4
Nui ziɛ ʋeleiti ti maavalibogai
1 Naa ɠa é ba, tɔɔzei Kilista ɓɔlɔni kpusɛi zu, wa ɓalaagi à ɓɔɠɔ zɛbɛlɔ naama ɠisiɛi zu, mazɔlɔɔ zɔi é kpɔlɔi zɔlɔɔgai kpusɛi zu, naa ɓeteʋea kotoi ʋa,
2 naa ɠa a kɛ wo mina mɔ eteai ziɛ ɓɔɠɔyiimai zu, kɛlɛ kɛni wo zɛnvui wo ga GALA ziimai, yeeɠɛɠalai pɛ daawu é wo ya eteai zu.
3 Naa kula ɠɛ, nii wo ziaa su mɔungi, nii é ɠɛni ga GALA kwɛɛtala nuiti ziima vaiti, wo ɗa ɓɔɠɔ ve ɓaaɠulama vaiti zea, ta gaazuɠulapɔ ɲɔiti, ta dɔɔzodaiti, ta ziimaɠɛɛ lateʋegai, ta ani ɓɔle vaiti, ta kɔɔɠɔ gani kɔɔ vaa ɲɔiti ma.
4 Ti laa ɠa niina vɔɔzu niizu, ga wo la mɔ ʋilɛsu ti ʋolu tuʋa ʋele ɲɔi naati su, ta niina wo-lɔɠɔi ɠoloɠolosu.
5 Kɛlɛ ta ʋoluvaawo naa ma, zɔi kɛʋele ɓɛtɛai ga é nu vuluiti ta gɔvɛiti tukpɔɠaaleʋe.
6 Naa ɠa é kɛɛni deɠɛmu Woo Niinɛ Ʋagɔi laazeelini la gɔvɛiti ma, naa ɠa a kɛ nuiti kpega ʋoluma ga ti lukpɔɠaaleʋe ti-ɓusɛi zu, ti zɛnvui wo eɠɛʋelei GALA ziimai la ti-yɛnvui letegi zu.
À ɓɔ ɓɔɠɔ ʋa wo ɠilagilagi pɛ
7 Anii pɛ kpe foloi maaɓuɠaa. À ɠɛ mu ga ɠima nuiti, ta kidafaawu nuiti, nii a kɛ wo ɓɔɠɔ ve Gala falii ya.
8 Fai pɛ su, à ɓɔɠɔ nɛɛ ʋɛ gola, mazɔlɔɔ nɛɛbɛi ɠa ɗa kotoi ma mɔinmɔin gaazu maalɔɔɠu.
9 À ɓɔɠɔ laazuʋɛ wo ɠilagilagi, naa mina ɠɛ ga unsuyeli vaa.
10 Wo ɠilagilagiti, à botii ɠɛ ga vebɛanii naa zɔiti bɛ, nii wo sɔlɔɔgai GALA zea. Naazu wa ɠɛɛzu ga GALA ná-vebɛaniiti ma ɠaliva ma nu ʋagɔiti.
11 Zɔi é tɛnɛgi wosu, é GALA daawooi ɓɔɠɔi nɔ wo. Zɔi é botii ɠɛɛzu, é kɛ ga naama zɛbɛi nii GALA ge feai zea. Naa ɠa a kɛ, fai pɛ su lɛbiyai ve GALA bɛ, Yesu Kilista maaʋele ma, nii nɔnɔ ga lɛbiyai ta zobogi, eyɛsu ɠɔ. Amina!
È ɓɔlɔ tɔɔzei GALA fai ʋa
12 Nɛ̀ɛɲɔɠɔiti, wo laa mina vɔ ga suɠɔɠɔ abui é zeizu wo ma, é ʋa ɠɛ eɠɛ faa niinɛ ɠa é zeizu wo ma.
13 Tɔun à ɠoozunɛ gola ga wa wɔnɔ zɔlɔɔna Kilista ná-kpɔlɔiti su, naa ɠa a kɛ wo-yiimaʋɛ laave ga koozunɛɛi, siɛgi zu ná-lɛbiyai ɠulazu la kɛlɛma.
14 Ni nuiti ta wo zopele ɲɔuzu tɔɔzei wa ga Kilista ná-nuiti, undaanɛ nu ɠa ga woye, mazɔlɔɔ lɛbiya Yɛnvui, GALA Zɛnvui ɠa wo ʋa.
15 Wo tanɔpɛ ge mina kpɔlɔi zɔlɔɔ tɔɔzei toɠa ga nu ʋaa nu, ɓaa unma nu, ɓaa faa ɲɔu ɠɛ nu, ɓaa teʋezɔɠɔzu nu.
16 Kɛlɛ ni ta a ɓɔlɔna tɔɔzei toɠa ga keletiɛn, é mina unfe ga naa, tɔun é GALA dɛbi ga Kilista laasei pagɔi ʋɛa ba.
17 Siɛgi zeelia ga tukpɔɠaaleʋei tɔɔzei, GALA ná-nuɓusɛiti ka tɔɔzeizu ti ʋa. Tama ni tukpɔɠaaleʋei lɔɔ ɠa zeizu ade ʋa, zɔiti ti ɠɛlɛzu ga ti mina ɠidaaleʋe GALA ná-Woo Niinɛ Ʋagɔi ma, naati gaaɓelazuʋɛ ɠa ɠɛ ɠale?
18 «Ni telebo nui ɠizo fai a ɓaana,
GALA gaazuluabalala nui ta kotoba nui, tɔnɔi ɠa ɠɛ ɠale?»
19 Naa ɠa é ba, zɔiti ti kpɔlɔi zɔlɔɔsu GALA ziimai maaʋele ma, ti maanɛɛʋɛ ti ɠili faa ʋagɔi ɠɛɛ vai ʋa, ti ɓɔɠɔ yɛ Kpɛtɛ ƓALAGI yeezu, é ga wooɠɛɠila nui ná-minazeɠegiti su.