16
1 Nuiti ta ɗa ta-vaiti seikpasu,
kɛlɛ Ɠɔoɠɔ GALAGI ɠa woo ɠaaɓelagi zea.
2 Ɛsɛ pɛ ka ɗa ɠisiɛ ga nii kpein é kɛɛzu pagɛ,
kɛlɛ Ɠɔoɠɔ GALAGI ɠa é de-ɠɛɛvaiti ma ungi ma lukpɔi ɠaaleʋezu.
3 Ɗa-vaiti pɛ zɛ Ɠɔoɠɔ GALAGI yeezu,
ɗa-vaa zeikpasuiti su ɠa ɓɛtɛ.
4 Ani kpein kpɛtɛ ungi ɠa ná, Ɠɔoɠɔ GALAGI ʋɛ,
anɛɛ faa ɲɔu ɠɛ nuiti, ta ná maanɔɠɔ voloi ʋɛ.
5 Waso nuiti maayo ge la Ɠɔoɠɔ GALAGI ʋɛ,
koleʋɛ ga ti zalalalai la yɛga.
6 Faaɠaaza golai ɠa ɗa gba ga nuɓɔɠɔlai ta gaamai,
Ɠɔoɠɔ GALAGI ɠaazuluabai ʋɔ, nu ɠa ɗa maaɠooza faa ɲɔi ʋa.
7 Nui ziɛ ʋelei a nɛɛna Ɠɔoɠɔ GALAGI ʋɛ,
toɠa ɗa ti yɔɠɔzuɓɛtɛ ta sili nuiti.
8 Fizɔgɛ ani goi nu sɔlɔɔsu, é zɔlɔɔ telebodai zu,
è ʋa sɔlɔɔ golai wo, yaavai zu.
9 Nui ɠa ɗa faa zeikpasui ɠɛ,
kɛlɛ Ɠɔoɠɔ GALAGI ɠa lo kɔɠɔʋolu pɛ.
10 Masagi a ɠɛna ɓɔɛa, daawooi ɠa ga GALA gooi,
a ɠɛna tukpɔi ɠaaleʋea, daaʋɛ mina wooveleda ɠɛ.
11 Ɠɔoɠɔ GALAGI wɔinʋɛ ga kiloiti ti laazeeliai,
toɠa devezu, ʋelei kɔɠɔ ganiiti maanɛai ti ɠɛ la.
12 Faa ɲɔu ɠɛɛ vai maayoseɠeʋɛ masagiti bɛ,
mazɔlɔɔ telebodai ɠɛai ɠa a ɗa ná-zobogi maawui.
13 Masagi wɔinʋɛ ga naati, niiti ti-laawooiti sɔlegai,
naati nɛɛʋɛ bɛ, niiti ti ɓɔɛzu ga gaamai.
14 Siɛgi zu masagi yiiɠaawanazu la, ná-ziiɠulagi ɠɛɛʋɛ eɠɛ saa ɠeelai,
kɛlɛ ɠima nui ɠa zoo é gaaɓɛ.
15 Siɛgi zu masagi ɠaazulo pelei ʋasu da, naa ɠa é ga zɛnvui,
ná-nuɓɔɠɔlai ɠɛɛʋɛ eɠɛ foɠo ɠulazu lonaɓiingi.
16 Ɠimalai zɔlɔɔ fai vizɔgɛ zanu kitei ɠaalɛ ba vai ʋa,
keleɠelegi maaɓɔgai leʋegɛ walii ʋa!
17 Sɔle nuiti ta-ʋelei ɠa é ga, è ʋoluave faa ɲɔi ʋa,
zɔi é ɠaaɓaazu siɛ ʋelei ma, naa ɠa zɛnvui ɠizosu.
18 Wasogi ɠa a ɗa ʋa ga nu ɠoloɠolo fai,
kibɔɔlɔmai ɠa a ɗa ʋa ga tooi.
19 Fizɔgɛ nu ɓɔɠɔmaayei, wa ɓɔɠɔmaayei nuiti,
wo ʋa li ɓɔsu kɔɔzoganii ma, wa waso nuiti.
20 Zɔi é ɠidaazu kala gooiti bu, naa ɠa undaanɛɛi zɔlɔɔ,
undaanɛɛ nu ɠa ga naama nui, nii é ɠitosu Ɠɔoɠɔ GALAGI ʋa.
21 Zɔi é ga ɠima nui ziimaʋɛ, naa ɠa ta ɗa ɠɛ ma, keleɠele nui,
kpɔɛ nɛɛnɛgi ɠa a ɗa pilɛ sɔlɔɔ.
22 Ɠimalai ɠa ɗa zɛnvui ve naati zea, niiti ti ziɛzu la,
ɠimalala nuiti salai ɠa ga ɠimalalai.
23 Ni ɠimalai ɠa nui yiimaʋɛ, toɠa ɗa ɓɔɛ ga kidafaawui,
ná-yɛpɛi é bosu, naa ɠa ɗa faa ʋaa mɛni nuiti ma.
24 Kpɔɛ ʋagɔiti kɛɛʋɛ eɠɛ kɔin gulɔi,
nii nɛai zɛnvui ʋɛ, pagai ga kɛdɛ ganii kpusɛi vaa zu.
25 Ta ɠa ná, siɛ ʋelei zɔlegai gaazu,
kɛlɛ gaaɓelazuʋɛ ɠa ga saa ʋelei.
26 Pului ɠa ɗa ɠɛ ga botiɠɛ nui ná-kpɔbai,
daaʋɛ ɠa ɗa di botiɠɛ vai ma.
27 Nu ɲakai ɠa ɗa faa ɲɔi ɠɛʋele ɓɛtɛ,
daawooiti kɛɛʋɛ eɠɛ abulekai, é galai wosu.
28 Yaava nui ɠa ɗa kpɔɛiti teʋe,
zɔɠɔzuziɛ nui ɠa ɗa bɔɔla nuiti bali ma.
29 Suɲɔu nui ɠa ɗa seiɲɔɠɔi yaava,
é naa ʋilɛ pelei ʋa, nii ɲɔuɗai.
30 Zɔi é ɠaazuʋɛɛzu ma ga é ɠisiɛ yaava ɠɛɛ vaiti su,
é lakɔlɔgiti pu bu, naa ɓega ga faa ɲɔi ɠɛ.
31 Undeɠa ɠolegiti ta ga lɛbiya wɔɔlɔgi,
ta ɗa zɔlɔɔ sɔledai zu.
32 Zɔi zii la ɠula fala, naa vizɔgɛ kɔɔɠuluɓai ʋa,
nui é ɓɔɠɔ zosu, naa vizɔgɛ zɔi ʋa, é taa wolai zosu.
33 Ta ɗa kpakutoomai ɠɛ ga, ti ʋelela ʋele vaiti kwɛɛ,
kɛlɛ Ɠɔoɠɔ GALAGI ɠa a ɗa deve ɠaaɓelagi wo.