18
1 Nui nii kpalai ga ɠakalaʋɛ nɔ, toɠa ɗa maaɠooza zɔiti ba,
toɠa ɗa yiiɠaawana, ɠima vai kpein daalɔɠɔma.
2 Ɠimalala nui yiima vaa la ga faaɠaaɠaa vai,
kɛni ná-kisiɛiti sulɛ vai.
3 Siɛgi zu nu ɲɔi ʋaazu la, wɔinzeɠemai ɠa ɗa ʋilɛ polu, ti ʋa.
Unfegi ɠa ɗa ʋilɛ ɓaaɠulamai ʋolu.
4 Nui ɓɔɛ wooiti ti da, ta ga ziɛi buuzeiɗai gola,
ɠimalai ma ɗɛungi ɠa ga kɔtuɗɛi, é zulusu.
5 Maa la nɛɛni, nu ʋa lo faa ɲɔu ɠɛ nui ʋolu,
è ʋa telebo nui ʋeelala ná-gaamai zu.
6 Ɠimalala nui ná-kpɔɛiti ta ɗa sakpegi loo,
daawooi ɠa ɗa doɠai maaloli ma.
7 Ɠimalala nui a ɠɛna ɓɔɛa, toɠa ɗa ɓɔɠɔ ɠoloɠolo fai ɠɛ,
kpɔɠɔ wooiti ta ɗa ɠɛ ga baliiti, é ɠɔ ga tiye.
8 Zɔɠɔzuziɛ nui ná-kpɔɛiti kɛɛʋɛ eɠɛ ani ɲɛmigiti,
ta ɗa yei ti zeeli nu ɠoozuʋɛ.
9 Zɔi é ná-botiɠɛ vai maaɠonɔɔsu,
ta ga ani ɠila, ta zɔi é koloɠolosu.
10 Ɠɔoɠɔ GALAGI ɠa ga siɠi golai,
telebo nui ɠa ɗa ɓizɛ, é li ná, é ɠɛ ziilɛigi zu.
11 Kpɛtɛ nui ná-naavoloi ɠa é ga ná-taa wolai,
toɠa ɗa ɠigaiziɛ ga toɠa ga siɠigi, nii a zoo tɔun makɛsu.
12 Siɛgi zu wasogi nui yiimaʋɛ laavesu da, koloɠolo geei zeelia.
Aisa è ʋa unfemai zɔlɔɔ, kɛni è zoo ɓɔɠɔmaayeizu.
13 Zɔi é gooɠaaʋotegi veezu, aisa é ʋa woilo kpɔɛi ma, é wosu,
toɠa ná-ɠimalalai ɠula kɛlɛma, é zɔngɔ zɛlɛ ɓɔɠɔ ʋa.
14 Kisiɛ ʋagɔi ɠa zobo fe nui ʋɛ, é ziɛ seeɓɛi wu,
kɛlɛ kisiɛ ʋagɔi a valibona ga iɲɔteʋei, ɓɛ ɠa a pu su ʋolu?
15 Keleɠele nui wɔinʋɛ ga é faaɠwɛgi zɔlɔɔ,
ɠima nui ɠa ɗa ɠaaɓa ga é woilo kpɔɛiti ma, ta nu ɠala.
16 Faanɛɛi ɠa ɗa peleiti daalao,
é nu laazeeli nu wolaiti ma.
17 Nu mɔungi é ɓaazaɠazu, toɠa ɗa ɠɛ eɠɛ toɠa gaamai zea,
eyɛsu tukpɔɲɔɠɔi ʋa é gooiti sakpe.
18 Kpakutoomai ɠa ɗa sakpegi ɓe,
toɠa ɗa ɓalaa nu wolaiti seɠe unga.
19 Nu zeeli vai ɓaaʋɛ ɠɛɛɠɛloin ma, nii maawanaai, é leʋe taa wolai ʋa, nii siɠigi ma.
Kpɔɛi ɠɛɛʋɛ eɠɛ siɠigi laaʋɛ ma zɔɠɔgiti.
20 Ɛsɛ ka ɗa daawooiti ma lɔnɔgiti kɔɠɔ, é yiɠo ga tiye,
toɠa yiɠo ga niiti, dakɔlɔgiti ti ti veai.
21 Saai ta zɛnvui ta zoo zɔlɔɔsu nui nɛgi zaɓui zu.
Zɔi kpɔɛzuɠulai nɛai bɛ, kɛni é va suɓolo ɠɔmɔ fai wu.
22 Nui a anzai zɔlɔɔna, é undaanɛɛi zɔlɔɔga,
faanɛɛ ɠa naa, é sɔlɔɔgai Ɠɔoɠɔ GALAGI ya.
23 Bala nui ɠa ɗa ɓɔɛ ga maanɛɛnɛ wooi,
kpɛtɛ nui gooɠaaʋotegi wo ga zeeɠaaɓaai.
24 Nui nii bɔɔlai mɔinɗai, ta polu kpɔlɔ vai ma,
kɛlɛ nu wɔɔla ɠitei ɠa ɗa ɠili è ʋa, é leʋe è-ɠɛɛloin ʋa.