22
Zuda masagi Zoziase
(2 Dɔlɔ Sɛʋɛi 34:1-2)
1 Zoziase ná-konagi ɠɛni ga dɔsaʋa, siɛgi zu é zeini la ga masagi. Kona ʋuusaʋagɔ maazu ɠila (31) ka é kɛɛni masadai zu Zeluzalɛme. Dee laa ɠɛni ga Yedida, Ɓosekate nui Adaya ná-doun anzanui ɠɛni de.
2 Zoziase Ɠɔoɠɔ GALAGI yiima vai ɠɛɛni, é siɛ ʋele ʋagɔiti kɛɛni ga mɛmɛwola Davide ɠɛʋele nɔ fai pɛ su, é la zeɠeni naa ziɛ ʋelei gila kpalaa ba.
Tɔ sɛʋɛi ɠaa vai
(2 Dɔlɔ Sɛʋɛi 34:8-18)
3 Masagi Zoziase ná-kona puugɔ maazu lɔsaʋai (18) ma masa fai zu, é Asalia ná-doun zunui, Mesulame ná-dounloin Safan lolini, nii é ɠɛni ga sɛʋɛ ɠɛ nui, é teʋe Ɠɔoɠɔ GALAGI zei ʋɛlɛi ma ɠoizuʋɛ, é ɠɛ ma:
4 «Li zalaɠa ɠula ɠundiɠi wolai Yilikiya ʋɔ bɛ, è bo ma ga ti wali ɠaalu nii nuiti ti ʋaazu la Ɠɔoɠɔ GALAGI zei ʋɛlɛi wu, nii pɛlɛla makɛ nuiti ti sɔlɔɔsu nuɓusɛiti zea,
5 ti wali naa ve naama nuiti zea, niiti ti Ɠɔoɠɔ GALAGI zei ʋɛlɛi zaɠazuʋɛti kpɛtɛ vai unda, naati ti naama walii ɠɛ ga botiɠɛ nuiti salai, niiti ti botii ɠɛɛzu Ɠɔoɠɔ GALAGI zei ʋɛlɛi ma:
6 pɛlɛ maalɛɛ nuiti, botiɠɛ nuiti, ta pɛlɛ lo nuiti. Ti guluiti ta kɔtu zaɠaaiti geya ga ma walii ta, nii soloogai Ɠɔoɠɔ GALAGI zei ʋɛlɛi ɓɛtɛ vai zu.
7 Kɛlɛ nu mina ti ɠaazaɠa ga ti ɠonabo é ʋilɛ walii ʋa é veezu ti ya, mazɔlɔɔ ta ziɛzu ga wooɠɛɠiladai.»
8 Zalaɠa ɠula ɠundiɠi wolai Yilikiya ɠɛni sɛʋɛ ɠɛ nui Safan ma naazu: «Gè tɔ sɛʋɛi ɠaaʋɛ Ɠɔoɠɔ GALAGI zei ʋɛlɛi wu.» Yilikiya sɛʋɛi veeni Safan ya, é kala.
9 Naa ʋoluma Safan ɠaleni ma masagi ʋɔ bɛ, é ʋoluvaawo ma, é ɠɛ ma: «Walii é ɠɛa Ɠɔoɠɔ GALAGI zei ʋɛlɛi wu, ɗa-wotiɠɛ nuiti ti fea naama nuiti zea, niiti ti Ɠɔoɠɔ GALAGI zei ʋɛlɛi ɓɛtɛ vai unda.»
10 É ɠɛ ma ʋolu: «Zalaɠa ɠula nui Yilikiya sɛʋɛ ɠila feeʋɛ zèa.» É tɔɔzeini ga kalaga masagi ɠaazu.
Masagi GALA goo wo anzanui Ɠuluda
ɠaazaɠa fai
(2 Dɔlɔ Sɛʋɛi 34:19-28)
11 Masagi tɔ sɛʋɛi zu wooi mɛnigai ma, é ná-seɠeiti baliʋalini ga kidaaʋiligi maaʋele ma.
12 Naa ʋoluma é niima nuiti tolini: zalaɠa ɠula nui Yilikiya, Safan ná-doun zunui Ayikame, Misé ná-doun zunui Akaɓɔɔl, sɛʋɛ ɠɛ nui Safan, ta Azaya, masagi ná-botiɠɛ nui gila.
