20
Ezekiase zeeɓɛ vai ta kɛdɛ fai
(2 Dɔlɔ Sɛʋɛi 32:24-26;
Ezayi 38:1-8, 21-22)
1 Naama ziɛgi zu Ezekiase zeeɓɛni, é ɠɛnina zaazu. Amɔse ná-doun zunui Ezayi, GALA goo wo nui liini pɔ bɛ, é ɠɛ ma: «Ɠɔoɠɔ GALAGI wooi ɠaa: ‹Ɗa-vaiti gaaɠula ba, é devei yɛ ɗa-ʋɛlɛyeɠei ya, tɔɔzei ɗa ga za, è la ɠulazu seeɓɛi nii zu.› »
2 Ezekiase ɠaaʋoteni pɛlɛi ma, é Ɠɔoɠɔ GALAGI maanɛɛnɛni ɠani:
3 «Ee, Ɠɔoɠɔ GALAGI, soma è ɠizɛ su ga sìɛʋɛ è ɠaazu ga wooɠɛɠiladai ta ɠi pagɔlai, gè naa ɠɛ nii pagai è ɠaazu.» Naa ʋoluma Ezekiase wɔlɔni, gaazuɗɛi ʋu ga gola.
4 Ezayi la ɠɛni dɛ ɠulani koi zaamaʋɛ ʋa, eyɛsu Ɠɔoɠɔ GALAGI ɓɔɛ pɔ, é ɠɛ ma:
5 «Ɠale ma Ezekiase ʋɔ bɛ, nà-nuɓusɛiti ta-lotuɠɔi, è ɠɛ ma: ‹È-mɛmɛwola Davide ná-GALAGI, Ɠɔoɠɔ GALAGI wooi ɠaa: Gè ɗa-maanɛɛnɛ wooi mɛniga, gè è-ɠaazuɗɛi ɠaa. Nà è ɠɛdɛsu, lina ɠa leʋena ɗa zoo è li Ɠɔoɠɔ GALAGI zei ʋɛlɛi ma ɠoizuʋɛ.
6 Gè kona puugɔ maazu lɔɔlugɔ (15) ʋiliga è-zii zu. Ɗa-o, taai nii-yo, nà wo unmɔɔsu, gè wo ɠula Asiili masagi ya, nà taai nii makɛ nà ɓɔɠɔi nà-faa zu ta nà-botiɠɛ nui Davide ná-faa zu.› »
7 Ezayi ɠɛni ti ma: «À kooleɠoolegi ɠaawaai ɠaayɔgai zeɠe.» Ti seɠeni, ti pu masagi ná-wologi ɠa, é ɠɛdɛ.
8 Ezekiase Ezayi ɠaazaɠani, é ɠɛ ma: «Poogi ɓɛgele ɠa nà kwɛɛ da ga Ɠɔoɠɔ GALAGI ɠa kɛ̀dɛsu, ta nà zoo gè li Ɠɔoɠɔ GALAGI zei ʋɛlɛi ma ɠoizuʋɛ lina ɠa leʋena?»
9 Ezayi gooɠaaʋoteni, é ɠɛ ma: «Poogi ʋɛtɛ nii Ɠɔoɠɔ GALAGI feezu è ya, è ʋa kwɛɛ da ga toɠa ná-minazeɠegi laazeelizu nii é kɛai è ʋɛ: Ɗa pɔ ga niinigi li luɠɔ ga kɔɠɔ losu puugɔ, ɓaa é ɠula ʋolu ga kɔɠɔ losu puugɔ?»
10 Ezekiase gooɠaaʋoteni, é ɠɛ ma: «É la ɓaani ga niinigi li luɠɔ ga kɔɠɔ losu puugɔ, é ʋa zeeli kula vai zu ga ʋoluʋelei. É ɠula ʋolu tɔun ga kɔɠɔ losu puugɔ.»
11 GALA goo wo nui Ezayi Ɠɔoɠɔ GALAGI maanɛɛnɛni, naa niinigi ɠula ʋolu ga kɔɠɔ losu puugɔ, Aɠaze ná-kɔɠɔ losuʋɛ, ʋɛ é yeini ná niina.
Ɓaɓilɔne ɠeelaiti
(Ezayi 39:1-8)
12 Naama yeeɠɛɠalai nɔ, Ɓaɓilɔne masagi Melodake-Ɓaladan, Ɓaladan ná-doun zunui, mɛnini ga Ezekiase zeeɓɛni. É keelaiti teʋeni ma, sɛʋɛi ti ya ta sabaliʋai.
13 Ezekiase yeezeini ti wu, naa ʋoluma é pɛlɛi wu lɛɛni ga tiye, ʋɛ ná ga ani ɓiigiti makɛsuʋɛ, walii ta zanugi ta tufa maku nɛɛnɛgiti, ta gulɔ maku nɛɛnɛgi. É ná-kɔɔɠɔ zɔɔlaiti puuzuʋɛ ɓalaa lɛ, ta nii kpein makɛga ɠɛni de zea. É la ɠɛni ani nɔpɛ dɔɔɠuni ti ʋa ná-pɛlɛi wu, ta ná-masa zooi zu.
14 Naa ʋoluma GALA goo wo nui Ezayi ʋaani masagi Ezekiase ʋɔ bɛ, é gaazaɠa, é ɠɛ ma: «Leeni ɠa niima nuiti ti bogai, mini mu ka ti zeɠeai ná?» Ezekiase gooɠaaʋoteni, é ɠɛ ma: «Ti zeɠeʋɛ ada ɠooza, Ɓaɓilɔne.»
15 Ezayi ɠɛni ma ʋolu: «Leeni ɠa ti kaai ɗa-ʋɛlɛi wu?» Ezekiase ɠɛ ma: «Ti anii kpein kaaʋɛ nà-pɛlɛi wu, ani nɔpɛ gè la yɛni ʋoluzu nà-naavolo makɛsuʋɛ, nii gè la dɛɛni ga tiye.»
16 Ezayi ɠɛni Ezekiase ma naazu: «Woilo Ɠɔoɠɔ GALAGI wooi ma:
17 ‹Foloi tanigaa ta ʋaazu, nii kpein é ɗa-ʋɛlɛi wu, nii è-mɛmɛwolani ti gaalɛai ba, eyɛsu za zeeli, ta li ga ti pɛ Ɓaɓilɔne, gila kpalaa ge la yɛga ʋoluzu.› » Ɠɔoɠɔ GALAGI ɠa é boga.
18 « ‹Ta li ga è-mavofodai tanigaani, ti ɠɛ ga botiɠɛ nu wolaiti Ɓaɓilɔne masagi ná-pɛlɛi wu.› »
19 Ezekiase Ezayi wooɠaaʋoteni, é ɠɛ ma: «Ɠɔoɠɔ GALAGI laawooi ʋagɛ nii è bogai mà.» Mazɔlɔɔ é ɠɛni ɠɛɛzu ma: «Kɛbɛ tɔun ziilɛigi ta makɛi ɠa ɠɛ ade ʋɛ sìi ma voloi pɛ su, kɛlɛ?»
20 Ezekiase ná-fai mɔtaiti ta ná-tɔɠɔɠula faiti, ta ʋelei é ziɛ makɛsuʋɛ ɓɛtɛni la, zeɠei é bɔɔni ga é lɛ ga ziɛi taazuʋɛ, naati sɛʋɛʋɛ Zuda masagiti ta-ɠɛɛwoti zɛʋɛi zu.
21 Ezekiase zaani. Ná-doun zunui Manasé ɠa é masadai ɠɛɛni potogi zu.