7
GALA keelai wɔlɔ vai nuɓusɛiti ta-yaava vai zu
1 Ee! Màanɔɠɔa! Gè ɠɛa ga naama nui,
é ʋaazu gulu waa ɠulazuʋɛ, ti ɓega ʋoluma ga ti ɠula ga,
eɠɛ zɔi é gulu waa ɠɔpɔgiti gaiziɛzu kula nuiti polu ʋelei.
Kɛlɛ leezɛn ɠila kpalaa ge la ná, nu a mi,
kooleɠoole gwaa ma nɛɛnɛ gila kpalaa,
nii gòla wɔinɗai ma.
2 Wooɠɛɠila nuiti ti ɓega zooi ɠa,
sɔle nu nɔpɛ ge la mɔ ná.
Nu ʋaa ɠisiɛi nɔ ɠa é ti pɛ ziimaʋɛ,
ti ɗa ɓɔɠɔ ɠaaʋɛɛnɛ, ti ɠilagilagiti pɛ.
3 Ti ɠeleɠelegɛ faa ɲɔi ɠɛɛzu, ti yee la ɠulaa su.
Kundiɠiiti ta tukpɔɠaaleʋe nuiti ta lobɛanii ɠulazu nuiti zea ga maaɓaai,
nu wolaiti ti ɗa ti yiima vai wo ti ma,
ti pɛ ta zoloosu faa ɠila ma.
4 Zɔi pagai ti zaama, naa ɠɛɛʋɛ eɠɛ ɠaingiti ti ɠaalɛai ba,
ti zaama, zɔi sɔlegai ti pɛ ba, naa ɲɔu é leʋe ɠaingi ma lɔɓɔɠɛlɛgi ʋa.
Wɛlɛ, wo zala voloi ɠana ʋa,
nii wo makɛ nuiti ti boni, GALA goo wo nuiti.
Niizu, wa niina kiteʋei zu.
5 Mina la è-wɔɔla la,
mina ʋoluzei è-nɛɛɲɔɠɔ ʋa.
Dama, è mina laalao è ɓɔɠɔ anzai ɠaazu.
6 Mazɔlɔɔ doun zunui ɠa kɛɛɠɛ wɔinzeɠe,
doun anzanui wuzeɠe dee laalɔɠɔma,
leemɔɔin ná-doun anzai wuzeɠe daalɔɠɔma,
ɛsɛ sili nui ɠa ɠɛ ga tɔ ɓɔɠɔi ná-pɛlɛyeɠei wu nuiti.
Nu la GALA ná-maawɔinɠai la
7 Nɔ̀un nà, nà wɛlɛzu ga Ɠɔoɠɔ GALAGI ʋɔ pelei,
nà ɠitosu nà-kizo GALAGI ʋa,
nà-GALAGI ɠa gòoɠaaʋote.
8 Sìli nui, mina ɠoozunɛ nà-faa zu!
Mazɔlɔɔ ni nà loona, nà wuzeɠe ʋolu.
Ni nà zeini kpidii zu,
Ɠɔoɠɔ GALAGI ɠa bɛ̀ ga wozakalagi.
9 Nà va Ɠɔoɠɔ GALAGI ná-ziiɠaawanai wu,
tɔɔzei gè kotoi ɠɛɛni daalɔɠɔma.
Kɛlɛ yeeta toɠa màalogi wo,
é ɠula ga ze, é tò wozakalagi ɠa,
nà ná-telebodai ma ɠɛɛwotii ɠa.
10 Toɠa ɠɛ sìli nuiti gaazu, unfegi lɔ ti ɠaazu,
tɛiti ti ɠɛni ɠɛɛzu mà:
«Mini ɠa deɠɛmu ɗa-ƓALAGI, Ɠɔoɠɔ GALAGI ná?»
Ta ti lɛɛvɛ ɠɔɠɔwu, eɠɛ taazuʋɛ ʋalaʋalai, nà ti ʋɛtɛ!
11 Wɛlɛ, naama voloi ɠana ʋa,
yeei wa-laa wolai ma ziɠigiti ti losu da.
Wɛlɛ, naama volo ná,
ta ɠa ɓɔ wa-yooi ʋa, kwɛmaʋɛti.
12 Naama volo ná, nuiti ta ʋa è ʋɔ bɛ,
ti zeɠe Asiili yooi zu, ti zeɠe Ezipete yooi zu,
ti zeɠe ziɛ wolai ma,
ti zeɠe kpoloɗɛi ma ná pɛ,
ti zeɠe gizeiti ma.
13 Zooi mɔta zu ɠa wo, gaa nuiti maaʋele ma,
naa ɠa ɠɛ ga ta-ɠɛɛwoti ɲɔiti ma zalai.
14 Lo ɗa-nuɓusɛiti untuɠɔ ga ɗa-lukpɔi,
baala kpulugiti be ti ga ɗɔnɔi,
ti ya ɠila be ti zeini dɔɓɔi zu, Kaalemɛle gizei ma!
Ti zoo ti laami Ɓasan lufa lɛtɛiti su, ta Galaade gizei ma,
eɠɛʋelei é ɠɛni la, mɔungi ma voloiti su!
15 Eɠɛ foloi è gi ɠulani la Ezipete yooi ʋa,
laavɔɔ vaiti kɛ gi ʋɛ.
16 Zii ɠiligiti ta ti ʋɛtɛ, ti wola unfe,
anɛɛ zobogi pɛ ka ti ya.
Ta yeeʋɛɛ la, ti laavɔɔ vai ma,
ti-woizuʋɛti ta ɓɔlɔ.
17 Ta fufiligi ɠɔmɔ eɠɛ kaalii,
eɠɛ kpokpo aniiti ti zooi ɠa.
Ta ɠula ga duai ti-lɔɔɠuzuʋɛti,
ti ʋa ga sasuɓalii Ɠɔoɠɔ GALAGI ʋɔ, gá-ƓALAGI,
ta lua ɗa-zobogi ʋa.
18 GALA, ɓɛ ɠa é ga è ɠɛʋele,
a zoo é faaɠaaza golai ɓe, é tɔ koloɠologi zuvaayɛ,
ɗa-nuɓusɛi mɔtaiti bɛ, ti ga ɗa-nuiti?
Ɗɛi è la ɗa ga yɛ ziiɠaawanai zu eyɛsu ɠɔ,
mazɔlɔɔ è-yiimai ɠa ga è wooɠɛɠiladai ɠɛ.
19 Ɗa gi maawɔinɠaazu mɔnɔ,
è la gá-vaaɠaaza golaiti pɛtɛga,
ɗa gá-ɠotoiti kpein pili ya kpoloɗɛi ma ʋalii zu.
20 Ungo, ɗa ɗa-wooɠɛɠiladai ɠula kɛlɛma Zakɔɓe mavofodaiti bɛ.
È è-zaalai ɠula kɛlɛma Aɓalaame mavofodaiti bɛ,
eɠɛʋelei è ma minazeɠegi woni da kaite wɔlɔwɔlɔi gi-mɛmɛwolani bɛ.