13 É ɠɛni ti ma: «À li, wo Ɠɔoɠɔ GALAGI ɠaazaɠa bɛ̀, nuɓusɛi ɓalaa bɛ, ta Zuda pɛ bɛ, tɔɔzei sɛʋɛi nii zu wooi ʋa, nii kaai. Mazɔlɔɔ Ɠɔoɠɔ GALAGI ná-ziiɠaawanai wola wɔɔlɔʋɛ, ná-ziiɠaawanai yeiɗa ade ma, mazɔlɔɔ ade-mɛmɛwolani ti la ɠoloni sɛʋɛi nii zu wooi ʋɛ, ti ʋa naa ɠɛ nii kpein sɛʋɛai su.»
14 Zalaɠa ɠula nui Yilikiya, ta Ayikame, ta Akaɓɔɔl, ta Safan, naa ʋɛɛ Azaya ʋa, ti wuzeɠeni názu, ti li GALA goo wo anzanui Ɠuluda ʋɔ bɛ. Sinigi ɠɛni ga zunui ta daaseigi ga Salume, Tikava ná-doun zunui, é ɠɛ ga Ɠaalaɠase ná-dounloin, tɔ ɠa é ɠɛni ga Ɠɔoɠɔ GALAGI zei ʋɛlɛi wu zeɠeiti ma ɠundiɠii. Anzanui naa ɠɛni zeini Zeluzalɛme taazuʋɛ koi niinɛi zu. Ti ʋoluvaawoni ma.
15 Ɠuluda ɗa ɠɛ ti ma: «Ɠɔoɠɔ GALAGI, Izilayɛle ná-GALAGI wooi ɠaa: ‹À daazeeli zunui naa ma, nii é wo leʋegai mà:
16 Ɠɔoɠɔ GALAGI wooi ɠaa: Nà ʋaazu ga maanɔɠɔi zooi nii ta su nuɓusɛiti ma, nii kpein sɛʋɛai ma yeeluɠɔ sɛʋɛi naa zu nii Zuda masagi kalagai.
17 Mazɔlɔɔ ti ɠɛlɛa bà, ti ɗa ansansegiti gala gala kiligiti bɛ, ti zìiɠaawana ɠana ga ta-ɠɛɛwotiiti, naa maaʋele ma, nà-ziiɠaawanai yeiɗa zooi nii ma, tama é la dɛ vɔlɔ zeɠezu ga.
18 Kɛlɛ Zuda masagi é wo leʋegai ga wo Ɠɔoɠɔ GALAGI ɠaazaɠa, à li, wo ɠɛ ma: Ɠɔoɠɔ GALAGI, Izilayɛle ná-GALAGI wooi ɠaa: È sɛʋɛi naa zu wooiti mɛniga.
19 È yiiɓɔlɔa, è ɓɔɠɔmaayei kàkala, naama wooi mɛnigai ʋoluma, nii gè boga zooi nii ta su nuɓusɛiti daalɔɠɔma, é lɔɔzei ná ɠoloɠolo fai ʋa, ta foovooi gè toai. È ɗa-zeɠeiti balia ga, è wɔlɔ gàazu kidaaʋiligi maaʋele ma. Nà ɓalaagi, gè ɗa-maanɛɛnɛ wooi mɛniga, Ɠɔoɠɔ GALAGI wooi ɠana.
20 Naa maaʋele ma, nà è laazeelizu è-mɛmɛwolani ma, ti zaai, è maaɠulu ziilɛigi zu ɗa-ɠabai gila su, è ɠaazu la laa maanɔɠɔi nii gila kpalaa ma, niiti gè ʋaazu ga tiye zooi nii laalɔɠɔma.› » Keelaiti ti liini, ti naati bo masagi ma.