4
GALA ka masadai ɠɛ Siyɔn
1 Yeeɠɛɠala ɠaaɓelagiti ta zeelina,
Ɠɔoɠɔ GALAGI ná-Pɛlɛi ma ɠizei ɠaa ɠa ɠooza, é lo gizeiti pɛ maazu,
toɠa lo gize goiti pɛ maazu,
nuɓusɛ ʋɛbɛi ɠa ɠɛ liizu pɔ bɛ.
2 Zii ɠiligiti ta ɠɛ liizu ná, ti ɗa ɠɛ ma:
«À ʋa ade lɛ Ɠɔoɠɔ GALAGI ná-gizei ma,
Zakɔɓe ná-GALAGI ná-Pɛlɛi wu,
naa ɠa a kɛ, é ná-peleiti dɛɛ ga adeye,
ade ʋa ziɛ ga ná-peleiti.»
Mazɔlɔɔ Siyɔn ɠa tɔgi a zeɠe ná,
ta Ɠɔoɠɔ GALAGI laawooi ɠa zɔlɔɔ Zeeluzalɛme nɔ.
3 Toɠa zaamazu logi wo nuɓusɛ mɔinmɔin zɔɠɔzu,
toɠa ɠɛ ga zii wolaiti ta-lukpɔɠaaleʋe nui, anɛɛ zɔiti ti maaɠoozaai.
Ta ta-ɠɔɔɠɔ woɠa zɔkpɔiti kɛ ga kaliiti,
ti ta-ɓɛɛinti kɛ ga molo leʋe woɠaiti.
Zii la mɔ valaa zii ʋa,
nu la mɔ kɔɔɠɔ vaa ma ɠala boga.
4 Ɛsɛ ka ná-leezɛn ɓele la ziilɛigi zu, ta ná-kooleɠoole gulu ɓelei,
nu nɔpɛ ge la bɔɔla maalua mɔnɔ,
mazɔlɔɔ Ɠɔoɠɔ GALAGI, Fai-Pɛ-Maliɠii, ɠa é boga.
5 Zɔɔma nuɓusɛiti ta ziɛzu ta-ɠalagiti daaseigi zu,
kɛlɛ giya ma, gá yɛ ziɛzu Ɠɔoɠɔ GALAGI ada-ƓALAGI laaseigi zu, eyɛsu ɠɔ.
GALA ka ná-baala kpulugi ɠaalɛ ba
6 Ɠɔoɠɔ GALAGI wooi ɠaa:
«Naama volo ná, nà nà-baalagiti gaalɛ ba,
zɔiti ti maalɛɠɛfɛgai, ta zɔiti ti zuvazagai,
niiti gè ti zopele ɲɔuni.
7 Zɔiti ti maalɛɠɛfɛgai, nà naa mɔtaiti makɛ,
zɔiti ti maaɠoozani, gè naati kɛ ga zii wola.
Ɠɔoɠɔ GALAGI ɠa masadai ɠɛ ti unda, Siyɔn gizei ma,
é zo názuʋɛ ma, eyɛsu ɠɔ.
8 Ɗa ʋe, Zeeluzalɛme ɠizei, è wɛlɛzu nuɓusɛiti ma,
eɠɛ baala makɛ nui é wɛlɛ baala kpulugi ma,
ɗa ga ʋa ɗa-masadai zɔlɔɔsu ʋolu, nii é ɠɛni è ya mɔungi.
Zeeluzalɛme ɠa ɠɛ ʋolu ga masadai ma laa wolai.»
Zeeluzalɛme ná-ʋoluɠulai ta unmɔɔ fai
9 Lee ɓee ɠa wo toozu niizu, niizu Zeeluzalɛme nuɓusɛiti?
Masa ge la mɔ wo ʋɛ ɓaa?
Wo lɛnɛ nui zaa ɓaa,
taɓai wo zosu ɠani, eɠɛ anzanu a ɠɛ doun zɔlɔɔsu?
10 Siyɔn laaʋeaiti, à ɓɔɠɔ zuɓili ga taɓai,
wo kpalagi wo, eɠɛ anzanui é doin zɔlɔɔsu!
Mazɔlɔɔ wa ɠulazu taai ʋa,
wo zei dɔɓɔ wolai zu,
wa liizu, eyɛsu wo zeeli Ɓaɓilɔne.
Kɛlɛ miná ɠa wa unmɔɔgi zɔlɔɔ ná,
Ɠɔoɠɔ GALAGI ɠa wo ɠeya ʋolu,
é wo ɠula wo zili nuiti zea.
11 Kɛlɛ niizuʋɛ, zii mɔinmɔin ge ɠaalɛa ba wo laalɔɠɔma,
ti ɗa ɠɛ ma:
«Ɓaaɠula faan wa-laai ma!
Ade Siyɔn taai tɛi koloɠolosuʋɛ ɠa!»
12 Kɛlɛ ti la Ɠɔoɠɔ GALAGI ná-devei ɠwɛɛ,
ti la kisu vaiti gaaɠaazu,
ti la kwɛɛ ga é ti ɠaalɛɛʋɛ ba,
eɠɛ molo ɠiliiti, é ti ʋu ti-loɠazuʋɛ.
13 Siyɔn nuiti, à wuzeɠe, wo moloi loɠa!
Nà minɛi losu wo ʋa, é ga kɔlui,
gè wo-ʋolokagi ɠɛ eɠɛ kɔlu ɓɔigi,
wa nuɓusɛ mɔinmɔin dɛɛvɛ ɠɔɠɔwu,
wa ti-yeaɠɔligi kpein kɛ ga Ɠɔoɠɔ GALAGI nɔnɔ,
ta-naavoloi kpein ka ɠɛ ga Ɠɔoɠɔ GALAGI nɔnɔ, eteai pɛ Maliɠii.
14 Kɛlɛ niizu, à wa-ɠɔɔɠɔ nuiti gaalɛ ba, Siyɔn nuiti!
Ta ga ade zei kɛlɛ su,
ti Izelayɛle ná-kundiɠii loɠa gaazuʋɛ ga tukpɔi.