGI yiima vai ɠɛɛni yeeɠɛɠalai kpein daawu é kɛɛni, é ɗa ziɛ ga zalaɠa ɠula nui Yeɠoyada ná-tɛnɛ gooi.
4 Kɛlɛ é la ɠɛni zalaɠa ɠula adaʋɛti koloɠoloni, nuɓusɛiti ti ɠɛni zalaɠaiti kulazu, ti ɗa ansansegiti gala zalaɠa ɠula adaʋɛti.
GALA sei ʋɛlɛi niinɛ vai
(2 Dɔlɔ Sɛʋɛi 24:4-14)
5 Yeeta Zoase ɠɛni zalaɠa ɠula nuiti ma: «À waliiti kpein so ti ʋaazu la Ɠɔoɠɔ GALAGI zei ʋɛlɛi ma ɠoizuʋɛ ná-botiɠɛ vai ma, ta nu ɠilagilagi unmɔɔ walii, naa ʋɛɛ vebɛ waliiti ba ti ʋaazu ga tiye Ɠɔoɠɔ GALAGI zei ʋɛlɛi ma ɠoizuʋɛ.
6 Zalaɠa ɠula nui ɠilagilagi kpein ka kulazu gaazuɠwɛɛgiti zea, ʋɛti kpein náti koloɠologai GALA sei ʋɛlɛi ʋa, wo náti kpɛtɛ ga walii naati.»
7 Kɛlɛ ná-kona ʋuufelegɔ maazu saʋagɔi (23) ma masadai zu, zalaɠa ɠula nuiti ti la ɠɛni dɛ GALA sei ʋɛlɛi ná tanɔpɛ kpɛtɛni.
8 Masagi zalaɠa ɠula nui Yeɠoyada lolini ta zɔɔma zalaɠa ɠula nuiti, é ɠɛ ti ma: «Toɠa ɠale, wo la GALA sei ʋɛlɛi ɓɛtɛni? Tɛi ʋele ɠana wo kɛɛzu la, wo la mɔ walii zoga pɛ, nii wo ɠaazuɠwɛɛgiti ti ʋaazu la, kɛlɛ wa ti yɛsu ná niina pɛlɛi ɓɛtɛ vai ma.»
9 Zalaɠa ɠula nuiti ti vaani bu ga ti mina wali zo, ta ti mina pɛlɛi ɓɛtɛ.
10 Zalaɠa ɠula nui Yeɠoyada kesu ɠila kpɛtɛni, é zeɠei wɔ ba, é sei zalaɠa ɠulazuʋɛ ʋepema nu yeezazuʋɛ, ʋɛ nuiti ti ɠɛni leʋesu ná, ti ɗa li Ɠɔoɠɔ GALAGI zei ʋɛlɛi ma ɠoizuʋɛ. Zalaɠa ɠula nui niiti ti ɠɛni pɛlɛlaʋɛ makɛsu, naati ti ɓena walii kpein pu su, nii nuiti ti ɠɛni ʋaazu la Ɠɔoɠɔ GALAGI zei ʋɛlɛi ma ɠoizuʋɛ.
11 Ta la kaana ga walii mɔinɗa kesui zu, masagi ná-sɛʋɛ ɠɛ nui ɠɛni lɛɛzu ta zalaɠa ɠula ɠundiɠi wolai, ti walii ɠaalu nii ti ɠɛni ʋaazu la Ɠɔoɠɔ GALAGI zei ʋɛlɛi ma ɠoizuʋɛ, ti pu ɓɔlɔiti su.
12 Ti ɠɛni walii naa veezu naama nuiti zea, niiti ti ɠɛni Ɠɔoɠɔ GALAGI zei ʋɛlɛi ma woti vai unda, ti ɠɛni naama walii ɠɛɛzu ga botiɠɛ nuiti ta pɛlɛ maalɛɛ nuiti salai, niiti ti ɠɛni botii ɠɛɛzu Ɠɔoɠɔ GALAGI zei ʋɛlɛi ma,
13 naa ʋɛɛ pɛlɛ lo nuiti ta kɔtu zaɠa nuiti ba, ti ɗa guluiti ta kɔtu zaɠaaiti geya ga ma walii, ta Ɠɔoɠɔ GALAGI zei ʋɛlɛi ɓɛtɛ vai zu.
14 Kɛlɛ ti la ɠɛni wali woole taza ɓɛtɛni, ɓaa boɠa, ɓaa ɲama vaza aniɲaka, ɓaa puʋugiti, ɓaa wali woole aniɲaka nɔpɛ ta zanu kelei ga walii nii ti ɠɛni ʋaazu la Ɠɔoɠɔ GALAGI zei ʋɛlɛi ma ɠoizuʋɛ.
15 Ti ɠɛni feezu botiɠɛ nuiti zea, ga ti dɔ Ɠɔoɠɔ GALAGI zei ʋɛlɛi ɓɛtɛ vai zu.
16 Nui niiti ti ɠɛni wali veezu ti ya ga ti fe naati zea ti botii unda, ti la ɠɛni ɠɛɛzu naati ma ti ʋoluvaawo, mazɔlɔɔ ti ɠɛni kɛɛzu ga telebogi.
17 Walii nii é ɠɛni ga faazuɓɛtɛ zalaɠai ta koto gba zalaɠai, naa la ɠɛni lɔɔzu kesui zu Ɠɔoɠɔ GALAGI zei ʋɛlɛi ma ɠoizuʋɛ, é ɠɛni ga zalaɠa ɠula nuiti tɔnɔ.
Zoase ná-masa fai ɠaaɓelagi
(2 Dɔlɔ Sɛʋɛi 24:23-27)
18 Názu ɠa Siili masagi Ɠazayɛle kɔɔi valani la Gate ʋa, é ná zo. É ɠɛni pɔ ga é lɛ Zeluzalɛme laalɔɠɔma.
19 Gaamago Zoase ani ɓiigiti kpein gaalɛɛni ba, niiti kɛɛɠɛwolani Zozafate ta Yolame ta Aɠazia, Zuda masagiti ta tɔ ɓɔɠɔi ti feeni Ɠɔoɠɔ GALAGI ʋɛ, é pɛɛ zanugi pɛ ba é ɠɛni Ɠɔoɠɔ GALAGI zei ʋɛlɛi ma naavolo makɛsuʋɛ ta masa pɛlɛi ma naavolo makɛsuʋɛ, é ti pɛ seɠe, é teʋe Siili masagi Ɠazayɛle ʋɔ, naa ma ge maaɠooza Zeluzalɛme ʋa.
20 Zoase ná-kɛɛwotii mɔtaiti, ta nii kpein é kɛɛni, naati sɛʋɛʋɛ Zuda masagiti ta-ɠɛɛwoti zɛʋɛi zu.
21 Ná-botiɠɛ nu wolaiti ti yaavai ɠilini ma, ti paa Ɓɛte-Milo wu, nii é Sila ɠizei yeizuʋɛ.
22 Nu felegɔ ɠɛni ti zaama, Yozaɓade Simeyate ná-doun zunui, ta Yeɠozaɓade Somɛɛl ná-doun zunui, naati ka ti paani. Ti maaɠuluni mɛmɛwolani ta-ɠabamaʋɛ, Davide ná-taa wolai zu. Ná-doun zunui Amasia ɠa é masadai ɠɛɛni potogi zu.